ఇచ్చట జబ్బు పడటం నిషేధం

ఇటలీలోని బెల్కాస్ట్రో అనే పట్టణ మేయర్‌ వింత ఆదేశాలు జారీ చేశారు. పట్టణంలో అనారోగ్యానికి గురికావడం, ముఖ్యంగా అత్యవసర స్థితిని తెచ్చుకోవడం నిషేధం అంటూ మేయర్‌ అంటోనియో టార్చియా ఉత్తర్వులు ఇచ్చారు. ఇటలీలోని దక్షిణ ప్రాంతంలో ఉన్న ఈ చిన్న పట్టణంలో 1,300 జనాభా నివసిస్తున్నారు. ఇందులో సగం మంది వృద్ధులే.

రోమ్‌, జనవరి 9 : ఇటలీలోని బెల్కాస్ట్రో అనే పట్టణ మేయర్‌ వింత ఆదేశాలు జారీ చేశారు. పట్టణంలో అనారోగ్యానికి గురికావడం, ముఖ్యంగా అత్యవసర స్థితిని తెచ్చుకోవడం నిషేధం అంటూ మేయర్‌ అంటోనియో టార్చియా ఉత్తర్వులు ఇచ్చారు. ఇటలీలోని దక్షిణ ప్రాంతంలో ఉన్న ఈ చిన్న పట్టణంలో 1,300 జనాభా నివసిస్తున్నారు. ఇందులో సగం మంది వృద్ధులే. అయితే, ఈ పట్టణంలో ప్రజలకు సరైన వైద్య సదుపాయాలు లేవు. గతంలో ఉన్న ఓ ఆరోగ్య కేంద్రం మూతబడింది. అత్యవసర పరిస్థితుల్లో వైద్యం అందించేందుకు వారాంతాలు, సెలవుల్లో వైద్యులు అందుబాటులో ఉండరు. దీంతో 45 కిలోమీటర్ల దూరంలోని కాటాన్జారో నగరానికి వెళ్లి వైద్యం పొందాలి. ఈ నేపథ్యంలోనే పట్టణంలో ఎవరూ అనారోగ్యానికి గురికావొద్దని ఉత్తర్వులు ఇచ్చినట్టు మేయర్‌ తెలిపారు. వైద్య సదుపాయాలు లేని అంశాన్ని అధికారుల దృష్టికి తీసుకెళ్లేందుకే ఈ నిర్ణయమని చెప్పారు. పట్టణ ప్రజలు తరచూ ఇల్లు విడిచి బయటకు వెళ్లొద్దని, ప్రయాణాలు చేయవద్దని, క్రీడలు ఆడవద్దని, ఎక్కువ సమయం విశ్రాంతి తీసుకోవాలని ఈ ఉత్తర్వుల్లో పేర్కొన్నారు.