Kuwait fire : కువైట్‌ టైర్‌ డంప్‌ యార్డ్‌లో అగ్నిప్రమాదం

Kuwait fire : కువైట్‌లోని భారీ టైర్‌ డంపింగ్‌ యార్డ్‌లో అగ్నిప్రమాదం సంభవించింది. పెద్ద ఎత్తున ఎగిసిపడుతున్న మంటలను అదుపు చేయడానికి కువైట్‌ అగ్నిమాపక శాఖ సిబ్బంది, పోలీసులు నానా తంటాలు పడుతున్నారు. అగ్నికీలల నుంచి భారీగా పొగలు వస్తుండటంతో ఆరోగ్య సమస్యలు చుట్టుముట్టవచ్చునని అధికారులు ఆందోళన చెందుతున్నారు

August 8, 2021 / 06:09 PM IST

Kuwait fire : కువైట్‌ టైర్‌ డంప్‌ యార్డ్‌లో అగ్నిప్రమాదం

కువైట్‌ సిటీ : కువైట్‌లోని భారీ టైర్‌ డంపింగ్‌ యార్డ్‌లో అగ్నిప్రమాదం (Kuwait fire) సంభవించింది. పెద్ద ఎత్తున ఎగిసిపడుతున్న మంటలను అదుపు చేయడానికి కువైట్‌ అగ్నిమాపక శాఖ సిబ్బంది, పోలీసులు నానా తంటాలు పడుతున్నారు. అగ్నికీలల నుంచి భారీగా పొగలు వస్తుండటంతో ఆరోగ్య సమస్యలు చుట్టుముట్టవచ్చునని అధికారులు ఆందోళన చెందుతున్నారు. ఈ అగ్నిప్రమాదం సులైబియా నగరం శివారులోని ఎడారి ప్రాంతంలో నాలుగు రోజుల క్రింతం ప్రారంభమైనట్లు మీడియా నివేదికల ద్వారా తెలుస్తున్నది.

సులైబియా నగరం శివారులో అతి పెద్ద టైర్ల డంపింగ్‌ యార్డ్‌ ఉన్నది. ఇక్కడ పనికిరాని టైర్లను డంపింగ్‌ చేస్తుండటంతో దాదాపు 70 లక్షల వరకు పోగయ్యాయి. వీటిలో చాలా వరకు వివిధ దేశాల నుంచి తీసుకొచ్చినట్లు స్థానిక అధికారులు చెప్తున్నారు. గత కొన్నేండ్లుగా పొగవుతుండటంతో.. ఇక్కడ సాధారణంగా వచ్చే ఇసుక తుఫాన్‌ కారణంగా పాత టైర్లపై ఇసుక నిండిపోయి ఉన్నది. నాలుగు రోజుల క్రితం ఒక్కసారిగా మంటలు లేవడంతో పాత టైర్లు అగ్నికి ఆహుతవడం మొదలయ్యాయి. వీటి నుంచి వెలువడుతున్న పొగ కారణంగా కువైట్‌ వాసులకే కాకుండా ఇతర దేశాల వారికి కూడా ఆరోగ్య సమస్యలతోపాటు వాతావరణ సమస్యలు పొంచి ఉన్నాయని ఆరోగ్య నిపుణులు ఆందోళన వ్యక్తం చేస్తున్నారు. వీటి నుంచి వెలువడే పొగలో కార్బన్‌ మొనాక్సైడ్‌, సల్ఫర్‌ ఆక్సైడ్స్‌ వంటి విషపూరిత రసాయనాలు ఉంటాయని, వీటిని పీల్చుకోవడం వల్ల శ్వాసకోశ సమస్యలతోపాటు క్యాన్సర్‌ వంటివి కూడా వచ్చే అవకాశాలు ఉంటాయని వైద్య నిపుణులు చెప్తున్నారు.

రెండేండ్ల క్రితం కూడా ఇదే మాదిరి అగ్నిప్రమాదం జరిగింది. దీని వల్ల దాదాపు రెండున్నర లక్షల స్వేర్‌మీటర్ల వరకు ప్రభావం కనిపించింది. అప్పటి ప్రమాదం సమయంలో అక్కడ దాదాపు లక్ష వరకు టైర్లు ఉన్నట్లు అధికారులు తేల్చారు. ఇదే మాదిరి అగ్నిప్రమాదం గత ఏప్రిల్‌ నెలలో కూడా సంభవించింది. పాత టైర్లను సేకరించి వాటి నుంచి రీ సైకిల్డ్‌ టైర్లు ఉత్పత్తి చేయాలని ఒక కంపెనీ యోచించింది. టైర్లను పోగేయడం చేశారే కానీ, రీసైక్లింగ్‌ టైర్లను మాత్రం ఉత్పత్తి చేయడం ప్రారంభించలేదు. పాత టైర్లను ఉపయోగించి పరిశ్రమలకు అవసరమైన రబ్బర్‌ ఉత్పత్తులు, రోడ్లు వేయడానికి, గ్రౌండ్‌ ఫ్లోరింగ్‌ చేయడంలో వినియోగిస్తుంటారు.