Alef Aeronautics | ఎగిరే కారును అభివృద్ధిచేస్తున్న అమెరికా కంపెనీ.. అడ్వాన్స్‌ బుకింగ్స్‌ షురూ

నగరాల్లో ట్రాఫిక్‌ సమస్యలతో విసిగిపోయారా? చందమామ కథల్లో చదివినట్టు రెక్కల గుర్రం ఉంటే ఎంచక్కా గాల్లో ఎగురుకుంటూ గమ్యస్థానానికి చేరుకోవచ్చని అనుకుంటున్నారా? అయితే మీ కల త్వరలో నిజం కాబోతున్నది. ఎగిరే కారు మార్కెట్లోకి రాబోతున్నది.

• రోడ్డుపై, గాల్లోనూ దూసుకుపోగలదు
• అభివృద్ధి చేస్తున్న అమెరికా కంపెనీ

Alef Aeronautics | కాలిఫోర్నియా, అక్టోబర్‌ 1: నగరాల్లో ట్రాఫిక్‌ సమస్యలతో విసిగిపోయారా? చందమామ కథల్లో చదివినట్టు రెక్కల గుర్రం ఉంటే ఎంచక్కా గాల్లో ఎగురుకుంటూ గమ్యస్థానానికి చేరుకోవచ్చని అనుకుంటున్నారా? అయితే మీ కల త్వరలో నిజం కాబోతున్నది. ఎగిరే కారు మార్కెట్లోకి రాబోతున్నది. రోడ్డుపై దూసుకుపోతూ.. ట్రాఫిక్‌ ఎక్కువగా ఉన్న చోట పక్షిలా రివ్వున గాల్లో ఎగిరిపోయే కారు అందుబాటులోకి రానున్నది. అమెరికాలోని కాలిఫోర్నియాకు చెందిన అలెఫ్‌ ఏరోనాటిక్స్‌ కంపెనీ ఈ తరహా కారును అభివృద్ధి చేసింది. తాజాగా డెట్రాయిట్‌లో నిర్వహించిన ఆటో షోలో దీన్ని ప్రదర్శించారు.

ముందస్తు బుకింగ్‌లే 500..

ఈ ఏడాది జూన్‌లో అమెరికా ఫెడరల్‌ ఏవియేషన్‌ అడ్మినిస్ట్రేషన్‌ ఈ కారుకు అనుమతులు మంజూరు చేసింది. ఇందులో ఇద్దరు ప్రయాణించవచ్చు. దీని ధర సుమారు రూ.2.46 కోట్లు. విద్యుత్తు శక్తితో నడిచే ఇది రోడ్డుపై 200 మైళ్ల వరకు ప్రయాణించగలదు. గాల్లో అయితే 110 మైళ్ల వరకు ఎగరగలదు. ఈ కారులో నుంచి 180 డిగ్రీల కోణంలో చూసే వెసులుబాటు ఉంది. అలెఫ్‌ ఏరోనాటిక్స్‌ కంపెనీ 2022లోనే ఈ కార్లను ముందస్తు బుకింగ్‌ చేసుకునే అవకాశం కల్పించగా.. ఇప్పటివరకు 500 వరకు బుక్‌ అయ్యాయి.