బీజింగ్ వింటర్ ఒలంపిక్స్ను బహిష్కరిస్తున్నట్లు భారత విదేశాంగ శాఖ కీలక ప్రకటన చేసింది. గాల్వన్ ఘర్షణలో పాల్గొన్న చైనా ఆర్మీ కమాండర్ ఫబావోను ఒలంపిక్ టార్చ్బేరర్గా చైనా ఎంపిక చేయడాన్ని భారత్ తీవ్రంగా వ్యతిరేకించింది. ఈ కారణంగానే తాము క్రీడల ప్రారంభ, ముగింపు కార్యక్రమాలను బాయ్కాట్ చేస్తున్నట్లు భారత విదేశాంగ శాఖ తేల్చి చెప్పింది. ఇక అమెరికా కూడా ఇదే మార్గంలో నడిచింది. తాము కూడా ఈ బీజింగ్ వింటర్ ఒలంపిక్స్ను బహిష్కరిస్తున్నామని భారత్ ప్రకటించింది.
ఓ వైపు ఈ వ్యవహారం నడుస్తుండగానే.. కొన్ని రోజుల క్రితం రష్యా, ఉక్రెయిన్ వ్యవహారం కూడా నడుస్తోంది. ఉక్రెయిన్పై ఎలాగైనా పై చేయి సాధించాలని రష్యా తహతహలాడుతోంది. దీనికి అమెరికా మోకాలడ్డుతోంది. ఈ నేపథ్యంలో అమెరికాకు ఎలాగైనా బుద్ధి చెప్పాలని రష్యా, చైనా ఒక్కటయ్యాయి. బీజింగ్ వింటర్ ఒలంపిక్స్ పేరుతో రష్యా చైనా గ్యాస్, చమురు ఒప్పందాన్ని కూడా చేసుకున్నాయి. అమెరికాకు ప్రత్యామ్నాయంగా ఓ వేదికను కూడా సృష్టించాలని నిర్ణయించుకున్నాయి. ఈ నేపథ్యంలో భారత్ ఎటు వైపు ఉంటుంది? భారత్కు ఎవరు మద్దతిస్తారని ఆలోచిస్తున్న సమయంలో అమెరికా భారత్కు మద్దతిచ్చింది. బీజింగ్ వింటర్ ఒలంపిక్స్ను భారత్ బాయ్కాట్ చేయడాన్ని అమెరికా విదేశాంగ శాఖ సమర్థించింది.
అలాగే చైనా చేస్తున్న ఆక్రమణలపై కూడా అమెరికా స్పందించింది. చైనా ఆక్రమణలకు వ్యతిరేకంగా భారత్కు అండగా నిలుస్తామని అమెరికా విదేశాంగ శాఖ అధికార ప్రతినిధి నెడ్ ఫ్రాయిజ్ ప్రకటించారు. ‘చైనా-భారత్ సరిహద్దుల వివాదం నడుస్తోంది. దీనికి చర్చలు, శాంతియుత మార్గం ద్వారా ఇరు పక్షాలు చర్చించుకుంటే మేం మద్దతిస్తాం. పొరుగు దేశాలతో బెదిరింపు ధోరణితో చైనా గతంలోనూ వ్యవహరించిందని, అప్పుడు కూడా తాము తీవ్ర అభ్యంతరం వ్యక్తం చేశాం. తామెప్పుడూ మిత్రులకు అండగా నిలుస్తూనే వస్తున్నాం.’ అని అమెరికా విదేశాంగ శాఖ ప్రతినిధి నెడ్ ఫ్రాయిడ్ స్పష్టం చేశారు.