Artificial Intelligence | న్యూఢిల్లీ: వైన్ నాణ్యతను గుర్తించే ఏఐ టూల్ను స్విట్జర్లాండ్ పరిశోధకులు అభివృద్ధి చేశారు. ఏ ప్రాంతంలోని ద్రాక్షతో, ఏ తరహా వైన్ తయారవుతుందన్న సమాచారంతో సైంటిస్టులు ‘ఏఐ’ ప్రోగ్రామ్ను అభివృద్ధి చేశారని ‘ది గార్డియన్’ వార్తా కథనం పేర్కొన్నది. వైన్ నాణ్యతను కనుగొనేందుకు ల్యాబ్లో చేపట్టే ‘గ్యాస్ క్రోమటోగ్రఫీ’ పరీక్షకు ఇది ఏమాత్రమూ తీసిపోదని పేర్కొన్నది.
వైన్ తయారీకి సంబంధించి పుట్టుపూర్వోత్తరాల్ని ఏఐ పరికరం బయటపెడుతుందని, మెషిన్ లెర్నింగ్ పద్ధతుల్ని ఉపయోగించి ఏఐ టెక్నాలజీని సైంటిస్టులు అభివృద్ధి చేశారని తెలిపింది. యూనివర్సిటీ ఆఫ్ జెనీవా ప్రొఫెసర్ అలెగ్జాండర్ మాట్లాడుతూ, ‘వైన్ అమ్మకాల్లో ఎన్నో మోసాలు జరుగుతున్నాయి. తమ గ్యారేజీల్లో తయారుచేసిన వైన్ సీసాలకు కొందరు పాపులర్ బ్రాండ్ లేబుల్స్ అతికిస్తున్నారు. వినియోగదారుల్ని మోసగించి వేలాది డాలర్లు సంపాదిస్తున్నారు. అల్గారిథంతో పనిచేసే ఏఐ ఆధారిత పరికరం మోసాన్ని సులభంగా పసిగడుతుంది’ అని తెలిపారు.