చరిత్రలో ఈరోజు: అంధులకు దారి చూపిన మహోన్నతుడీయన

Today History: బ్రెయిలీ లిపిని కనిపెట్టి, దృష్టి లోపం ఉన్నవారు చదవడానికి, వ్రాయడానికి వీలు కల్పించిన వ్యక్తిగా చిరస్థాయిగా నిలిచిపోయారు. బ్రెయిలీ తన చిన్నతనంలోనే ఓ ప్రమాదంలో కంటిచూపు కోల్పోయాడు. ఈయన తండ్రి...

January 4, 2022 / 12:43 PM IST

చరిత్రలో ఈరోజు: అంధులకు దారి చూపిన మహోన్నతుడీయన

Today History: కండ్లు కనిపించని వారు ఎంత ఇబ్బంది పడతారో కండ్లున్న వారికి తెలియదు. కండ్లు కనిపించకుండా చేసుకుని ఒకరోజు జీవిస్తే వారి జీవితం ఎంతగా సమస్యలతో ముడిపడి ఉందో అర్ధమవుతుంది. ఇలాంటి ఎన్నో వ్యధల నుంచి బయటపడేసి వారికి చదవడం, రాయడం నేర్పేందుకు నడుం బిగించారు లూయిస్‌ బ్రెయిలీ. చిన్ననాట కంటి చూపు కోల్పోయిన ఈయన.. తన లిపితో తోటి అంధులకు మార్గదర్శిగా నిలిచారు.

లూయిస్ బ్రెయిలీ 1809లో సరిగ్గా ఇదే రోజున ఫ్రాన్స్‌లోని కూపేర్‌లోని ఒక చిన్న పట్టణంలో జన్మించాడు. బ్రెయిలీ లిపిని కనిపెట్టి, దృష్టి లోపం ఉన్నవారు చదవడానికి, వ్రాయడానికి వీలు కల్పించిన వ్యక్తిగా చిరస్థాయిగా నిలిచిపోయారు. బ్రెయిలీ తన చిన్నతనంలోనే ఓ ప్రమాదంలో కంటిచూపు కోల్పోయాడు. ఈయన తండ్రి రేలీ బ్రెయిలీ.. రాజ గుర్రాలకు జీను తయారీదారుగా పనిచేసేవాడు. మూడేండ్ల వయస్సులో ఉన్నప్పుడు తన తండ్రి పనిముట్లతో ఆడుకుంటున్నప్పుడు ఒక సాధనం అతడి కంటికి తగిలి పెద్ద గాయమైంది. 8 సంవత్సరాల వయస్సులో కంటి చూపును పూర్తిగా కోల్పోయాడు.

తనకు 16 ఏండ్ల వయసులో ఉన్నప్పుడు ప్రత్యేక లిపిని కనిపెట్టాలనే ఆలోచన వచ్చింది. సైనికులు రాత్రివేళ చీకటిలో చదవడానికి ఉపయోగపడే ‘నైట్‌ రైటింగ్‌’, ‘సోనోగ్రఫీ’ గురించి ఫ్రెంచ్‌ సైన్యంలో కెప్టెన్‌ చార్లెస్‌ బార్బియర్‌ వద్ద తెలుసుకున్నాడు. ‘నైట్‌ రైటింగ్‌’ అనేది స్క్రిప్ట్‌ను కాగితంపై 12 చుక్కల ఆధారంతో చిత్రీకరించడం. అంధుల కోసం లిపి రూపొందించాలనే ఆలోచన బ్రెయిలీకి ఈ స్క్రిప్ట్ నుంచే వచ్చింది. 12 కు బదులుగా 6 చుక్కలను ఉపయోగించి 64 అక్షరాలు, చిహ్నాలను రూపొందించాడు. అలాగే, విరామ చిహ్నాలు, గణిత చిహ్నాలు, సంగీతం సంజ్ఞామానం రాయడానికి అవసరమైన చిహ్నాలను కూడా తయారు చేశాడు. ఇలా 1825 లో లూయిస్ బ్రెయిలీ ప్రపంచవ్యాప్తంగా ఉన్న అంధులు చదవడానికి, వ్రాయడానికి లిపిని కనుగొన్నారు. 1851 లో టీబీకి గురైన బ్రెయిలీ, ఆరోగ్యం క్షీణించి 43 ఏండ్ల వయసులో 1852 లో తుదిశ్వాస విడిచారు. ఈయన చనిపోయిన 16 ఏండ్లకు బ్రెయిలీ లిపిని రాయల్‌ ఇన్‌స్టిట్యూట్‌ గుర్తించింది. ఆయన గౌరవార్ధం భారత ప్రభుత్వం 2009 లో పోస్టల్‌ స్టాంప్‌తోపాటు రెండు రూపాయల బిల్లను తీసుకొచ్చింది.