నెపోలియ‌న్‌, హిట్ల‌ర్‌లా అమెరికా.. ప‌శ్చిమ దేశాలే అణుయుద్ధానికి ఉసిగొల్పుతున్నాయి

మాస్కో: ర‌ష్యా విదేశాంగ మంత్రి సెర్గీ లావ్రోవ్ ఇవాళ మ‌ళ్లీ వార్నింగ్ ఇచ్చారు. మూడో ప్ర‌పంచ యుద్ధం వ‌స్తే, అది అణ్వాయుధ యుద్ధ‌మే అవుతుంద‌న్నారు. ఇవాళ న్యూస్ కాన్ఫ‌రెన్స్‌లో పాల్గొన్న ఆయ‌న మాట్లాడుతూ.. అమెరికా అధ్య‌క్షుడు జో బైడెన్ చేసిన వ్యాఖ్య‌ల‌ను త‌ప్పుప‌ట్టారు. ఆంక్ష‌ల‌తోనే మూడ‌వ ప్ర‌పంచ యుద్ధానికి దిగుతామ‌ని బైడెన్ చేసిన కామెంట్‌ను ఆయ‌న ప్ర‌స్తావిస్తూ.. మూడ‌వ ప్ర‌పంచ యుద్ధం కేవ‌లం న్యూక్లియ‌ర్ వార్ మాత్ర‌మే అవుతుంద‌న్నారు. అణు యుద్ధం చేయాల‌ని ప‌శ్చిమ దేశాలు భావిస్తున్నాయ‌ని, ఆ ఆలోచ‌న‌లు ప‌శ్చిమ దేశాల నేత‌ల్లో ఉన్న‌ద‌ని, ర‌ష్యా ప్ర‌జ‌ల మ‌నోభావాల్లో ఆ ఉద్దేశం లేద‌ని లావ్రోవ్ తెలిపారు. ఒక‌వేళ ఎవ‌రైనా నిజ‌మైన యుద్ధం చేయాల‌ని భావిస్తే, అప్పుడు వాళ్లు అలాంటి ప్ర‌ణాళిక‌ల గురించి ఆలోచించాల‌న్నారు.

ఉక్రెయిన్ ప్ర‌భుత్వం నియో-నాజీల త‌ర‌హాలో వ్య‌వ‌హ‌రిస్తోంద‌న్నారు. ప‌ట్ట‌ణాలు, న‌గ‌రాల్లో ఆ గ్యాంగ్‌లు లూటీల‌కు పాల్ప‌డుతున్న‌ట్లు లావ్రోవ్ ఆరోపించారు. సాధార‌ణ పౌరుల‌ను క‌వ‌చాల త‌ర‌హాలో ఉక్రేనియ‌న్లు వాడుతున్న‌ట్లు ఆయ‌న విమ‌ర్శించారు. ప‌శ్చిమ దేశాల‌ను హాలీవుడ్ మూవీల‌తో పోల్చిన ఆయ‌న‌.. దీన్ని వెస్ట్ర‌న్ మీడియా రాసిన‌ హాలీవుడ్ మూవీలా భావించ‌కూడ‌ద‌న్నారు. ర‌ష్యాను ప‌ణంగా పెట్టి ప‌శ్చిమ దేశాల భ‌ద్ర‌త‌ను నాటో పెంచుతున్న‌ట్లు ఆయ‌న ఆరోపించారు. అమెరికా ఓ నెపోలియ‌న్‌, హిట్ల‌ర్ త‌రహాలో ప్ర‌వ‌ర్తిస్తోంద‌న్నారు. గ‌తంలో నెపోలియ‌న్‌, హిట్ల‌ర్‌లు.. యూరోప్‌ను త‌మ ఆధీనంలోకి తెచ్చుకోవాల‌ని భావించార‌ని, ఇప్పుడు అమెరిక‌న్లు కూడా అదే చేస్తున్నార‌ని లావ్రోవ్ ఆరోపించారు. నార్డ్‌స్ట్రీమ్ 2 గ్యాస్ పైప్‌లైన్‌ను ర‌ద్దు చేసి అమెరికా త‌న నిజ‌స్వ‌రూపాన్ని బ‌య‌ట‌పెట్టింద‌న్నారు.