ఎన్నో ఆటుపోట్లను ఎదుర్కొని చిన్న వయసులోనే ప్రపంచ నంబర్ వన్ షట్లర్ క్రీడాకారిణిగా నిలిచారు సైనా నెహ్వాల్. 2015 లో జరిగిన ఇండియా ఓపెన్లో పతకం సాధించడం ద్వారా చైనా ఆధిపత్యానికి గండికొట్టడం ద్వారా ఈ ఫీట్ సాధించారు. ఒలింపిక్స్లో కాంస్య పతకం సాధించిన భారతదేశానికి చెందిన తొలి మహిళా బ్యాడ్మింటన్ క్రీడాకారిణిగా చరిత్ర పుట్టలకెక్కారు. సైనా నెహ్వాల్ అనేక రికార్డులు సృష్టించారు. పురుషుల విభాగంలో ప్రకాష్ పదుకొనే ఒక్కరే ప్రపంచం నంబర్ వన్ ఆటగాడిగా నిలిచారు.
1990 మార్చి 17 న జన్మించిన సైనా నెహ్వాల్.. తన ఎనిమిదేండ్ల వయసు నుంచే బ్యాడ్మింటన్ ఆడటం ప్రారంభించారు. సైనాకు బ్యాడ్మింటన్ వారసత్వంగా ఆమె తల్లి నుంచి వచ్చింది. తల్లి రాష్ట్ర స్థాయి బ్యాడ్మింటన్ క్రీడాకారిణి. 2008 లో బీడబ్ల్యూఎఫ్ వరల్డ్ జూనియర్ ఛాంపియన్షిప్ గెలిచిన తరువాత.. గొప్ప విజయాలు సాధించగల శక్తి తనకు ఉందని సైనా పేరెంట్స్ గ్రహించారు. అదే సంవత్సరం ఆమె బీజింగ్ ఒలింపిక్ క్రీడలకు అర్హత సాధించారు. క్వార్టర్ ఫైనల్కు చేరుకోవడం ద్వారా ఆమె తొలి భారత మహిళా బ్యాడ్మింటన్ క్రీడాకారిణిగా గుర్తింపు పొందారు. ఇండోనేషియాకు చెందిన మరియా క్రిస్టిన్ యులియాంటి చేతిలో ఓడిపోయే ముందు.. ప్రపంచ 5 వ ర్యాంకర్ హాంకాంగ్కు చెందిన వాంగ్ చెన్ను ఓడించడం ద్వారా ప్రపంచ బ్యాడ్మింటన్ రంగాన్ని తన వైపునకు తిప్పుకున్నారు.
సైనా నెహ్వాల్.. 2009 లో అర్జున అవార్డు, 2010 లో రాజీవ్ గాంధీ ఖేల్ రత్న అవార్డు పొందారు. బీడబ్ల్యూఎఫ్ హాంకాంగ్ ఓపెన్, సింగపూర్ ఓపెన్, ఇండోనేషియా ఓపెన్ టైటిల్స్ గెలుచుకున్నారు. 2010 లో కామన్వెల్త్ గేమ్స్ స్వర్ణం సాధించింది. 2012 లండన్ ఒలింపిక్ కాంస్యం సాధించి చరిత్ర సృష్టించారు. ప్రతిష్టాత్మక ఆల్ ఇంగ్లండ్ ఓపెన్ ఇప్పటికీ ఆమెకు కలగానే ఉండిపోయింది. సైనా ఆస్ట్రేలియా ఓపెన్, రెండుసార్లు ఇండియా ఓపెన్, చైనా ఓపెన్ గెలిచింది. కొన్నేళ్లుగా గాయాలతో బాధపడినప్పటికీ.. తన 12 సంవత్సరాల కెరీర్లో 11 సూపర్ సిరీస్ టైటిళ్లతో పాటు 24 కి పైగా అంతర్జాతీయ టైటిళ్లను సైనా నెహ్వాల్ గెలుచుకున్నారు.
ఒలింపిక్స్తోపాటు ప్రపంచ ఛాంపియన్షిప్, ప్రపంచ జూనియర్ ఛాంపియన్షిప్లో ప్రతి ఈవెంట్లో కనీసం ఒక్క పతకం సాధించిన ఏకైక భారతీయ షట్లర్ ఆమె కావడం హైదరాబాదీలకు గర్వకారణమని చెప్పుకొవచ్చు. మార్చి 26 న సైనా నెహ్వాల్ జీవితం ఆధారంగా బయోపిక్ విడుదలైంది. ఈ సినిమాలో పరిణీతి చోప్రా సైనా పాత్రలో నటించారు.
2009: ద్వేషపూరిత ప్రసంగం చేశారన్న ఆరోపణలపై బీజేపీ ఎంపీ వరుణ్ గాంధీ అరెస్టు
2006: పాకిస్తాన్లోని పెషావర్లో తన కాన్సులేట్ కార్యాలయాన్ని మూసివేసిన అమెరికా
2005: ఇండోనేషియాలోని సుమత్రా ద్వీపంలో భారీ భూకంపం
2000: టెస్ట్ క్రికెట్లో 435 వికెట్లతో కపిల్ దేవ్ రికార్డును బద్దలు కొట్టిన వెస్టిండీస్కు చెందిన కోర్ట్నీ వాల్ష్
1998: పార్లమెంటులో విశ్వాస ఓటును గెలుచుకున్న అటల్ బిహారీ వాజ్పేయి నేతృత్వంలోని బీజేపీ ప్రభుత్వం
1977: భారతదేశంలో మొట్టమొదటి కాంగ్రెసేతర ప్రభుత్వాన్ని ఏర్పాటు చేసిన మొరార్జీ దేశాయ్
1959: టిబెటన్ ప్రభుత్వాన్ని రద్దు చేసి పంచెన్ లామాను స్థాపించిన చైనా
1941: నిర్బంధం నుంచి తప్పించుకొని బెర్లిన్ చేరుకున్న నేతాజీ సుభాష్ చంద్రబోస్
1939: ఒకరిపై ఒకరు దాడి చేయకూడదని పోలాండ్తో ఐదేండ్ల ఒప్పందం కుదుర్చుకున్న జర్మనీ నియంత హిట్లర్
1910: ప్రపంచంలోనే మొట్టమొదటి సీప్లేన్ కానార్డ్ను సృష్టించిన ఫ్రెంచ్ ఆవిష్కర్త హెన్రీ ఫాబ్రే