టీకా తీసుకోనందుకు.. 3,000 మంది ఆరోగ్య కార్యకర్తలు సస్పెండ్‌

పారిస్: గడువులోపు కరోనా టీకా తీసుకోనందుకు 3,000 మంది ఆరోగ్య కార్యకర్తలను సస్పెండ్‌ చేశారు. ఈ ఘటన ఫ్రాన్స్‌లో జరిగింది. ఈ వారం డెడ్‌లైన్‌కు ముందు వ్యాక్సిన్‌ వేయించుకోవడంలో విఫలమైన హెల్త్‌ వర్కర్స్‌కు జీతం చెల్లించకుండా డిస్మిస్‌ చేసినట్లు ఆ దేశ ఆరోగ్య మంత్రి ఒలివియర్ వెరాన్ గురువారం తెలిపారు. దేశ వ్యాప్తంగా ఉన్న ఆరోగ్య కేంద్రాలు, క్లినిక్స్‌లో పని చేసే సిబ్బందిలో టీకా తీసుకోని వారికి ఈ మేరకు బుధవారం నోటీసులు పంపినట్లు చెప్పారు. కాగా, చాలా మంది ఆరోగ్య కార్యకర్తలు టీకాలు తీసుకునేందుకు ముందుకు రాకపోగా తమ ఉద్యోగాలకు రాజీనామా చేశారని వెల్లడించారు. పెద్ద సంఖ్యలో ఆరోగ్య సిబ్బంది సస్పెండైనప్పటికీ ప్రజల ఆరోగ్య సంరక్షణకు భరోసా కల్పిస్తామన్నారు.

కాగా, ఫ్రాన్స్ ప్రెసిడెంట్ ఇమ్మాన్యుయేల్ మాక్రాన్ జూలై నెలలో ఒక ఆర్డర్‌ జారీ చేశారు. ఆసుపత్రులు, అగ్నిమాపక సేవలు, రిటైర్డ్ హోమ్ వర్క్‌ సిబ్బందికి అల్టిమేటం ఇచ్చారు. కరోనాపై పోరాటంలో భాగంగా కనీసం ఒక డోస్‌ని సెప్టెంబర్ 15 లోపు తీసుకోవాలని చెప్పారు. ఒకవేళ ఆ నాటికి వ్యాక్సిన్‌ వేయించుకోకపోతే సస్పెన్షన్‌ను ఎదుర్కోవలసి ఉంటుందని హెచ్చరించారు.

మరోవైపు చాలా మంది ఆరోగ్య కార్యకర్తలు టీకా వేయించుకునేందుకు ఇష్టపడటం లేదు. టీకా సమర్థత డేటాపై వారు ఆందోళన వ్యక్తం చేస్తున్నారు. కాగా, టీకా తీసుకోవడంపై గడువు ఆర్డర్‌, తమ సస్పెన్షన్‌ను వ్యతిరేకిస్తూ కొందరు ఆరోగ్య కార్యకర్తలు నిరసన ప్రదర్శనలు నిర్వహించారు.