TRUTH Social | సొంత దుకాణం.. డొనాల్డ్ ట్రంప్ కొత్త‌ సోష‌ల్ నెట్‌వ‌ర్క్‌

అమెరికా మాజీ అధ్య‌క్షుడు డొనాల్డ్ ట్రంప్ సొంతంగా కొత్త సోష‌ల్ నెట్‌వ‌ర్క్ ప్రారంభిస్తున్న‌ట్లు బుధ‌వారం ప్ర‌క‌టించారు. దాని పేరు TRUTH Social.

వాషింగ్ట‌న్‌: అమెరికా మాజీ అధ్య‌క్షుడు డొనాల్డ్ ట్రంప్ సొంతంగా కొత్త సోష‌ల్ నెట్‌వ‌ర్క్ ప్రారంభిస్తున్న‌ట్లు బుధ‌వారం ప్ర‌క‌టించారు. దాని పేరు TRUTH Social. ట్రంప్ మీడియా & టెక్నాల‌జీ గ్రూప్ (టీఎంటీజీ) దీనికి య‌జ‌మానిగా ఉంటుంది. వ‌చ్చే నెల‌లోనే కొంద‌రు ప్ర‌త్యేక ఆహ్వానితుల‌తో ఈ సోష‌ల్ నెట్‌వ‌ర్క్ బీటా వెర్ష‌న్ లాంచ్ అయ్యే అవ‌కాశాలు ఉన్నాయి. ఆపిల్ సంస్థ యాప్ స్టోర్‌లో ఇది ప్రిఆర్డ‌ర్‌పై అందుబాటులో ఉంది. ఈ ఏడాది జ‌న‌వ‌రిలో క్యాపిట‌ల్ హిల్‌పై దాడి తర్వాత ట్విట‌ర్‌, ఫేస్‌బుక్.. ట్రంప్‌పై శాశ్వ‌త నిషేధం విధించిన విష‌యం తెలిసిందే.

అప్ప‌టి నుంచీ ఆయ‌న సొంత నెట్‌వ‌ర్క్ ఆలోచ‌న చేస్తున్నారు. ఇప్పుడీ TRUTH Socialతోపాటు ఓ వీడియో ఆన్ డిమాండ్ స‌ర్వీస్‌ను కూడా ప్రారంభించాల‌ని టీఎంటీజీ భావిస్తోంది. పెద్ద టెక్ కంపెనీల నిరంకుశ‌త్వానికి దీటుగా నిల‌బ‌డేలా ఈ TRUTH Socialను సృష్టించిన‌ట్లు ట్రంప్ తెలిపారు. తాలిబ‌న్లకు కూడా అవ‌కాశం ఉన్న ట్విట‌ర్‌లో మీకు ఎంతో ఇష్ట‌మైన అమెరికా అధ్య‌క్షుడికి స్థానం లేకుండా పోయింది. ఇది ఏమాత్రం ఆమోద‌యోగ్యం కాదు అని ట్రంప్ స్ప‌ష్టం చేశారు.