Facebook : 14 ఏండ్ల క్రితం కిడ్నాప్‌.. ఫేస్‌బుక్‌ మెసేజ్‌తో కలిసిన తల్లీకూతురు

Facebook : 14 ఏండ్ల క్రితం ఓ ఆరేండ్ల బాలిక కిడ్నాప్‌ అయింది. ఇన్నాళ్లు తన తల్లి ఎక్కడ ఉన్నదో, ఎలా ఉన్నదో తెలుసుకోవాలన్న పట్టుదలతో ఆ యువతి పరిశోధన సాగించింది. చివరకు...

September 16, 2021 / 05:22 PM IST

Facebook : 14 ఏండ్ల క్రితం కిడ్నాప్‌.. ఫేస్‌బుక్‌ మెసేజ్‌తో కలిసిన తల్లీకూతురు

ఫ్లోరిడా : (Facebook) 14 ఏండ్ల క్రితం ఓ ఆరేండ్ల బాలిక కిడ్నాప్‌ అయింది. ఇన్నాళ్లు తన తల్లి ఎక్కడ ఉన్నదో, ఎలా ఉన్నదో తెలుసుకోవాలన్న పట్టుదలతో ఆ యువతి పరిశోధన సాగించింది. చివరకు తల్లి ఒడికి చేరి ఆనందభాష్పాలు రాల్చింది. గత సోమవారం ఈ అద్భుత దృశ్యానికి టెక్సాస్‌లోని లారెడో వేదికగా నిలిచింది. అంతకు రెండు రోజుల ముందు వారు అమెరికా-మెక్సికో సరిహద్దులో కలుసుకుని కండ్లతోనే ఊసులు చెప్పుకున్నారు.

ఫ్లోరిడా క్లెర్మంట్‌లోని ఇంటి నుంచి ఆరేండ్ల బాలిక జాక్వలైన్‌ హెర్నాండెజ్‌ కిడ్నాప్‌నకు గురైంది. అనంతరం ఆమె ఫ్లోరిడాలో పెరిగి పెద్దదైంది. తన తల్లి గురించి తెలుసుకోవాలని, కలుసుకోవాలని ప్రతినిత్యం అనుకునేది. తల్లితో ఎడబాటును కథలుగా ఫేస్‌బుక్‌లో రాసేది. జాక్వలైన్‌ మెసేజ్‌ చదివిన ఒకరి ద్వారా, ఆమె తల్లి టెక్సాస్‌లో ఉన్నట్లు తెలిసింది. దాంతో ఆమె ఫేస్‌బుక్‌ పేజీకి నేరుగా మెసేజ్‌ పెట్టింది. దాంతో పరుగున వెళ్లిన తల్లి ఏంజెలికా వెన్సెస్‌ సల్గాడో.. క్లెర్మాంట్‌ పోలీసులకు సమాచారం ఇచ్చింది. ఓ యువతి ఏనాడో కిడ్నాప్‌ అయిన తన కూతురని చెప్తున్నదని, ఈ విషయాలపై దర్యాప్తు జరిపి సహకరించాలని పోలీసులను ఏంజెలికా కోరింది. దాంతో వివిధ డాక్యుమెంట్లను సిద్ధం చేసిన పోలీసులు.. జాక్వలైన్‌ హెర్నాండెజ్‌ చెప్తున్న మాటలు నిజమేనని, వారు కలిసేందుకు ఎలాంటి అభ్యంతరం లేదని స్పష్టం చేశారు. తొలుత అమెరికా-మెక్సికో సరిహద్దులో కండ్లతోనే మాట్లాడుకున్న తల్లీకూతుర్లను.. నాలుగు రోజుల క్రితం టెక్సాస్‌లో ఒకటి చేశారు.

చిన్ననాట కిడ్నాప్‌కు గురైన తాను.. 14 ఏండ్ల తర్వాత తల్లితో కలువడం చాలా సంతోషంగా ఉన్నదని జాక్వలైన్‌ హెర్నాండెజ్‌ చెప్పింది. సోషల్‌ మీడియాలో పెట్టిన పోస్ట్‌ ద్వారా తల్లిని కలుసుకున్నానని తెలిపింది. దీనికి సంబంధించి పత్రికా ప్రకటనను క్లెర్మాట్ పోలీసులు విడుదల చేశారు. ‘నమ్మశక్యం కానటువంటి భావోద్వేగ కథ. సుఖాంతం అయినందుకు సంతోషంగా ఉన్నది. తప్పిపోయిన వారు కలుసుకోవాలని చేసిన ప్రార్థనలు ఫలించాయి’ అని పోలీసులు పేర్కొన్నారు. అయితే, 2007 లో ఆరేండ్ల వయసున్న జాక్వలైన్‌ హెర్నాండెజ్‌ను ఆమె తండ్రి పాబ్లో హెర్నాండెజ్‌ క్లెర్మంట్‌లోని వారి ఇంటి నుంచే కిడ్నాప్‌ చేసి తీసుకెళ్లినట్లు బీబీసీ వార్త ప్రసారం చేసింది.