వాషింగ్టన్: ఎండకు తాళలేక బండిని లాగుతున్న గుర్రం రోడ్డుపై కుప్పకూలింది. అమెరికాలోని న్యూయార్క్ నగరంలో బుధవారం ఈ సంఘటన జరిగింది. మాన్హట్టన్ హెల్స్ కిచెన్ ప్రాంతంలోని కూడలి వద్ద క్యారేజ్ లాగుతున్న రైడర్ అనే గుర్రం ఉన్నట్టుండి కూలిపోయింది. దానిని పైకి లేపేందుకు గుర్రం బండి వ్యక్తి ప్రయత్నించినా ఫలితం లేకపోయింది. మరోవైపు అక్కడున్న వారు గుర్రం కింద పడిపోవడం చూసి ఆందోళన చెందారు. వెంటనే పోలీసులకు సమాచారం ఇచ్చారు.
కాగా, న్యూయార్క్ పోలీస్ డిపార్ట్మెంట్కు చెందిన అశ్వ దళం యూనిట్ పోలీసులు వెంటనే అక్కడకు చేరుకున్నారు. ఎండ వేడిని తట్టుకోలేక రోడ్డుపై పడిపోయిన ఆ గుర్రానికి సపర్యలు చేశారు. పైపులతో నీటిని దానిపై వెదజల్లారు. ఆ గుర్రం శరీరాన్ని చల్లబరిచారు. దీంతో గంట తర్వాత ఆ గుర్రం తేరుకుని పైకి లేచింది. పోలీసులు దానిని గుర్రపు శాలకు తరలించారు. పశు వైద్యుల పర్యవేక్షణలో చికిత్స అందిస్తున్నారు.
మరోవైపు ఈ వీడియో సోషల్ మీడియాలో వైరల్ అయ్యింది. దీంతో జంతు ప్రేమికులు గుర్రం బండి నిర్వాహకులపై ఆగ్రహం వ్యక్తం చేశారు. పెద్ద నగరాల్లో గుర్రం బండ్ల స్వారీని వ్యతిరేకించారు. కార్లు, మనుషులు, వాతావరణంతోపాటు మరెన్నో కారణాల వల్ల గుర్రాలు ప్రమాదానికి గురవుతాయని పెటా సంస్థ ట్విట్టర్లో ఆందోళన వ్యక్తం చేసింది. గుర్రం బండ్ల నిషేధంపై రాజకీయ నేతలు చర్యలు తీసుకోవాలని కొందరు డిమాండ్ చేశారు. అయితే గుర్రం బండ్ల యూనియన్ నేతలు ఈ డిమాండ్లను ఖండించారు.
BREAKING: This horse COLLAPSED while pulling a carriage in NYC, likely from heat exhaustion, and has been down for over an hour.
Horses don’t belong in big cities where they’re put in constant danger because of cars, humans, weather, and more. pic.twitter.com/vXBVRJRjPB— PETA (@peta) August 10, 2022