Visit:
Canada Dy PM Chrystia | కెనడా డిప్యూటీ ప్రధానమంత్రి క్రిష్టియా ఫ్రీలాండ్ సంచలన నిర్ణయం తీసుకున్నారు. తన పదవికి రాజీనామా చేస్తున్నట్లు సోమవారం ప్రకటించారు. సుంకాలు పెంచుతామని అమెరికా అధ్యక్షుడిగా ఎన్నికైన డొనాల్డ్ ట్రంప్ హెచ్చరికలకు కెనడా ప్రధాని జస్టిన్ ట్రూడో సరిగ్గా స్పందించనందుకు అసంతృప్తితో డిప్యూటీ ప్రధాని పదవి నుంచి వైదొలుగుతున్నట్లు తెలిపారు.
‘మా దేశం ఈ రోజు తీవ్రమైన సవాల్ ఎదుర్కొంటున్నది` అని ఆర్థిక శాఖ మంత్రిగా పని చేసిన ఫ్రీ లాండ్ ఎక్స్ (మాజీ ట్విట్టర్) వేదికగా పోస్ట్ పెట్టారు. కెనడా నుంచి చేసుకునే దిగుమతులపై 25 శాతం సుంకాలు పెంచాలని అమెరికా అధ్యక్షుడిగా ఎన్నికైన డొనాల్డ్ ట్రంప్ ప్రణాళిక సిద్ధం చేశారని గుర్తు చేశారు. కొన్ని వారాలుగా దేశ ప్రజలకు మేలు చేసేందుకు గల అవకాశాలను కనుగొన్నాం’ అని ఆమె రాసుకొచ్చారు. ట్రంప్ సుంకాల హెచ్చరికలు చాలా తీవ్రమైనవని తెలుసుకోవాల్సిన అవసరం ఉందన్నారు. సుంకాల యుద్ధాన్ని ఎదుర్కొనేందుకు నిధులు నిల్వ చేసుకోవాల్సి ఉందని గుర్తు చేశారు. అందుకోసం రాజకీయ జిమ్మిక్కులు చేయొద్దన్నారు.
అమెరికాకు కెనడా ప్రధాన వాణిజ్య భాగస్వామి. కెనడా నుంచి 75 శాతం ఎగుమతులు అమెరికాకు వెళతాయి. 2013లో తొలిసారి పార్లమెంటుకు క్రిష్టియా ఫ్రీ లాండ్ ఎన్నికయ్యారు. లిబరల్స్ అధికారంలోకి వచ్చిన తర్వాత జస్టిన్ ట్రూడో మంత్రి వర్గంలో చేరి వాణిజ్య, విదేశాంగ శాఖలు నిర్వహించారు. యూరోపియన్ యూనియన్, అమెరికాలతో ఫ్రీ ట్రేడ్ చర్చలు జరిపారు. డిప్యూటీ ప్రధానిగా తాను రాజీనామా చేసిన తర్వాత తనకు మరో పదవి అప్పగించాలని ట్రూడో కోరుకుంటున్నారని, కానీ, నిజాయితీగా తాను పని చేశానని, మంత్రి వర్గం నుంచి తప్పుకుంటున్నానని ఆమె పేర్కొన్నారు.
