Flying Bike | తొలి ఫ్లయింగ్‌ బైక్‌ బుకింగ్‌ ప్రారంభం.. ధర ఎంతంటే..?

Flying Bike | త్వరలో గాల్లో ఎగిరే బైకులు మార్కెట్లోకి రానున్నాయి. ప్రపంచంలోనే తొలి ఎగిరే బైకును జెట్‌ప్యాక్‌ ఏవియేషన్‌ కంపెనీ సిద్ధం చేసింది. బుకింగ్‌ కూడా మొదలుపెట్టింది. దీని ప్రారంభ ధర రూ. 3.15 కోట్లు.

Flying Bike | ప్రపంచంలోనే మొట్టమొదటి ఫ్లయింగ్ మోటార్‌సైకిల్ బుకింగ్ మొదలైంది. ఈ మోటార్ సైకిల్ గంటకు 96 కి.మీ వేగంతో 30 నిమిషాల పాటు ఎగురుతుంది. ఈ ఎగిరే బైక్‌కు ‘స్పీడర్’ అని పేరు పెట్టారు. దీని ప్రారంభ ధర రూ.3.15 కోట్లుగా నిర్ణయించారు. 136 కిలోల బరువున్న ఈ బైక్‌ 272 కిలోల బరువును మోయగలిగే సామర్ధ్యం ఉన్నది. ఈ బైక్‌ను రిమోట్‌ ద్వారా కూడా నియంత్రించవచ్చు. ఎగిరే బైక్‌ను అమెరికాకు చెందిన జెట్‌ప్యాక్ ఏవియేషన్ కంపెనీ తయారు చేసింది. తొలి డిజైన్‌లో నాలుగు టర్బైన్‌లు ఉండేవి. కాగా, తుది ఉత్పత్తిలో 8 టర్బైన్లను కలిగి ఉంటుంది.

ఈ ఎగిరే మోటార్‌సైకిల్‌కు సంబంధించిన విమాన పరీక్షలను జెట్‌ప్యాక్‌ ఏవియేషన్‌ సంస్థ నిర్వహించింది. ఇది యూఎస్‌ ఫెడరల్ ఏవియేషన్ అడ్మినిస్ట్రేషన్ ధృవీకరణను పొందుతుందని భావిస్తున్నారు. 2-3 ఏండ్లలో కంపెనీకి చెందిన 8 జెట్ ఇంజన్ స్పీడర్ ఫ్లయింగ్ బైకులు మార్కెట్లోకి వచ్చే అవకాశాలు ఉన్నాయి.

నిజానికి ఈ ఎగిరే బైక్ ఒక ఎయిర్ యుటిలిటీ వాహనం. అంటే మెడికల్ ఎమర్జెన్సీ, అగ్నిప్రమాదాలు సంభవించిన సందర్భాల్లో దీనిని వాడుకోవడం వల్ల మంచి ఫలితాలను పొందవచ్చు. మిలిటరీ మార్కెట్ కోసం కార్గో ఎయిర్‌క్రాఫ్ట్‌గా కంపెనీ మానవరహిత వెర్షన్‌ను కూడా అభివృద్ధి చేస్తున్నది. ఇది 400 ఎంపీహెచ్‌ వేగంతో భూమి నుంచి 100 అడుగుల ఎత్తులో ఎగురుతుంది. గత ఏడాది జపాన్‌కు చెందిన స్టార్టప్‌ కంపెనీ AERWINS టెక్నాలజీ అమెరికాలో జరిగిన డెట్రాయిట్‌ ఆటో షోలో ‘XTurismo’ ఫ్లయింగ్‌ బైక్‌ను ప్రదర్శించింది. ఈ బైకుల ఉత్పత్తి కూడా ఇంకా మొదలుకాలేదు.