వాషింగ్టన్ : మైక్రోసాఫ్ట్ సహవ్యవస్ధాపకుడు బిల్ గేట్స్, మెలిందా గేట్స్ అధికారికంగా వేరుపడ్డారు. వాషింగ్టన్లోని కింగ్ కౌంటీ సుపీరియర్ కోర్టులో ఫైలింగ్ ద్వారా అధికారికంగా గేట్స్ దంపతులు విడిపోయినట్టయింది. 27 ఏండ్ల వైవాహిక బంధం అనంతరం తాము తెగదెంపులు చేసుకుంటున్నట్టు బిల్ గేట్స్, మెలిందా ఈ ఏడాది మేలో ప్రకటన చేశారు.
తమ జీవితాల్లో తదుపరి దశను దంపతులుగా తాము కలిసి ముందుకు సాగుతామని తాము నమ్మడం లేదని వారు స్పష్టం చేశారు. అయితే బిల్, మెలిండా గేట్స్ ఫౌండేషన్లో కలిసి పనిచేస్తామని పేర్కొన్నారు. వీరు కలిసి సమర్ధంగా పనిచేస్తారా అనేది పర్యవేక్షించేందుకు రెండేండ్ల ట్రయల్ పీరియడ్ను అమలు చేస్తామని గేట్స్ ఫౌండేషన్ పేర్కొంది. ఇక విడాకుల ప్రకటన చేసిన అనంతరం మైక్రోసాఫ్ట్ను స్ధాపించిన తొలినాళ్లలో పనిప్రదేశంలో ప్రవర్తనపై బిల్ గేట్స్ పలు ఆరోపణలు ఎదుర్కొన్నారు.