Columbia University | న్యూయార్క్, మార్చి 3: చదువు మంచి జీవితాన్ని ఇవ్వడమే కాదు, మనిషి ఆయుష్షును కూడా పెంచుతుందట. ఉన్నత విద్యావంతులు మిగతావారి కంటే ఎక్కువ రోజులు జీవిస్తారని, వీరిలో వృద్ధాప్యం కూడా ఆలస్యంగా వస్తున్నదని ఓ అధ్యయనంలో వెల్లడైంది. అమెరికాలోని కొలంబియా యూనివర్సిటీకి చెందిన మయిల్మెన్ స్కూల్ ఆఫ్ పబ్లిక్ హెల్త్కు చెందిన పరిశోధకులు జరిపిన అధ్యయనంలో విద్యకు, వృద్ధాప్యానికి మధ్య సంబంధం ఉందని గుర్తించారు.
అమెరికాలోని ఫ్రెమింగ్హామ్ నగరంలో ఫ్రెమింగ్హామ్ హార్ట్ స్టడీ పేరుతో 1948 నుంచి అక్కడి ప్రజల ఆరోగ్యాలను పర్యవేక్షిస్తున్నారు. ఇందుకు సంబంధించిన వివరాలను తీసుకొని కొలంబియా యూనివర్సిటీ పరిశోధకులు అధ్యయనం జరపగా.. ఆసక్తికర అంశాలు వెల్లడయ్యాయి. ప్రతి రెండేండ్ల పాఠశాల విద్యను అభ్యసించడం వల్ల వృద్ధాప్యం మీదపడటం 2 నుంచి 3 శాతం ఆలస్యమవుతుందని పరిశోధకులు గుర్తించారు. సాధారణ వ్యక్తుల కంటే ఉన్నత విద్యావంతుల్లో మరణ ముప్పు 10 శాతం తక్కువగా ఉంటుందని తేల్చారు.