హస్తరేఖలు, పుట్టిన తేదీ.. చూసి భవిష్యత్తు చెప్పేవాళ్ళుంటారు. కానీ, కాఫీ కప్పుతోనూ మన గురించిన విషయాలు తెలుసుకోవచ్చంటున్నారు ముంబైకి చెందిన ‘టాస్సియో గ్రాఫర్’ శీతల్ షపారియా. తాగడం పూర్తయ్యాక కప్పు, సాసర్లలో మిగిలిన కాఫీ అవశేషాలను బట్టి ఎదుటి వ్యక్తిని అంచనా వేయవచ్చట. యూఎస్లో టాస్సియోగ్రఫీలో శిక్షణ పొందిన శీతల్ ఆన్లైన్ ద్వారా సేవలందిస్తున్నారు. ఈ కళ పదహారో శతాబ్దంలో టర్కీలో ప్రారంభమైంది. అందుకే, విశ్లేషణకోసం సాధారణంగా టర్కిష్ కాఫీనే ఉపయోగిస్తారు. మిగిలిపోయిన కాఫీని అటూ ఇటూ తిప్పడం వల్ల కప్పులో రకరకాల ఆకృతులు ఏర్పడతాయి. వాటి ఆధారంగానే భూత, భవిష్యత్, వర్తమానాలపై ఓ నిర్ణయానికొస్తారు. వైన్, బీర్ గ్లాస్ రీడింగులు కూడా ఇదే సూత్రం ఆధారంగా పనిచేస్తాయి. కుదిరితే ఓ కప్పు కాఫీ తాగి, మీరూ ప్రయత్నించండి.