Commits suicide | పెళ్లి చేసుకోవాలని కోరుతూ వీడియో కాల్‌.. యువతి ఆత్మహత్య

ప్రియుడిని పెళ్లి చేసుకోవాలని కోరుతూ వీడియో కాల్‌ చేసి, అనంతరం ఓ యువతి ఆత్మహత్యకు పాల్పడిన ఘటన మాదాపూర్ పోలీస్ స్టేషన్ పరిధిలో చోటుచేసుకుంది

కొండాపూర్, అక్టోబర్ 25 : ప్రియుడిని పెళ్లి చేసుకోవాలని కోరుతూ వీడియో కాల్‌ చేసి, అనంతరం ఓ యువతి ఆత్మహత్యకు పాల్పడిన ఘటన మాదాపూర్ పోలీస్ స్టేషన్ పరిధిలో చోటుచేసుకుంది. పోలీసుల వివరాల ప్రకారం.. ఉత్తరప్రదేశ్‌కు చెందిన అర్చనా చౌదరి మాలిక్‌, చంద్రనాయక్‌ తండాలోని ఎస్‌ఆర్‌ సద్గురు రెసిడెన్సీలో నివాసం ఉంటోంది. ఉత్తరాఖండ్‌కు చెందిన భండారి విమల్‌తో ఆమెకు గత నాలుగేళ్లుగా పరిచయం ఉండగా, ఇద్దరూ సహోద్యోగులుగా పనిచేస్తున్నారు. విమల్‌ శనివారం రాత్రి తల్లితో కలిసి చేర్యాలలో ఓ కార్యక్రమానికి వెళ్లాడు. తెల్లవారుజామున 2.30 గంటల సమయంలో అర్చనా అతడికి వీడియో కాల్‌ చేసి, ఇంట్లో ఫ్యాన్‌కు చున్నీ కట్టి చూపిస్తూ పెళ్లి చేసుకోకపోతే ఆత్మహత్య చేసుకుంటానని హెచ్చరించింది.

అనంతరం ఆమె ఫోన్‌ ఎత్తకపోవడంతో ఆందోళనకు గురైన విమల్‌ ఉదయం 5.30 గంటల సమయంలో ఆమె ఉంటున్న ఫ్లాట్‌కు చేరుకున్నాడు. తలుపు లోపలి నుంచి గడియ పెట్టి ఉండటంతో డయల్‌ 112కు సమాచారం ఇచ్చాడు. ఘటనా స్థలానికి చేరుకున్న పెట్రోలింగ్‌ సిబ్బంది తలుపులు బలవంతంగా తెరిచి చూడగా అర్చనా ఫ్యాన్‌కు వేలాడుతూ కనిపించింది. క్లూస్‌ టీమ్‌ ఆధారాలు సేకరించి, మృతదేహాన్ని ఉస్మానియా జనరల్‌ దవాఖా తరలించారు. ఘటనపై పోలీసులు కేసు నమోదు చేసి దర్యాప్తు చేస్తున్నారు. కాగా విమల్‌కు ఇది వరకే పెళ్లి అవ్వగా విడాకులు తీసుకునేందుకు ప్రయత్నిస్తున్నట్లు సమాచారం.