Venu Udugula | న్యూయార్క్‌లో ఉన్న అనుభూతి కలుగుతోంది.. హైదరాబాద్‌ అభివృద్ధిపై టాలీవుడ్‌ డైరెక్టర్‌ వేణు ఉడుగుల ప్రశంసలు

Venu Udugula | పదేండ్లుగా తెలంగాణ ప్రగతి పథంలో పరుగులు పెడుతున్నదని, దేశానికి ఆదర్శంగా నిలుస్తున్నదని అంటున్నారు యువ దర్శకుడు వేణు ఊడుగుల. నీది నాది ఒకే కథ, విరాటపర్వం చిత్రాలతో తెలుగు చిత్రసీమలో ప్రత్యేకమైన గుర్తింపును తెచ్చుకున్న వేణు ఊడుగుల ‘నమస్తే తెలంగాణ’తో తెలంగాణ గురించి ఆసక్తికర విషయాలు పంచుకున్నారు.

Venu Udugula | పదేండ్లుగా తెలంగాణ ప్రగతి పథంలో పరుగులు పెడుతున్నదని, దేశానికి ఆదర్శంగా నిలుస్తున్నదని అంటున్నారు యువ దర్శకుడు వేణు ఊడుగుల. నీది నాది ఒకే కథ, విరాటపర్వం చిత్రాలతో తెలుగు చిత్రసీమలో ప్రత్యేకమైన గుర్తింపును తెచ్చుకున్న వేణు ఊడుగుల ‘నమస్తే తెలంగాణ’తో తెలంగాణ గురించి ఆసక్తికర విషయాలు పంచుకున్నారు.

ఈ పదేండ్ల కాలంలో తెలంగాణలో ఎలాంటి అభివృద్ధిని చూస్తున్నారు ?

కేసీఆర్‌ సారథ్యంలో ఈ పదేండ్లలో తెలంగాణ రూపురేఖలే పూర్తిగా మారిపోయాయి. అన్ని రంగాల్లో ప్రగతి కనిపిస్తున్నది. మ్యానిఫెస్టోలో చెప్పకపోయినా రైతుబంధు వంటి పథకాన్ని ప్రవేశపెట్టి కేసీఆర్‌ రైతుబాంధవుడిగా నిలిచారు. ఈ పథకాన్ని దేశం మొత్తం అమలు చేస్తే దేశ ముఖచిత్రమే మారిపోతుంది. ఇప్పుడు రైతుబంధును దశలవారీగా 16 వేలకు పెంచాలని నిర్ణయించడం గొప్ప విషయం.

హైదరాబాద్‌ నగరంలో మీరు గమనించిన మార్పులేంటి?

ఈ పదేండ్లలో బెంగళూరు, చెన్నై వంటి నగరాలను అధిగమించి హైదరాబాద్‌ అభివృద్ధిలో దూసుకుపోతున్నది. గచ్చిబౌలి ఫైనాన్షియల్‌ డిస్ట్రిక్ట్‌, దుర్గంచెరువు తీగల వంతెన వద్దకు వెళ్లి చూస్తే న్యూయార్క్‌లో ఉన్నామనే అనుభూతి కలుగుతున్నది. కొత్తగా కట్టిన ఫ్లైఓవర్స్‌ వల్ల ట్రాఫిక్‌ స్మూత్‌గా సాగిపోతున్నది. ఇక శాంతి భద్రతల విషయంలో ప్రభుత్వం రాజీలేని వైఖరిని అవలంబిస్తున్నది. ఈ పదేండ్లలో చిన్న అలజడి కూడా లేకుండా ప్రజలు ప్రశాంత వాతావరణంలో జీవిస్తున్నారు. హైదరాబాద్‌ డెవలప్‌మెంట్‌లో ఎక్కువ క్రెడిట్‌ కేటీఆర్‌కు ఇవ్వాలి. నగరానికి పెట్టుబడులను తీసుకొచ్చే విషయంలో ఆయన ఎంతో కృషి చేస్తున్నారు.

గ్రామాల్లో జీవన ప్రమాణాలు ఎలా ఉన్నాయి ?

కాళేశ్వరం ప్రాజెక్ట్‌ తెలంగాణలో కరువు తీర్చింది. ఒకప్పుడు నీళ్లు లేక నెర్రెలు చాచిన నేలలు ఇప్పుడు పచ్చదనాన్ని సింగారించుకున్నాయి. ఏ ప్రాంతానికి వెళ్లినా కనుచూపు మేర పచ్చదనమే కనిపిస్తున్నది. వ్యవసాయ భూములు కోట్లు పలుకుతున్నాయి. ఒకనాడు ఒక పంటకే నోచుకోని తెలంగాణ రైతులు నేడు రెండు మూడు పంటలు పండించే దిశకు చేరుకున్నారు. మిషన్‌ భగీరథతో ఇంటింటికీ తాగునీరు అందుతున్నది. మహిళలు నీళ్ల కోసం బిందెలు పట్టుకొని నడిచిన దృశ్యాలు గత కాలపు గుర్తులుగా మిగిలిపోయాయి.

కేసీఆర్‌ ప్రవేశపెట్టిన పథకాలలో మీకు బాగా నచ్చినదేమిటి?

రైతుబంధు తర్వాత గర్భిణులకు న్యూట్రిషియన్‌ కిట్‌ అందించడం చాలా గొప్ప నిర్ణయం అనుకుంటున్నా. కేసీఆర్‌ ప్రవేశపెట్టిన ప్రతి పథకం ప్రజల జీవన నాణ్యతను మెరుగుపరిచేవే. మానవీయ కోణంలో చేసే అభివృద్ధి ఎప్పుడైనా సత్ఫలితాలను అందిస్తుంది.