గణపతి లడ్డూ మహా ప్రియం

విశ్వవ్యాప్తంగా పేరుగాంచిన బాలాపూర్‌ లడ్డూకు ఏటా క్రేజ్‌ పెరుగుతూనే ఉంది. వందలు..వేలు దాటి లక్షలకు చేరింది.

• బాలాపూర్‌ లడ్డూ ధర రూ.24.60 లక్షలు
• ఉత్కంఠగా వేలం..దక్కించుకున్న వంగేటి లక్ష్మారెడ్డి
• తొలి నుంచి రసవత్తరంగా సాగిన ప్రక్రియ
• హాజరైన మంత్రులు సబితారెడ్డి, తలసాని
• బడంగ్‌పేట లడ్డూకు రూ.12 లక్షలు
• నగరవ్యాప్తంగా లడ్డూల వేలానికి విశేష స్పందన

బడంగ్‌పేట, సెప్టెంబర్‌ 9 : విశ్వవ్యాప్తంగా పేరుగాంచిన బాలాపూర్‌ లడ్డూకు ఏటా క్రేజ్‌ పెరుగుతూనే ఉంది. వందలు..వేలు దాటి లక్షలకు చేరింది. శుక్రవారం నిర్వహించిన వేలం పాటలో బాలాపూర్‌ గణనాథుని లడ్డూను వీఎన్‌ఆర్‌ కన్‌స్ట్రక్షన్‌ అధినేత, స్థానిక టీఆర్‌ఎస్‌ నాయకుడు వంగేటి లక్ష్మారెడ్డి రూ.24.60 లక్షలకు దక్కించుకున్నారు. ఉదయం 5 గంటలకు ఉత్సవ కమిటీ అధ్యక్షుడు వంగేటి నిరంజన్‌రెడ్డి, ఉత్సవ కమిటీ నాయకులు ప్రత్యేక పూజలు చేసి వేలం పాట ప్రారంభించారు.

కార్యక్రమానికి ముఖ్య అతిథులుగా మంత్రులు సబితారెడ్డి, తలసాని శ్రీనివాస్‌యాదవ్‌, రంగారెడ్డి జిల్లా జడ్పీ చైర్‌పర్సన్‌ తీగల అనితా హరినాథ్‌రెడ్డి, మాజీ ఎమ్మెల్యే తీగల కృష్ణారెడ్డి, మేయర్‌ చిగిరింత పారిజాత నర్సింహారెడ్డి హాజరయ్యారు. 9 మంది లడ్డూ వేలంలో పేర్లు నమోదు చేసుకున్నారు. వంగేటి లక్ష్మారెడ్డి, సీఎంఆర్‌ షాపింగ్‌మాల్‌, పోరెడ్డి శ్రీనివాస్‌రెడ్డి, జక్కిడి శివచరణ్‌, కార్పొరేటర్‌ ఎర్ర మహేశ్వరి జైహింద్‌, నవారు శ్రీనివాస్‌రెడ్డి, దాసరి దయానందరెడ్డి, మర్రి శశాంక్‌రెడ్డిలు పోటీపడగా..చివరకు రూ.24.60 లక్షలకు వంగేటి లక్ష్మారెడ్డి కైవసం చేసుకున్నారు. గతేడాది ఎమ్మెల్సీ రమేష్‌యాదవ్‌ రూ.18.90 లక్షలకు సొంతం చేసుకున్నారు. లడ్డూ దక్కించుకున్న అనంతరం లక్ష్మారెడ్డి హనుమాన్‌ ఆలయంలో పూజలు నిర్వహించారు.

• జిల్లెలగూడ నవయుగ యూత్‌ అసోసియేషన్‌ వినాయక లడ్డూను రూ.6.10 లక్షలకు కైవసం చేసుకున్న చింతల రాఘవేందర్‌ ముదిరాజ్‌
• కూకట్‌పల్లి బీజేపీ కార్యాలయం వద్ద గణనాథుడి లడ్డూను రూ.5.20 లక్షలకు మర్రి కృష్ణారావు దక్కించుకున్నారు.
• నాగోలు డివిజన్‌ రాక్‌టౌన్‌కాలనీ కమ్యూనిటీహాల్‌ ప్రాంగణంలో నెలకొల్పిన వినాయకుడి లడ్డూను రూ.3,01,116 లక్షలకు సోమేశ్వర్‌రావు చేజిక్కించుకున్నారు.
• మన్సూరాబాద్‌ డివిజన్‌ చిత్రసీమకాలనీలోని వినాయకుడి లడ్డూ ప్రసాదాన్ని తీర్థాల నాగేశ్వరరావు, వసుంధర దంపతులు రూ. 2.71 లక్షలకు సొంతం చేసుకున్నారు.
• మూసాపేట నవయవక అసోసియేషన్‌ ఆధ్వర్యంలో గణనాథుడి లడ్డూను రూ.2.51 లక్షలకు తూము వాసుపటేల్‌ కైవసం చేసుకున్నారు.
• రామంతాపూర్‌ నెహ్రూనగర్‌ బద్ది పోచమ్మ దేవాలయం వద్ద నేతాజీ యూత్‌ అసోసియేషన్‌ ఏర్పాటు చేసిన అతిపెద్ద గణనాథుని లడ్డూను మాజీ కార్పొరేటర్‌ గంధం జ్యోత్స్న నాగేశ్వర్‌రావు రూ.2.51 లక్షలకు దక్కించుకున్నారు.
• కేపీహెచ్‌బీ కాలనీ 3వ ఫేజ్‌లో శివశక్తి కల్చరల్‌ అసోసియేషన్‌ ఆధ్వర్యంలో గణనాథుడి లడ్డూను రూ.2.42 లక్షలకు చిక్కం వంశీ కైవసం చేసుకున్నారు.
• బాలాజీనగర్‌ రాఘవేంద్ర కాలనీలో గణనాథుడి మండపం వద్ద లడ్డూను రూ.2.09 లక్షలకు కైలానాయక్‌ కైవసం చేసుకున్నారు.
• అల్మాస్‌గూడ లడ్డూను రూ.2,60,116కు కైవసం చేసుకున్న చప్పిడి తిరుమల్‌రెడ్డి
• చంపాపేట క్రికెట్‌క్లబ్‌ ఆవరణలో ప్రతిష్ఠించిన గణపతి లడ్డూను గూడూరు అవినాశ్‌రెడ్డి రూ.2.50 లక్షలకు సొంతం చేసుకున్నారు.
• ఆర్కేపురం డివిజన్‌ వాసవీ కాలనీలో రూ.2.36 లక్షలకు లడ్డూను దండు ప్రకాశ్‌ కైవసం చేసుకున్నారు.
• జవహర్‌నగర్‌లోని బృందావన్‌ కాలనీలో లడ్డూను రూ.2.27 లక్షలకు మేకల లక్ష్మీఅయ్యప్ప దంపతులు సొంతం చేసుకున్నారు.
• మీర్‌పేట చౌరస్తాలో రూ.2 లక్షలకు లడ్డూను దక్కించుకున్న హన్మంతరావును మాజీ ఎమ్మెల్యే తీగల కృష్ణారెడ్డి అభినందించి సన్మానించారు.

మంచి జరుగుతుందన్న నమ్మకం : వంగేటి లక్ష్మారెడ్డి
బాలాపూర్‌ లడ్డూ తీసుకుంటే మంచి జరుగుతుందన్న నమ్మకం ఉంది. గతంలో తీసుకున్న వారికి రుజువైంది. ఈ సంవత్సరం అవకాశం వచ్చింది. గణనాథుడి దయవల్ల అన్ని శుభాలు కలుగుతాయని విశ్వాసం.