Visit:
అంబర్పేట, సెప్టెంబర్ 6: అంబర్పేట మండల పరిధిలోని బాగ్అంబర్పేట, బతుకమ్మకుంటలో చిట్కోళ్ల మునీ, నరసింహ దంపతులు కొన్నేండ్లుగా అద్దె ఇంట్లో నివాసముంటున్నారు. నరసింహ ఆటో నడిస్తుండగా, మున్నీ ఇండ్లల్లో పని చేసుకుంటూ జీవనం సాగిస్తున్నారు. కాంగ్రెస్ ప్రభుత్వం ఇందిరమ్మ ఇండ్ల పేరిట దరఖాస్తు చేసుకోమని చెప్పగా మున్నీ రూ.10వేలు చెల్లించి దరఖాస్తు చేసుకుంది. దరఖాస్తు నంబర్ 137409గా ఉంది.
ఆన్లైన్లో దరఖాస్తు పరిశీలన అనంతరం అన్ని పత్రాలు సక్రమంగా ఉండటంతో డ్రాలో వేయడానికి అధికారులు ఓకే చేశారు. గత నెల 29న అంబర్పేట నియోజకవర్గానికి సంబంధించిన ఇందిరమ్మ ఇండ్ల డ్రాను హౌసింగ్ బోర్డు అధికారులు ఛే నంబర్ మహారాణా ప్రతాప్ ఫంక్షన్హాల్లో నిర్వహించారు. స్థానిక ఎమ్మెల్యే కాలేరు వెంకటేశ్, హౌసింగ్ బోర్డు అధికారులు పాల్గొని లాటరీ పద్ధతిన 480 మంది లబ్ధిదారులను ఎంపిక చేశారు. హౌసింగ్ బోర్డు ఈఈ బాబురావు ఎస్సీ కోటా కింద చిట్కోళ్ల మున్నీ(దరఖాస్తు నంబర్ 137409)కు ఇందిరమ్మ ఇల్లు వచ్చిందని అందరి సమక్షంలో ప్రకటించారు. అక్కడే ఉన్న మున్నీ భర్త నరసింహ తమకు ఇల్లు వచ్చిందని సంతోషపడి పనికి వెళ్లిన భార్యను తీసుకొని ఫంక్షన్హాల్కు వచ్చాడు. ఇద్దరు కలిసి ఈఈ బాబారావును మీకు డ్రాలో ఇల్లు వచ్చిందని, రెండు రోజుల తర్వాత ఫోన్కు మెసేజ్ వస్తుందని తర్వాత మీరు నాంపల్లిలోని హౌసింగ్ బోర్డు కార్యాలయానికి రావాలని సూచించారు.
రెండు రోజులైనా ఫోన్కు మెసేజ్ రాకపోవడంతో ఆందోళన చెందిన మున్నీ, సరసింహ దంపతులు నాంపల్లిలోని హౌసింగ్ బోర్డు కార్యాలయానికి వెళ్లి ఈఈ బాబురావును కలిశారు. మీరు ఐడీ ప్రూప్లు సరిగ్గా పెట్టలేదని, డ్రాలో ఇల్లు రాలేదని ఈఈ బాబారావు బుకాయించారు. మున్నీకి ఇల్లు వచ్చినట్లు బాబారావు డ్రా తీసిన రోజు ప్రకటించిన వీడియో క్లిప్పింగ్ను ఆయనకు చూపించారు. అయినప్పటికీ ఈఈ బాబారావు అవేమీ పట్టించుకోకుండా మీకు ఇల్లు రాలేదని ఇక్కడి నుంచి వెళ్లిపోవాలని బెదిరించాడని మున్నీ, నరసింహ దంపతులు ఆవేదన వ్యక్తం చేశారు. దీంతో వారు కన్నీరుమున్నీరయ్యారు. సీఎం రేవంత్రెడ్డి, మంత్రులు పొంగులేటి శ్రీనివాస్రెడ్డి, పొన్నం ప్రభాకర్ స్పందించి తమకు న్యాయం చేయాలని వారు వేడుకుంటున్నారు.
ఈ విషయమై హౌసింగ్ బోర్డు ఈఈ బాబురావును ప్రశ్నించగా..డ్రాలో వచ్చిన వారందరి వివరాలు మళ్లీ క్షేత్రస్థాయిలో పరిశీలన చేస్తామని పత్రాలు తప్పుగా ఉంటే రద్దు చేస్తామని చెప్పారు. అయితే వీరి విషయానికి వచ్చేసరిగా బుకాయించడం చేశారు. ఎందుకంటే ఇందిరమ్మ ఇండ్ల కేటాయింపునకు సంబంధించి మున్నీకి అన్ని పత్రాలు సరిగ్గా ఉన్నాయి. వీరికి సొంత ఇల్లు లేదు. కారులేదు. ఆటో నడిస్తాడు. వీరి కుటుంబ సభ్యులు ఎవరి పేరు మీద కూడా ఇండ్లు లేవు. సరికదా..అన్ని పత్రాలు పరిశీలన(స్కృటినీ) చేసిన తర్వాతనే డ్రాలో వేశారు. పత్రాలు సరిగ్గా లేని వారివి డ్రా లో వేయకముందే తిరస్కరించారు. మరి వీరి దరఖాస్తు లో అన్ని పత్రాలు సరిగ్గా ఉన్నందునే డ్రాలో వేశారని మున్నీ తెలిపారు. ఇప్పుడు ఎలా ఇల్లు రాలేదని చెబుతారని వాపోయారు.
