కేపీహెచ్బీ కాలనీ, జనవరి 13 : కేపీహెచ్బీ కాలనీలో ప్రభుత్వ ఉన్నత పాఠశాల నిర్మాణానికి రంగం సిద్ధమైంది. కూకట్పల్లి హౌసింగ్బోర్డు ఆవిర్భవించి సుమారు 45 ఏండ్లు కావస్తున్నది. కాలనీలో 15 ఫేజ్లలో ఎల్ఐజీలు, ఎంఐజీలు, హెచ్ఐజీలు, ఎల్ఐజీ గృహ సముదాయాలు ఉండగా రెండు లక్షలకు పైగా జనాభా నివసిస్తున్నది. ఇంతటి ప్రాధాన్యత కలిగిన కేపీహెచ్బీ కాలనీలో విద్యార్థులు చదువుకునేందుకు ఒక ప్రాథమికోన్నత పాఠశాల, రెండు ప్రాథమిక పాఠశాలలు ఉండగా సుమారు 1500 మంది విద్యార్థులు ప్రభుత్వ పాఠశాలల్లో చదువుతున్నారు. ఏడో తరగతి దాటి చదవాలంటే విద్యార్థులంతా కూకట్పల్లి, హైదర్నగర్ గ్రామాలలోని ఉన్నత పాఠశాలలకు వెళ్లాల్సి ఉంది. ఎన్నో ఏళ్లుగా సాకారం కాని ఉన్నత పాఠశాల కళ నేడు నిర్మాణ పనులకు శంకుస్థాపన జరుగనున్నది. నేడు మేడ్చల్ జిల్లా కలెక్టర్ హరీశ్, కూకట్పల్లి ఎమ్మెల్యే మాధవరం కృష్ణారావు, శేరిలింగంపల్లి ఎమ్మెల్యే అరెకపూడి గాంధీ, ఎమ్మెల్సీ కుర్మయ్యగారి నవీన్కుమార్, కేపీహెచ్బీ కాలనీ కార్పొరేటర్ మందడి శ్రీనివాస్రావు చేతుల మీదుగా కేపీహెచ్బీ కాలనీలో ఎన్టీఆర్ ప్రభుత్వ ఉన్నత పాఠశాల పనులకు శంకుస్థాపన చేయనున్నారు.
కాలనీ నడిబొడ్డున..
కేపీహెచ్బీ కాలనీ 3వ ఫేజ్లో ఎల్ఐజీ గృహ సముదాయాల మధ్య.. జలమండలికి చెందిన ఖాళీ స్థలంలో రేకుల షెడ్డులలో ప్రభుత్వ ప్రాథమిక (భువనవిజయం) పాఠశాల కొనసాగుతున్నది. ఈ ప్రభుత్వ పాఠశాల సమీపంలోనే (రమ్యాగ్రౌండ్)లో హౌసింగ్బోర్డు లేఔట్ ప్రకారం పాఠశాల నిర్మాణం కోసం కేటాయించిన స్థలం ఖాళీగా ఉంది. ఈ స్థలంలో ఉన్నత పాఠశాల శాశ్వత భవనాన్ని నిర్మించాలన్న లక్ష్యంతో.. ఎమ్మెల్యే మాధవరం కృష్ణారావు, కార్పొరేటర్ మందడి శ్రీనివాస్రావు ముందుకొచ్చారు. ప్రభుత్వ ఉన్నత పాఠశాల భవనానికి దివంగత ముఖ్యమంత్రి నందమూరి తారకరామారావు పేరు పెడితే.. సొంతంగా ఒకకోటి రూపాయల నిధులు ఇవ్వడానికి కేపీహెచ్బీ కాలనీ కార్పొరేటర్ మందడి శ్రీనివాస్రావు సిద్ధమని ప్రకటించారు. కూకట్పల్లి ఎమ్మెల్యే మాధవరం కృష్ణారావు కూడా ఎమ్మెల్యే నిధుల నుంచి ఒకకోటి రూపాయలు పాఠశాల భవన నిర్మాణానికి కేటాయించారు. ఈ ప్రతిపాదనను రాష్ట్రమంత్రి కేటీఆర్, విద్యాశాఖ అధికారుల దృష్టికి తీసుకెళ్లి.. కేపీహెచ్బీ కాలనీలో ఎన్టీఆర్ పేరుతో ఉన్నత పాఠశాల నిర్మాణానికి అనుమతులు తెచ్చారు. అన్ని కాలనీలకు అందుబాటులో కేపీహెచ్బీ కాలనీ నడిబొడ్డున ప్రభుత్వ ఉన్నత పాఠశాల నిర్మాణానికి మోక్షం లభించడంతో స్థానికులు హర్షం వ్యక్తం చేస్తున్నారు.
ఎమ్మెల్యే కృష్ణారావు స్ఫూర్తితో..
పేద విద్యార్థుల కోసం ఎమ్మెల్యే కృష్ణారావు అందిస్తున్న సేవల స్ఫూర్తితో.. ప్రభుత్వ ఉన్నత పాఠశాల నిర్మాణం కోసం కోటి రూపాయల విరాళం ఇవ్వడానికి ముందుకొచ్చాను. ఉమ్మడి రాష్ట్ర ముఖ్యమంత్రిగా, సినీ నటుడుగా స్వర్గీయ నందమూరి తారకరామారావు తెలుగు ప్రజల్లో చెరగని ముద్రవేశారు. ఎన్నో చరిత్రాత్మక మార్పులకు శ్రీకారం చుట్టిన ఎన్టీఆర్ స్ఫూర్తితోనే రాజకీయాల్లోకి వచ్చాను. ఆ మహనీయుడి పేరుతో ఉన్నత పాఠశాలను నిర్మించడానికి ప్రభుత్వం సహకరించడం గొప్ప విషయం.
– మందడి శ్రీనివాస్రావు, కార్పొరేటర్, కేపీహెచ్బీ కాలనీ