Common Pass | కామన్‌ పాస్‌ ధరలు తగ్గించిన ప్ర‌భుత్వం

కామన్‌ పాస్‌ ధరలపై కాంగ్రెస్‌ సర్కార్‌ యూటర్న్‌ తీసుకున్నది. ప్రయాణికుల నుంచి ఎదురైన విముఖత, అభ్యర్థనలతో హైదరాబాద్‌ మెట్రో రైలు, ఆర్టీసీ బస్సుల కామన్‌ పాస్‌ ధరను సగానికి పైగా తగ్గించింది.

హైద‌రాబాద్ : కామన్‌ పాస్‌ ధరలపై కాంగ్రెస్‌ సర్కార్‌ యూటర్న్‌ తీసుకున్నది. ప్రయాణికుల నుంచి ఎదురైన విముఖత, అభ్యర్థనలతో హైదరాబాద్‌ మెట్రో రైలు, ఆర్టీసీ బస్సుల కామన్‌ పాస్‌ ధరను సగానికి పైగా తగ్గించింది. రాష్ట్ర రవాణా శాఖ మంత్రి పొన్నం ప్రభాకర్‌ తెలిపారు. ఈ మేరకు ఆయన ‘ఎక్స్‌’లో పోస్ట్‌ చేశారు. ప్రస్తుతం రూ.400గా ఉన్న రోజువారీ ఉమ్మడి ప్రయాణ పాస్ ధరను రూ.275కు తగ్గించాం. ఇందులో రూ.200 మెట్రో ప్రయాణానికి, రూ.75 ఆర్టీసీ ప్రయాణానికి కేటాయించాం. ఈ పాస్ ద్వారా రోజుకు 4 సింగిల్ జర్నీలకు అనుమతి ఉంటుంది.

ప్రస్తుతం రూ.8,500గా ఉన్న నెలవారీ ఉమ్మడి ప్రయాణ పాస్ ధరను ఏకంగా రూ.4,000కు తగ్గించాం. ఇందులో రూ.3,000 మెట్రో ప్రయాణానికి, రూ.1,000 ఆర్టీసీ ప్రయాణానికి కేటాయించాం. ఈ పాస్ ద్వారా నెలలో గరిష్ఠంగా 50 రౌండ్ ట్రిప్పులకు అనుమతి ఉంటుందన్నారు. ఈ ధరల తగ్గింపుతో నెలవారీ ఉమ్మడి ప్రయాణ పాస్ వినియోగదారులకు రూ.4,500 ఆదా అవుతుంది. రోజువారీ ఉమ్మడి పాస్ వినియోగదారులకు రూ.125 ఆదా అవుతుంది. ప్రభుత్వం ప్రకటించిన తగ్గింపు ధరలు నవంబర్ 8 నుంచి అమల్లోకి వస్తాయన్నారు.