వేధింపులపై మౌనం వీడండి

ఆన్‌లైన్‌, ఆఫ్‌లైన్‌ ఎక్కడైనా, ఎప్పుడైనా యువతులు, మహిళలను వేధిస్తే షీ టీమ్స్‌కు ఫిర్యాదు చేయాలని రాచకొండ ఉమెన్‌ సేఫ్టీ వింగ్‌ డీసీపీ ఉషారాణి సూచించారు. జూలై నెలలో 127 ఫిర్యాదులు అందాయని, ఆయా కేసులకు సంబంధించి 50 మంది పోకిరీలకు కుటుంబ సభ్యుల సమక్షంలో గురువారం రాచకొండ సీపీ క్యాంప్‌ కార్యాలయం ప్రాంగణలో ఉన్న షీ టీమ్స్‌ కార్యాలయంలో కౌన్సెలింగ్‌ నిర్వహించారు.

• మీ కోసం షీ టీమ్స్‌ అండగా ఉంటాయి
• 50 మంది పోకిరీలకు కౌన్సెలింగ్‌
• నెల రోజుల్లో 127 ఫిర్యాదులు
• రాచకొండ మహిళా భద్రత డీసీపీ ఉషారాణి

సిటీబ్యూరో, ఆగస్టు 24 (నమస్తే తెలంగాణ): ఆన్‌లైన్‌, ఆఫ్‌లైన్‌ ఎక్కడైనా, ఎప్పుడైనా యువతులు, మహిళలను వేధిస్తే షీ టీమ్స్‌కు ఫిర్యాదు చేయాలని రాచకొండ ఉమెన్‌ సేఫ్టీ వింగ్‌ డీసీపీ ఉషారాణి సూచించారు. జూలై నెలలో 127 ఫిర్యాదులు అందాయని, ఆయా కేసులకు సంబంధించి 50 మంది పోకిరీలకు కుటుంబ సభ్యుల సమక్షంలో గురువారం రాచకొండ సీపీ క్యాంప్‌ కార్యాలయం ప్రాంగణలో ఉన్న షీ టీమ్స్‌ కార్యాలయంలో కౌన్సెలింగ్‌ నిర్వహించారు. ఈ సందర్భంగా ఆమె మాట్లాడుతూ.. బస్టాండ్‌, రైల్వే, మెట్రో స్టేషన్లు, స్కూళ్లు, కాలేజీలు, బహిరంగ ప్రదేశాలలో మఫ్టీలో తిరుగుతూ.. డెకాయి ఆపరేషన్లు చేస్తున్నామన్నారు. మొదటిసారి తప్పుచేసి చిక్కిన పోకిరీలకు తల్లిదండ్రుల సమక్షంలో కౌన్సెలింగ్‌ ఇస్తున్నామని, తప్పు పునరావృతమైతే కోర్టులో హాజరుపరుస్తున్నామన్నారు. జూలై నెలలో వచ్చిన ఫిర్యాదులలో వాట్సాప్‌ (25), ఇతర సోషల్‌ మీడియా యాప్స్‌(30), నేరుగా వేధించిన కేసులు 24 ఉండగా.. ఇతర మార్గాల ద్వారా వేధింపులపై వచ్చిన కేసులు 28 ఉన్నాయన్నారు. ఇందులో క్రిమినల్‌ కేసులు(18), పెటీ కేసులు 15 కాగా.. 94 కౌన్సెలింగ్‌ కేసులు ఉన్నాయన్నారు.

కొన్ని ఘటనలు

• హయత్‌నగర్‌ ప్రాంతంలో ఒక మహిళ.. హన్మ నాయక్‌కు చెందిన ఆటో ఎక్కి తన గమ్య స్థానానికి చేరుకుంది. ఆటో కిరాయిని ఫోన్‌ పే ద్వారా చెల్లించింది. దీంతో ఆమె నంబర్‌ను తీసుకున్న హన్మ నాయక్‌ ఆమెను నిత్యం ఫోన్‌లో వేధించి.. ఒకరోజు సరాసరి ఆమె ఇంటికి వెళ్లాడు. ఇంటి వద్దకు వచ్చాను.. బయటకు రావాలంటూ డిమాండ్‌ చేశాడు. బయపడ్డ బాధితురాలు తలుపు తీయకపోవడంతో కిటికీ అద్దాలు పగలగొట్టి పరారయ్యాడు. దీనిపై బాధితురాలు షీ టీమ్స్‌ను ఆశ్రయించడంతో వెంటనే హయత్‌నగర్‌ పోలీసు స్టేషన్‌లో కేసు నమోదు చేయించి, నిందితుడిని అరెస్టు చేశారు.
• చిన్న కొండూరు గ్రామం స్కూల్‌లో చౌటుప్పల్‌ షీ టీమ్స్‌ సిబ్బంది అవగాహన కార్యక్రమం నిర్వహిస్తున్నారు. ఈ సందర్భంగా ఐదుగరు విద్యార్థినులు షీ టీమ్స్‌ను సంప్రదించారు. తాము ప్రతిరోజు సైకిల్‌పై స్కూల్‌కు వస్తున్నామని, ఇద్దరు పోకిరీలు నంబర్‌ లేని బైక్‌పై వచ్చి తమను వేధిస్తున్నారంటూ ఫిర్యాదు చేశారు. దీంతో షీ టీమ్స్‌ డెకాయి ఆపరేషన్‌ నిర్వహించి, ఆ పోకిరీలను పట్టుకున్నారు.
• హయత్‌నగర్‌ ప్రాంతంలో నివాసముండే ఒక అవివాహిత ప్రైవేట్‌ ఉద్యోగం చేస్తుంది. ఆమె తోటి ఉద్యోగి కొంత కాలంగా ఆమెను ప్రేమ పేరుతో వేధిస్తున్నాడు. తనను ప్రేమించకపోతే ఫొటోలు మార్ఫింగ్‌ చేసి ఇంటర్‌నెట్‌లో పెడుతానంటూ బ్లాక్‌మెయిల్‌ చేయడంతో బాధితురాలు షీ టీమ్స్‌ను ఆశ్రయించింది.

మౌనం వీడండి

మహిళల పట్ల భౌతిక దాడులు, లైంగిక వేధింపులు, ప్రయాణ సమయాల్లో, పనిచేసే చోట వేధింపులు ఉంటే వెంటనే షీ టీమ్స్‌ను ఆశ్రయించాలని డీసీపీ సూచించారు. పురుషులు సాటి మహిళల పట్ల బాధ్యతగా, మర్యాదగా నడుచుకోవాలని, వారికి అండగా నిలువాలని సూచించారు. ఈ కౌన్సెలింగ్‌ కార్యక్రమంలో ఏసీపీ నరేందర్‌ గౌడ్‌ పాల్గొన్నారు.