గచ్చిబౌలి టు కొండాపూర్‌

గచ్చిబౌలి జంక్షన్‌ నుంచి కొండాపూర్‌ వరకు నిర్మిస్తున్న ఫ్లైఓవర్‌ నిర్మాణ పనుల కారణంగా వాహనదారులకు ఇబ్బందులు తలెత్తకుండా సైబరాబాద్‌ ట్రాఫిక్‌ పోలీసులు దాదాపు 11 ప్రత్యామ్నాయ మార్గాలను ఏర్పాటు చేశారు.

• 11 ప్రత్యామ్నాయ మార్గాలు
• కొత్త ఫ్లైఓవర్‌ నిర్మాణంతో ఇబ్బందులు తలెత్తకుండా చర్యలు
• క్షేత్రస్థాయిలో పర్యటించినసైబరాబాద్‌ జాయింట్‌ సీపీ నారాయణ్‌ నాయక్‌

సిటీబ్యూరో, మే 22 (నమస్తే తెలంగాణ): గచ్చిబౌలి జంక్షన్‌ నుంచి కొండాపూర్‌ వరకు నిర్మిస్తున్న ఫ్లైఓవర్‌ నిర్మాణ పనుల కారణంగా వాహనదారులకు ఇబ్బందులు తలెత్తకుండా సైబరాబాద్‌ ట్రాఫిక్‌ పోలీసులు దాదాపు 11 ప్రత్యామ్నాయ మార్గాలను ఏర్పాటు చేశారు. ఫ్లైఓవర్‌ నిర్మాణ పనుల నేపథ్యంలో గచ్చిబౌలి జంక్షన్‌ నుంచి కొండాపూర్‌ వరకు ఈనెల 13న రహదారిని పూర్తిగా మూసివేసిన విషయం తెలిసిందే. ఈ నిర్మాణ పనులు దాదాపు మూడు నెలల పాటు కొనసాగనుండటంతో వాహనదారులకు ఇబ్బందులు తలెత్తకుండా తగిన చర్యలు తీసుకున్నట్లు సైబరాబాద్‌ జాయింట్‌ సీపీ(ట్రాఫిక్‌) నారాయణ్‌ నాయక్‌ తెలిపారు. సోమవారం జీహెచ్‌ఎంసీ అధికారులతో కలిసి ఆయన ప్రధాన జంక్షన్‌లను పరిశీలించారు. ఈ సందర్భంగా ఆయన వాహనదారులకు పలు సూచనలు జారీచేశారు.

ఇలా వెళ్లండి..

• ఓఆర్‌ఆర్‌ నుంచి హఫీజ్‌పేట్‌ వైపు వచ్చే వాహనాలను గచ్చిబౌలి జంక్షన్‌ మీదుగా దారిమళ్లించి, శిల్ప లేఅవుట్‌ ఫె్లైఓవర్‌- మీనాక్షి టవర్స్‌ – డెలాయిట్‌ -ఏఐజీ హాస్పిటల్‌ – క్యూ మార్ట్‌ – కొత్తగూడ ఫె్లైఓవర్‌- హాఫీజ్‌పేట్‌ వైపు వెళ్లే విధంగా ఏర్పాటు చేశారు.
• లింగంపల్లి నుంచి కొండాపూర్‌ వైపు వచ్చే వాహనాలను గచ్చిబౌలి ట్రాఫిక్‌ పీఎస్‌ – డీఎల్‌ఎఫ్‌ రోడ్‌ – రాడిసన్‌ హోటల్‌ – కొత్తగూడ మీదుగా -కొండాపూర్‌ వైపు అనుమతిస్తారు.
• విప్రో జంక్షన్‌ నుంచి ఆల్విన్‌ ఎక్స్‌ రోడ్డు వైపు వచ్చే వాహనాలను ఐఐటీ జంక్షన్‌ వద్ద దారి మళ్లించి.. అక్కడి నుంచి ఎడమ మలుపు తీసుకుని, గచ్చిబౌలి స్టేడియం వద్ద యూ టర్న్‌ – డీఎల్‌ఎఫ్‌ రోడ్‌ – రాడిసన్‌ హోటల్‌ – కొత్తగూడ ఆల్విన్‌ ఎక్స్‌ రోడ్డు వైపు అనుమతిస్తారు.
• టోలిచౌకి నుంచి ఆల్విన్‌ ఎక్స్‌ రోడ్డు వైపు వచ్చే వాహనాలను బయో డైవర్సిటీ ఫె్లైఓవర్‌ – మైండ్‌స్పేస్‌ జంక్షన్‌ వద్ద దారి మళ్లించి, సైబర్‌ టవర్స్‌ జంక్షన్‌ – హైటెక్స్‌ సిగ్నల్స్‌ ఎడమవైపు – కొత్తగూడ జంక్షన్‌ మీదుగా అనుమతిస్తారు.
• టెలికాం నగర్‌ నుంచి కొండాపూర్‌ వైపు వచ్చే వాహనాలను గచ్చిబౌలి ఫె్లై ఓవర్‌ కింద యూ- టర్న్‌ దగ్గర దారి మళ్లించి, బస్‌ స్టాప్‌ పకన శిల్ప లేఅవుట్‌ ఫె్లైఓవర్‌ – మీనాక్షి టవర్స్‌ – డెలాయిట్‌ – ఏఐజీ హాస్పిటల్‌ – క్యూ మార్ట్‌ – కొత్తగూడ ఫె్లైఓవర్‌ నుంచి అనుమతిస్తారు.
• ఆల్విన్‌ X రోడ్‌ నుంచి గచ్చిబౌలి వైపు వచ్చే వాహనాలను కొత్తగూడ జంక్షన్‌ వద్ద దారి మళ్లించి, హైటెక్స్‌ రోడ్డు- సైబర్‌ టవర్‌ – మైండ్‌స్పేస్‌ జంక్షన్‌, శిల్ప లేఅవుట్‌ ఫె్లైఓవర్‌ – గచ్చిబౌలి / ఓఆర్‌ఆర్‌ వైపు అనుమతిస్తారు.
• ఆల్విన్‌ ఎక్స్‌ రోడ్డు నుంచి లింగంపల్లి వైపు వచ్చే వాహనాలను బొటానికల్‌ గార్డెన్‌ జంక్షన్‌ వద్ద దారి మళ్లించి, మసీదుబండ – హెచ్‌సీయు డిపో – లింగంపల్లి మీదుగా అనుమతిస్తారు.
• కూకట్‌పల్లి నుంచి ఫైనాన్షియల్‌ డిస్ట్రిక్ట్‌ వెళ్లాల్సిసిన వారు సైబర్‌ టవర్స్‌ మీదుగా – ఐకియా అండర్‌ పాస్‌ -బయో డైవర్సిటీ రైట్‌ టర్న్‌- గచ్చిబౌలి మీదుగా వెళ్లాల్సి ఉంటుంది. అదే క్రమంలో ఫైనాన్షియల్‌ డిస్ట్రిక్‌ నుంచి కూకట్‌పల్లి వెళ్లాల్సిన వారు అదే మార్గంలో రివర్స్‌ వెళ్లాల్సి ఉంటుంది.
• టీ-హబ్‌ రోడ్లను ఉపయోగించుకునే విధంగా కేబల్‌ బ్రిడ్జ్‌ -కోహినూర్‌ హోటల్‌ – తంగేడు రెస్టారెంట్‌ -ఖాజాగుడ వైపు అనుమతిస్తారు. అదే విధంగా రివర్స్‌ ట్రాఫిక్‌ను సైతం అదే మార్గంలో అనుమతిస్తారు.
• ఐకియా రోటరీ వద్ద మూడు యూ టర్న్‌లను సీ-గేట్‌ వద్ద, ఎన్‌సీసీ ముందు.. అలాగే ఐకియా స్టోర్‌ వద్ద ఇవ్వడం జరిగింది. రోటరీ జంక్షన్‌ చిన్నదిగా కావటం వలన ట్రాఫిక్‌ లాక్‌ కాకుండా ఈ విధమైన ఏర్పాట్లు చేయటం జరిగింది.
• హైటెక్స్‌ వద్ద యూ టర్న్‌ ఏర్పాటు చేసి టెక్‌ మహేంద్ర, లెమన్‌ ట్రీ హోటల్‌ మీదుగా ట్రాఫిక్‌ రెండు వైపులా వెళ్లే విధంగా ఏర్పాటు చేశారు.