Visit:
Hyderabad | బంజారాహిల్స్‌, మే 23: గర్భవతి అయిన భార్యకు సాయంగా ఉండేందుకు వచ్చిన బాలికపై కన్నేశాడో ప్రబుద్ధుడు. ప్రేమిస్తున్నానని ఆమెకు మాయమాటలు చెప్పి లోబరచుకున్నాడు. ఆమెపై పలుమార్లు లైంగిక దాడికి పాల్పడడమే కాకుండా.. ఇంటి నుంచి కూడా తీసుకెళ్లిపోయాడు. బాలిక తల్లి ఫిర్యాదు మేరకు విచారణ చేపట్టిన బంజారాహిల్స్‌ పోలీసులు నిందితుడిని అరెస్టు చేసి రిమాండ్‌కు తరలించారు.
వివరాల్లోకి వెళ్తే.. హైదరాబాద్‌ లంగర్‌హౌజ్‌ ప్రాంతానికి చెందిన కార్తీక్ (34) ప్రైవేటు కంపెనీలో ఉద్యోగం చేస్తున్నాడు. అతని భార్య గర్భవతిగా ఉన్నప్పుడు సాయం చేసేందుకు బంజారాహిల్స్‌కు చెందిన దూరపు బంధువైన బాలిక (17) వచ్చింది. ఆ సమయంలో ప్రేమిస్తున్నానని మాయమాటలు చెప్పి బాలికను కార్తీక్ లోబరచుకున్నాడు. గత కొన్ని నెలలుగా బాలికపై పలుమార్లు లైంగికంగా దాడికి పాల్పడ్డాడు. ఈ క్రమంలో రెండు నెలల క్రితం బంజారాహిల్స్‌లోని బాలిక నివాసం నుంచి ఆమెను తీసుకొని వెళ్లాడు. ఈ వ్యవహారంపై బాలిక తల్లి బంజారాహిల్స్‌ పోలీసులకు ఫిర్యాదు చేయగా మిస్సింగ్‌ కేసు నమోదు చేసుకుని దర్యాప్తు చేపట్టారు.
ఉమ్మడి మహబూబ్‌నగర్‌ జిల్లాలోని బంధువుల ఇంటికి బాలికను కార్తీక్ తీసుకెళ్లినట్లుగా బంజారాహిల్స్‌ పోలీసులు గుర్తించి హైదరాబాద్‌కు తీసుకొచ్చారు. బాలిక ఇచ్చిన వాంగ్మూలం మేరకు కార్తీక్ మీద పోక్సో కింద కేసు నమోదు చేశారు. ఈ మేరకు నిందితుడిని శుక్రవారం అరెస్టు చేసి రిమాండ్‌కు తరలించారు.
