Visit:
కాచిగూడ,నవంబర్‌ 30: సైబర్‌ నేరగాళ్లు కొత్త తరహ నేరాలకు పాల్పడుతున్నారని, ప్రజలు అప్రమత్తంగా ఉండాలని ఈస్ట్‌జోన్‌ అడిషనల్‌ డీసీపీ నర్సయ్య సూచించారు. కాచిగూడ సీఐ తల్లోజు జ్యోత్స్న ఆధ్వర్యంలో ఆదివారం రాత్రి గోకుల్‌ధామ్‌ అపార్ట్‌మెంట్‌లో సైబర్‌ నేరాలపై అవగాహన సదస్సును నిర్వహించారు. అనంతరం అడిషనల్‌ డీసీపీ నర్సయ్య మాట్లాడుతూ అపరిచిత వ్యక్తులు ఆర్థిక పరమైన లావాదేవీలకు సంబంధించిన వివరాలు పోన్‌లో అడిగితే ఎట్టి పరిస్థితుల్లో స్పందించవద్దని కోరారు.
సైబర్‌ నేరగాళ్లు సరికొత్త రకం మోసాలకు పాల్పడున్నారని, విద్యుత్‌ బిల్లు కట్టలేదని, మీ ఫోన్‌కు ఓటీపీ వస్తుందని,అనంతరం మీ బ్యాంక్‌ ఖాతా ఖాళీ చేస్తారన్నారు. బ్యాంకు రుణాలు ఇప్పిస్తానని ప్రకటించుకునే మోసపూరితమైన యాప్‌లను నమ్మవద్దని కోరారు. ఈజీగా డబ్బులు వస్తాయంటే ఎవరు నమ్మవద్దని, అపరిచిత వ్యక్తులు ఫోన్‌ చేసిన.. మేసేజ్‌లు పంపినా 8712660540లో సమాచారం అందించాలని విజ్ఞప్తి చేశారు. ఈ కార్యక్రమంలో ఏసీపీ వై.హరీశ్‌కుమార్‌, డీఐ మల్లేశం, అడ్మిన్‌ ఎస్సై నరేశ్‌, ఎస్సైలు,సిబ్బంది పాల్గొన్నారు.
