Delmicron | డెల్మిక్రాన్‌.. డెల్టా, ఒమిక్రాన్ కంటే ఇది ప్ర‌మాద‌క‌ర‌మా?

December 24, 2021 / 04:42 PM IST

Delmicron | ఒమిక్రాన్‌ భయాలు ఒకవైపు కొనసాగుతుండగానే.. ‘డెల్మిక్రాన్‌’ పేరిట మరో కొత్త రూపాంతరం చాప కింద నీరులా విస్తరిస్తున్నది. అమెరికా, బ్రిటన్‌లో రోజుకు సగటున లక్షకు పైగా కేసులు నమోదవ్వడానికి ఈ కొత్త వేరియంట్‌ కూడా కారణమని అనుమానాలు వ్యక్తమవుతున్నాయి.

ఏమిటీ డెల్మిక్రాన్‌?

కరోనా వేరియంట్లు డెల్టా, ఒమిక్రాన్‌ కలయికతో ఏర్పడినదే ‘డెల్మిక్రాన్‌’. డెల్టా, ఒమిక్రాన్‌తో పోలిస్తే, ఇది మరింత వేగంగా వ్యాపిస్తున్నట్టు అంచనా వేస్తున్నారు. ‘డెల్మిక్రాన్‌లో రెండు స్పైక్‌ ప్రొటీన్లు ఉన్నాయి. ఒకటి డెల్టాది కాగా, మరొకటి ఒమిక్రాన్‌ది’ అని కొవిడ్‌-19 కట్టడికి మహారాష్ట్ర ప్రభుత్వం ఏర్పాటు చేసిన టాస్క్‌ఫోర్స్‌ సభ్యుడు డాక్టర్‌ శశాంక్‌ జోషి తెలిపారు. డెల్టా, ఒమిక్రాన్‌తో పోలిస్తే.. డెల్మిక్రాన్‌ మరింత వేగంగా వ్యాపిస్తున్నట్టు అనుమానం వ్యక్తం చేశారు. అమెరికా, ఐరోపాలో కేసుల పెరుగుదలకు కొత్త వేరియంటే కారణమని అంచనా వేశారు.

ప్రభావం ఎలా ఉండనున్నది?

దేశంలో బీభత్సం సృష్టించిన కరోనా సెకండ్‌ వేవ్‌కు ముఖ్య కారణం డెల్టా వేరియంట్‌. అయితే, డెల్టాతో పోలిస్తే ఒమిక్రాన్‌ వ్యాప్తి ఎక్కువగా, వేగంగా ఉన్నప్పటికీ ప్రభావం మాత్రం అంతగా లేదు. అయితే, డెల్టా, ఒమిక్రాన్‌ వేరియంట్ల స్పైక్‌ ప్రొటీన్లతో ఏర్పడిన ‘డెల్మిక్రాన్‌’ ప్రభావం ఎలా ఉండబోతున్నదన్న విషయం ఇప్పుడే చెప్పలేమని నిపుణులు తెలిపారు.

దేశంలో డెల్మిక్రాన్‌ వ్యాపించిందా?

ప్రస్తుతం దేశవ్యాప్తంగా దాదాపు 300 ఒమిక్రాన్‌ కేసులు నమోదయ్యాయి. దీనికి తోడు రోజువారీ సగటు కరోనా కేసులు 7 వేలుగా రికార్డవుతున్నాయి. ఇందులో డెల్టా కేసులు కూడా ఉన్నాయి. అంటే దేశంలో రెండు వేరియంట్ల ప్రభావం ఏకకాలంలో ఉన్నదని, ఈ లెక్కన ‘డెల్మిక్రాన్‌’ కేసులు రికార్డు అయ్యే అవకాశం లేకపోలేదని నిపుణులు అనుమానం వ్యక్తం చేస్తున్నారు.