Visit:
Ovarian Cancer | అండాశయ క్యాన్సర్లో చికిత్సకు ప్రతిస్పందించని క్లిష్టమైన కేసుల చికిత్సలో కొత్త ఆశలు కనిపిస్తున్నాయి. ముఖ్యంగా ప్లాటినమ్ ఆధారిత కీమోథెరపీకి స్పందించని అండాశయ క్యాన్సర్ రోగుల కోసం అభివృద్ధి చేసిన మిర్వెటక్సిమాబ్ సోరవ్టాన్సిన్ అనే లక్ష్యిత ఔషధాన్ని వైద్యరంగంలో కీలక పురోగతిగా భావిస్తున్నారు. పరిశోధనల ప్రకారం ఈ మందు రోగుల జీవనకాలాన్ని పెంచడమే కాకుండా వ్యాధి పురోగతిని నెమ్మదింపజేసి, కణతుల పరిమాణాన్ని తగ్గించి, జీవన నాణ్యతను కూడా మెరుగుపరుస్తుంది. దశాబ్దాలుగా ప్లాటినమ్-రెసిస్టెంట్ అండాశయ క్యాన్సర్తో బాధపడుతున్న మహిళలకు చికిత్సా అవకాశాలు చాలా పరిమితంగా ఉండేవి. సాధారణంగా ఉపయోగించే ప్లాటినమ్ ఆధారిత కీమోథెరపీ పనిచేయడం ఆగిపోయిన తర్వాత రోగులకు లభించే చికిత్సల వల్ల స్వల్ప ప్రయోజనాలే కనిపించేవి. ఈ నేపథ్యంలో ఎలాహేర్ అనే బ్రాండ్ పేరుతో అందుబాటులో ఉన్న మిర్వెటక్సిమాబ్ సోరవ్టాన్సిన్ వైద్య నిపుణుల దృష్టిని ఆకర్షిస్తోంది.
సాంప్రదాయ కీమోథెరపీ ఆరోగ్యకరమైన కణాలు, క్యాన్సర్ కణాలను రెండింటినీ ప్రభావితం చేస్తుంది. అయితే మిర్వెటక్సిమాబ్ సోరవ్టాన్సిన్ ప్రత్యేకంగా క్యాన్సర్ కణాలపై ఉన్న ఫోలేట్ రిసెప్టర్-ఆల్ఫా అనే ప్రోటీన్ను లక్ష్యంగా చేసుకుని పనిచేస్తుంది. ఈ కారణంగా ఆరోగ్యకరమైన కణాలపై ప్రభావం తగ్గి, క్యాన్సర్ కణాలపై నేరుగా ఔషధ ప్రభావం చూపిస్తుంది. ఈ ఔషధం యాంటీబాడీ-డ్రగ్ కాంజుగేట్ (ఏడీసీ) అనే ఆధునిక చికిత్సల వర్గానికి చెందుతుంది. ఇందులో లక్ష్యిత యాంటీబాడీతోపాటు శక్తివంతమైన క్యాన్సర్ నిరోధక ఔషధాన్ని కలిపి తయారు చేస్తారు. ముందుగా యాంటీబాడీ క్యాన్సర్ కణాన్ని గుర్తించి దానితో అనుసంధానమవుతుంది. అనంతరం ఔషధాన్ని నేరుగా కణితిలోకి చేరవేసి క్యాన్సర్ కణాన్ని నాశనం చేస్తుంది. ఈ చికిత్స ప్రధానంగా ఫోలేట్ రిసెప్టర్-ఆల్ఫా అధికంగా ఉన్న ఎపితీలియల్ అండాశయ క్యాన్సర్, ఫాలోపియన్ ట్యూబ్ క్యాన్సర్ లేదా ప్రైమరీ పెరిటోనియల్ క్యాన్సర్తో బాధపడుతూ, ప్లాటినమ్ ఆధారిత కీమోథెరపీకి స్పందించని మహిళలకు పనిచేస్తుంది.
ప్రపంచ ఆరోగ్య సంస్థ (WHO) ప్రకారం అండాశయ క్యాన్సర్ ప్రపంచవ్యాప్తంగా అత్యంత ప్రమాదకరమైన స్త్రీల జననేంద్రియ క్యాన్సర్లలో ఒకటిగా మారింది. లక్షణాలు స్పష్టంగా కనిపించకపోవడం వల్ల చాలా సందర్భాల్లో దీన్ని ముదిరిన దశలోనే గుర్తిస్తున్నారు. చికిత్సకు స్పందన తగ్గిన తర్వాత రోగుల పరిస్థితి మరింత క్లిష్టంగా మారుతుంది. మిర్వెటక్సిమాబ్ సోరవ్టాన్సిన్ ప్రభావాన్ని అంచనా వేసేందుకు నిర్వహించిన మూడో దశ మిరాసోల్ క్లినికల్ ట్రయల్లో 450 మందికిపైగా మహిళలు పాల్గొన్నారు. ఫోలేట్ రిసెప్టర్-ఆల్ఫా పాజిటివ్, ప్లాటినమ్-రెసిస్టెంట్ అండాశయ క్యాన్సర్ ఉన్న రోగులపై ఈ అధ్యయనం చేపట్టారు. ఇందులో కొత్త ఔషధాన్ని సాధారణ కీమోథెరపీతో పోల్చి పరిశీలించారు. పరిశోధన ఫలితాల ప్రకారం మిర్వెటక్సిమాబ్ సోరవ్టాన్సిన్ తీసుకున్న రోగుల సగటు జీవనకాలం సుమారు 16.5 నెలలకు చేరుకుంది. సాధారణ కీమోథెరపీ తీసుకున్న వారిలో ఇది సుమారు 12.8 నెలలుగా నమోదైంది. అలాగే వ్యాధి పురోగతి లేకుండా గడిచిన కాలం సగటున 5.6 నెలలు ఉండగా, కీమోథెరపీ గ్రూపులో అది నాలుగు నెలల వరకు మాత్రమే కనిపించింది.
అలాగే ఈ ఔషధం వాడిన రోగుల్లో కణితుల పరిమాణం గణనీయంగా తగ్గినట్లు పరిశోధకులు గుర్తించారు. మరణ ప్రమాదం కూడా కీమోథెరపీతో పోలిస్తే దాదాపు మూడింట ఒక వంతు మేర తగ్గినట్లు వెల్లడైంది. ఈ ఫలితాల నేపథ్యంలో అనేక దేశాల ఆరోగ్య నియంత్రణ సంస్థలు ఈ చికిత్సకు ఆమోదం తెలుపుతున్నాయి. క్యాన్సర్ రోగులకు ఎక్కువ కాలం జీవించడం మాత్రమే కాకుండా జీవన నాణ్యత కూడా ఎంతో ముఖ్యమైంది. మిరాసోల్ అధ్యయనంలో పాల్గొన్న మహిళల అభిప్రాయాల ఆధారంగా చేసిన విశ్లేషణలో మిర్వెటక్సిమాబ్ సోరవ్టాన్సిన్ తీసుకున్నవారిలో శారీరక సామర్థ్యం, రోజువారీ పనులు నిర్వహించే సామర్థ్యం, లక్షణాల నియంత్రణ మెరుగుపడినట్లు గుర్తించారు. తీవ్రమైన దుష్ప్రభావాలు కూడా తక్కువగా కనిపించినట్లు పరిశోధకులు వెల్లడించారు.
అయితే ఈ ఔషధానికి కొన్ని దుష్ప్రభావాలు కూడా ఉన్నాయి. వికారం, అలసట, చూపు మసకబారడం, కంటి సమస్యలు ముఖ్యంగా కనిపిస్తాయి. కంటి కార్నియాపై ప్రభావం చూపే కెరటోపతి వంటి సమస్యలు తలెత్తే అవకాశం ఉండడంతో చికిత్స సమయంలో క్రమం తప్పకుండా కంటి పరీక్షలు చేయించుకోవాలని నిపుణులు సూచిస్తున్నారు. దేశంలోనూ అండాశయ క్యాన్సర్ ఒక ప్రధాన ప్రజారోగ్య సమస్యగా ఉంది. అయితే ఈ కొత్త చికిత్స అందుబాటు, ధర, నియంత్రణ అనుమతులకు సంబంధించిన అంశాలు ఇంకా కీలకంగా ఉన్నాయి. నిపుణుల అభిప్రాయం ప్రకారం ఈ ఔషధం ప్రయోజనం పొందగలిగే రోగులను గుర్తించేందుకు బయోమార్కర్ పరీక్షలు, ముఖ్యంగా ఫోలేట్ రిసెప్టర్-ఆల్ఫా పరీక్షలు మరింత విస్తృతంగా అందుబాటులోకి రావాల్సిన అవసరం ఉంది. మిర్వెటక్సిమాబ్ సోరవ్టాన్సిన్ పూర్తిస్థాయి నివారణ మందు కాకపోయినా, ప్లాటినమ్-రెసిస్టెంట్ అండాశయ క్యాన్సర్ చికిత్సలో గత రెండు దశాబ్దాలుగా వచ్చిన అత్యంత ముఖ్యమైన పురోగతుల్లో ఒకటిగా వైద్య నిపుణులు భావిస్తున్నారు. రోగుల జీవనకాలాన్ని పెంచడం, వ్యాధి పురోగతిని ఆలస్యం చేయడం, కణితులను తగ్గించడం, జీవన నాణ్యతను మెరుగుపరచడం వంటి బహుముఖ ప్రయోజనాలతో ఈ ఔషధం అండాశయ క్యాన్సర్ చికిత్స విధానాన్ని మార్చే అవకాశముందని వారు చెబుతున్నారు.
