Ear Problems | వివిధ శరీర అంగాల మాదిరిగానే చెవులు కూడా మన జీవితంలో ముఖ్య భూమికను పోషిస్తాయి. చెవులను శుభ్రం చేసుకోవడం పట్ల మనలో చాలా మంది శ్రద్ధ చూపరనడంలో ఎలాంటి సందేహం లేదు. స్నానం చేసిన తర్వాత బయటి చెవులను తుడుచుకోవడం మినహా మరే ప్రత్యేక శ్రద్ధ కనబర్చం. చెవులు వినిపించడం మానేయగానే అప్పుడు బాధపడుతుంటాం. వివిధ పరికరాలను వాడుతుండటం, జీవనశైలి అలవాట్లు పెరుగుతుండటం వల్ల చెవి సమస్యలు వస్తుంటాయని చాలా మంది గుర్తించరు. అందుకని చెవులు వినిపించడం మానుకోక ముందే వాటి ఆరోగ్యంపై ప్రత్యేక శ్రద్ధ చూపాల్సిన అవసరం ఉన్నది.
ఆల్కహాల్
మద్యం ఎక్కువగా తాగేవాళ్లు కొంచెం జాగ్రత్తగా ఉండాలి. మెదడు ధ్వనిని, ముఖ్యంగా తక్కువ ఫ్రీక్వెన్సీ శబ్దాలను ఆల్కహాల్ ప్రభావితం చేస్తుంది. ఇది చెవి లోపల ద్రవాల తీరును మార్చుతుంది. ఫలితంగా అసమతుల్యత, మైకం కమ్మడం, వినికిడి లోపానికి దారితీస్తుంది. ఆల్కహాల్ చెవిలో ఎక్కువ రక్తప్రవాహం జరిగేలా చేస్తుంది. చెవి ఇన్ఫెక్షన్, టిన్నిటస్, మైనం ఎక్కువగా ఉత్పత్తయ్యేందుకు దారితీస్తుంది.
ధూమపానం
సిగరెట్ స్మోకింగ్ ఊపిరితిత్తులు, గుండె, నోటి ఆరోగ్యాన్ని మాత్రమే కాకుండా చెవులను కూడా ప్రభావితం చేస్తుంది. సిగరెట్లో ఉండే ప్రమాదకరమైన రసాయనాలు ( ఫార్మల్డిహైడ్, బెంజీన్, ఆర్సెనిక్, వినైల్ క్లోరైడ్, అమ్మోనియా, హైడ్రోజన్ సైనైడ్) వినికిడిని ప్రభావితం చేస్తాయి. చెవిలోని హెయిర్ కణాలను దెబ్బతీస్తుంది. ధూమపానం మధ్య చెవిలో ఒత్తిడి పెరగడానికి కూడా కారణమవుతుంది. దీని ఫలితంగా చెవిలో గులిమి ఎక్కువగా తయారై వినికిడి లోపం, ఇన్ఫెక్షన్లు వస్తాయి.
హెడ్ఫోన్లు / ఇయర్బడ్లు
ఎక్కువ సమయంపాటు హెడ్ఫోన్లు, ఇయర్బడ్లు వినియోగించే అలవాటు మనవారిలో ఎక్కువగా ఉంటుంది. ఈ అలవాటు చాలా ప్రమాదకరం. అవి వినికిడికి హాని కలిగించే పెద్ద శబ్దాలను చెవుల్లోకి పంపడం వల్ల చెవుల్లోని కణాలు దెబ్బతింటాయి. ఈ కణాలు ధ్వని తరంగాలను విద్యుత్ ప్రేరణలుగా మార్చి మెదడుకు పంపడంలో సహకరిస్తాయి. ఈ కణాలు ప్రభావితమైనప్పుడు ఈ ప్రక్రియకు తీవ్ర అంతరాయం ఏర్పడి వినికిడి లోపం సమస్యకు దారితీయవచ్చు.
క్లీనింగ్
కాటన్ బడ్స్, ఇయర్ క్యాండిల్స్ లేదా ఇతర పనిముట్లను ఉపయోగించి చెవులను శుభ్రం చేయడం వల్ల ఇవి చెవి నుంచి మైనం సహజ మార్గాన్ని నిరోధించే అవకాశాలు ఉంటాయి. చెవిలో గులిమిని కూడా కాలువలోకి నెట్టేయవచ్చు. అక్కడ గులిమి ఇరుక్కుపోయి కర్ణభేరికి వ్యతిరేకంగా నొక్కడం వల్ల వినికిడి సమస్యలు వస్తుంటాయి.
పర్యావరణం
దుమ్ము పేరుకుపోయే అవకాశం ఉన్న ప్రదేశంలో నివసించడం లేదా పని చేసే వారి చెవిలోని ఇయర్వాక్స్ ఈ మురికి కణాలను ఎక్కువగా ట్రాప్ చేస్తుంది. దాంతో పెద్ద మొత్తంలో గులిమి ఉత్పత్తి అయి వినికిడి సమస్యలను తీసుకొస్తుంది.
కుటుంబ చరిత్ర
చెవి ఆరోగ్యంలో జన్యుశాస్త్రం కూడా పాత్ర పోషిస్తుందని గుర్తించాలి. అందుకని తల్లిదండ్రులు ఇయర్వాక్స్ సమస్యలను ఎదుర్కొన్నట్లయితే.. కుటుంబసభ్యులకు కూడా అలాంటి సమస్యలు వచ్చే అవకాశాలు ఉంటాయి.
వయస్సు
మనం పెద్దయ్యాక చెవుల్ని స్వయంగా శుభ్రపరుచుకోవడం కూడా పని చేయకపోవచ్చు. ఇయర్వాక్స్ పొడిగా మారడం ప్రారంభమవుతుంది. గులిమి కుదించబడి చెవి కాలువలో చిక్కుకునే అవకాశం ఎక్కువగా ఉంటుంది.
ఇన్ఫెక్షన్స్
చెవుల్లో వచ్చే చిన్నపాటి ఇన్ఫెక్షన్లను కూడా మనం నిర్లక్ష్యం చేయొద్దు. ఇన్ఫెక్షన్ తీవ్రమైనప్పుడు మాత్రమే మనం దానిపై దృష్టిపెడతాం. ఈ దశలో విషయాలు సంక్లిష్టంగా మారతాయి. బ్యాక్టీరియల్ ఇన్ఫెక్షన్ుల లోపలి చెవిలోని హెయిర్ కణాలను దెబ్బతీస్తాయి. కాలక్రమేణా ఈ ఇన్ఫెక్షన్ లోపలి, మధ్య చెవిని దెబ్బతినేలా చేస్తుంది. అందుకని ఏ చిన్న ఇన్ఫెక్షన్ కనిపించినా వెంటనే చికిత్స తీసుకోవడం ద్వారా ప్రమాదాలను నివారించుకునే వీలుంటుంది.
ఎక్సర్సైజ్
నిశ్చలంగా జీవించే వారు ఎక్కువగా బరువు పెరగడం, ఊబకాయులుగా మారుతుంటారు. దీని కారణంగా మధుమేహం, గుండె జబ్బులు వంటి అనేక ఇతర ఆరోగ్య సమస్యలు సంభవిస్తుంటాయి. ఈ పరిస్థితులు రక్త ప్రవాహాన్ని దెబ్బతీస్తాయి. ఇది చివరకు వినికిడిపై ప్రభావం చూపుతుంది. దీన్ని నివారించేందుకు నిత్యం వ్యాయామం చేయడం అలవాటు చేసుకోవాలి. శరీరం ఆరోగ్యకరమైన బరువు ఉండేలా చూసుకోవాలి.
వృత్తిపరమైన ప్రమాదాలు
పెద్ద శబ్దాలకు గురయ్యే ప్రదేశాల్లో పనిచేసే వ్యక్తుల్లో కూడా వినికిడి ప్రభావితమయ్యే అవకాశం ఉంది. నిర్మాణ, తయారీ కేంద్రాల్లోని ఉపయోగించే యంత్రాల నుంచి వచ్చే పెద్ద శబ్దాలు అక్కడ పనిచేసే వారి చెవులపై ప్రభావం చూపుతాయి. అందుకని పెద్ద శబ్దం వచ్చే వాతావరణంలో పనిచేసే వ్యక్తులు తమను తాము రక్షించుకోవడానికి ఇయర్ కవర్లతో సహా భద్రతా పరికరాలను ఉపయోగించడం శ్రేయస్కరం.
గమనిక: ఈ కథనం కేవలం పాఠకుల అవగాహన కోసమే అందిస్తున్నాం. ఇది అర్హత కలిగిన వైద్య అభిప్రాయానికి ప్రత్యామ్నాయం కాదు. మరింత సమాచారం కోసం ఎల్లప్పుడూ వైద్య నిపుణుడిని లేదా ఇంటి వైద్యుడిని సంప్రదించండి. ఈ కథనంతో ‘నమస్తే తెలంగాణ’ యాజమాన్యం ఎలాంటి బాధ్యత వహించదు.