అల్లం పొడిని ముక్కులో వేసుకుంటే క‌రోనా రాదా? ఇందులో నిజ‌మెంత‌?

January 12, 2022 / 07:50 PM IST

అల్లం వంటింట్లో ఉండే దివ్యౌష‌ధం. దీన్ని రోజూ ఆహారంగా తీసుకోవ‌డం వ‌ల్ల రోగ నిరోధ‌క శ‌క్తి పెరుగుతుంది. ముఖ్యంగా అల్లంలో ఉండే జింజెరోల్ వ‌ల్ల ద‌గ్గు, జ‌లుబు, గొంతునొప్పి వంటి స‌మ‌స్య‌లు ద‌రి చేర‌వు. అందుకే పూర్వ‌కాలం నుంచి ప్ర‌తిరోజూ మ‌నం తినే ఆహారంలో అల్లం ఉండేలా జాగ్ర‌త్తలు తీసుకుంటున్నారు. అల్లం మీద మ‌న‌కు ఉన్న ఈ న‌మ్మ‌కాన్ని క్యాష్ చేసుకుంటూ సోష‌ల్ మీడియాలో ఇప్పుడు ఒక వార్త చ‌క్క‌ర్లు కొడుతుంది. అల్లాన్ని పొడిగా చేసి.. రోజుకు రెండుసార్లు ముక్కు ద్వారా పీల్చుకుంటే క‌రోనా అంత‌మైపోతుంద‌ని ఒక వీడియో ఇప్పుడు వైర‌ల్‌గా మారింది.

రోజుకు రెండుసార్లు త‌ను అల్లం పొడిని ముక్కులో వేసుకుంటున్నాన‌ని ఓ వ్య‌క్తి ఆ వీడియోలో తెలిపాడు. అంతేకాదు త‌న‌కు తెలిసిన వారికి కూడా ఇలాగే అల్లం పొడి ప్యాకెట్లు ఇచ్చాన‌ని పేర్కొన్నాడు. క‌రోనా, ఒమిక్రాన్ వేరియంట్ కేసులు పెరుగుతున్న ఈ స‌మ‌యంలో ఈ వీడియో తెగ వైర‌ల్‌గా మారింది. రెండు నిమిషాల నిడివి ఉన్న ఈ వీడియోను నెటిజ‌న్లు విపరీతంగా షేర్ చేస్తున్నారు. ఆ వీడియోలో ఉన్న‌ది ప్ర‌ముఖ ప‌ల్మ‌నాల‌జిస్ట్ డాక్ట‌ర్ జ‌రీర్ ఉద్వాదియా అని పేర్కొంటున్నారు. కానీ ఆ వీడియోలో చెప్పిన‌దంతా అబ‌ద్ధ‌మేన‌ని ప్ర‌ముఖ న్యూస్ వెబ్‌సైట్ పరిశోధ‌న‌లో వెల్ల‌డైంది. ఈ వార్త‌లో నిజానిజాల‌ను తెలుసుకునేందుకు డాక్ట‌ర్ జ‌రీర్ ఉద్వాదియాను క‌లిసిన‌ప్పుడు.. ఆ వీడియోలో ఉన్న వ్య‌క్తి ఆయ‌న కాద‌ని తెలిసింది. ఇక ముక్కు ద్వారా అల్లం పొడిని పీల్చుకుంటే క‌రోనా రాద‌ని చెప్ప‌డానికి ఎలాంటి శాస్త్రీయ ఆధారాలు లేవ‌ని లంగ్ కేర్ ఫౌండేష‌న్ ఫౌండ‌ర్ డాక్ట‌ర్ అర‌వింద్ కుమార్ స్ప‌ష్టం చేశారు. అంతేకాదు అలా ముక్కులో అల్లం పొడిని వేసుకోవ‌డం ప్ర‌మాద‌మ‌ని హెచ్చ‌రించారు.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి