Visit:
White Spots On Nails | మ‌న శరీరంలో ఏవైనా వ్యాధులు వ‌స్తే వెంట‌నే బ‌య‌ట ప‌డ‌వు. ముందుగా వాటి తాలూకు ల‌క్ష‌ణాలు కొన్నింటిని శ‌రీరం బ‌య‌ట పెడుతుంది. ఏ అనారోగ్య స‌మ‌స్య వ‌చ్చినా స‌రే ముందుగా మ‌న శ‌రీరం దాని లక్షణాలను మ‌న‌కు తెలియజేస్తుంది. ఈ క్ర‌మంలో ఆయా లక్షణాలను మ‌నం ముందుగానే గుర్తిస్తే వ్యాధి తీవ్ర‌త పెర‌గ‌కుండా, ప్రాణాంత‌కం అవ‌కుండా ముందుగానే చికిత్స తీసుకుని జాగ్ర‌త్త‌గా ఉండ‌వ‌చ్చు. ఇక మ‌న శరీరంలో పలు ర‌కాల పోష‌కాల లోపం ఉన్నా కూడా శ‌రీరం లక్షణాలను తెలియజేస్తుంది. క‌నుక ఏవైనా ల‌క్ష‌ణాలు క‌నిపిస్తే వెంట‌నే వ్యాధి నిర్దార‌ణ‌కు రాకుండా ముందుగా డాక్ట‌ర్‌ను క‌లిసి ప‌రీక్ష‌లు చేయించుకుని అవ‌స‌రం అయితే అప్పుడు మందుల‌ను వాడాలి. అంతేకానీ సొంతంగా వైద్యం చేసుకోకూడ‌దు. ఇక మ‌న శ‌రీరం తెలియజేసే అనేక ల‌క్షణాల్లో చేతి వేళ్ల గోర్లపై తెల్ల‌ని మ‌చ్చ‌లు ఏర్ప‌డ‌డం కూడా ఒక‌టి. ఈ మ‌చ్చ‌లు ఏర్ప‌డేందుకు పోష‌కాల లోపంతోపాటు పలు వ్యాధులు ఉండ‌డం కూడా కార‌ణాలు అవుతాయి. క‌నుక దేని వ‌ల్ల ఈ మ‌చ్చ‌లు ఏర్ప‌డ్డాయో తెలుసుకోవ‌డం మంచిది.
చాలా మందికి అప్పుడ‌ప్పుడు చేతి వేళ్ల‌కు చెందిన గోర్లపై తెల్ల‌ని మ‌చ్చ‌లు ఏర్ప‌డుతుంటాయి. కొందిరికి ఇవి మ‌చ్చ‌ల్లా ఏర్ప‌డితే కొందరికి తెల్ల‌ని గీత‌ల్లా ఏర్ప‌డుతాయి. అయితే ఎలా ఏర్ప‌డినా ఈ మ‌చ్చ‌లు క‌నిపిస్తే మాత్రం అస‌లు నిర్ల‌క్ష్యం చేయ‌కూడ‌దు. కొందరికి ఈ తెల్ల‌ని మ‌చ్చ‌లు చిన్న‌గా ఉంటే, కొందరికి వెడ‌ల్పుగా ఏర్ప‌డుతాయి. అలాగే కొందరికి త‌క్కువ సంఖ్య‌లో తెల్ల‌ని మ‌చ్చ‌లు ఏర్ప‌డితే, కొందరికి అధికంగా ఈ మ‌చ్చ‌లు క‌నిపిస్తాయి. చేతి వేళ్ల‌కు చెందిన గోర్లపై ఇలా తెల్ల‌ని మ‌చ్చ‌లు లేదా గీత‌లు ఏర్ప‌డ‌డాన్ని లుకోనైకియా అంటారు. ఇది వాస్త‌వానికి అత్యంత స‌హ‌జ‌సిద్ధ‌మైందిగా చెబుతారు. దీని గురించి అంత కంగారు ప‌డాల్సిన అవ‌స‌రం లేద‌ని వైద్యులు అంటున్నారు. చేతి వేళ్ల గోర్లపై తెల్ల‌ని మ‌చ్చ‌లు ఏర్ప‌డేందుకు అనేక కార‌ణాలు ఉంటాయి. కొంద‌రు నెయిల్ పెయింట్‌ల‌ను ఎక్కువ‌గా వాడుతుంటారు. లేదా బ్యూటీ పార్ల‌ర్ల‌లో గోర్ల‌కు చికిత్స తీసుకుంటారు. ఇలా మ‌హిళ‌లు అధికంగా చేస్తారు. క‌నుక వారి గోర్లపై ఇలా తెల్ల‌ని మ‌చ్చ‌లు ఏర్ప‌డే అవ‌కాశాలు ఎక్కువ‌గా ఉంటాయి. వారు పాటించే బ్యూటీ టిప్స్‌లో ఉప‌యోగించే రసాయ‌నాలు ప‌డ‌క‌పోతే ఇలా జ‌రుగుతుంది.
చేతి వేళ్ల గోర్ల‌కు దెబ్బ‌లు త‌గిలినా, ఫంగ‌స్ ఇన్‌ఫెక్ష‌న్లు ఏర్ప‌డినా అలా గోర్లపై తెల్ల‌ని మ‌చ్చ‌లు క‌నిపిస్తుంటాయి. క‌నుక మీకు దెబ్బ‌లు తాకినా, గాయాలు అయినా లేదా ఇన్ ఫెక్ష‌న్లు వ‌చ్చినా అందుకు అనుగుణంగా చికిత్స తీసుకోవాల్సి ఉంటుంది. దీంతో గోర్లపై ఉండే తెల్ల‌ని మ‌చ్చ‌లు సైతం వాటంత‌ట అవే తొల‌గిపోతాయి. ఇక కొంద‌రు మహిళలకు నెయిల్ పాలిష్‌లు ప‌డ‌వు. అలాంటి వారికి అల‌ర్జీలు వస్తాయి. క‌నుక వారి గోర్లపై కూడా అప్పుడ‌ప్పుడు ఇలా తెల్ల‌ని మ‌చ్చ‌లు ఏర్ప‌డే అవ‌కాశాలు ఉంటాయి. అలాగే గుండె జ‌బ్బులు ఉన్న‌వారికి, నోటి దుర్వాస‌న వ‌స్తున్న‌వారికి, కిడ్నీలు ఫెయిల్ అయిన వారికి, సోరియాసిస్‌, ఎగ్జిమా, న్యుమోనియా వంటి వ్యాధులు ఉన్న‌వారికి కూడా చేతి వేళ్ల గోర్లపై తెల్ల‌ని మ‌చ్చ‌లు వస్తాయి.
కొన్ని సంద‌ర్భాల్లో మ‌నం తినే ఆహారం ఫుడ్ పాయిజ‌నింగ్ అవుతుంది. ఆర్సెనిక్ పాయిజ‌నింగ్ గ‌నక జ‌రిగితే అప్పుడు కూడా ఇలాగే గోర్లపై తెల్ల‌ని మ‌చ్చ‌లు వస్తాయి. ఇక ఇవ‌న్నీ కార‌ణాలు కాక‌పోతే క‌చ్చితంగా జింక్ లోపించింద‌ని అర్థం చేసుకోవాలి. జింక్ మ‌న శ‌రీరానికి కావ‌ల్సిన మిన‌ర‌ల్స్‌లో ఒక‌టి. మ‌న శరీరంలో జింక్ లోపం ఉన్నా లేదా జింక్ ను త‌గినంత‌గా తీసుకోక‌పోయినా ఇలా కొందరికి అప్పుడ‌ప్పుడు చేతి వేళ్ల గోర్లపై తెల్ల‌ని మ‌చ్చ‌లు వ‌స్తుంటాయి. క‌నుక పైన చెప్పిన వ్యాధులు కార‌ణాలు కాక‌పోతే అలాంటి వారు క‌చ్చితంగా జింక్ లోపం ఉంద‌ని గ్ర‌హించాలి. వెంట‌నే జింక్ ఉండే ఆహారాల‌ను తినాలి. జింక్ మ‌న‌కు ఎక్కువ‌గా చేప‌లు, రొయ్య‌లు, మ‌ట‌న్‌, కోడిగుడ్లు, పాలు, చీజ్‌, గుమ్మ‌డి విత్త‌నాలు, పొద్దు తిరుగుడు విత్త‌నాలు, అవిసె గింజ‌లు, చియా సీడ్స్‌, బాదంప‌ప్పు, జీడిపప్పు, వాల్ న‌ట్స్‌, పిస్తా వంటి వాటిలో ల‌భిస్తుంది. క‌నుక వీటిని తీసుకుంటే జింక్ స‌రిగ్గా ల‌భిస్తుంది. అప్పుడు గోర్లపై ఉండే తెల్ల‌ని మ‌చ్చ‌లు సైతం తొల‌గిపోతాయి. క‌నుక ఈ స‌మ‌స్య‌కు స‌రైన కార‌ణం దొరికితే క‌చ్చితంగా ప‌రిష్కారం ల‌భిస్తుంది.
