Visit:
Belching | తిన్న ఆహారం స‌రిగ్గా జీర్ణం అవ‌క‌పోతే అప్పుడు ఏర్ప‌డే ప‌రిస్థితిని అజీర్తి అంటార‌న్న విష‌యం అంద‌రికీ తెలిసిందే. అజీర్తి సమస్య ఉన్న‌వారికి త్రేన్పులు కూడా అధికంగానే వ‌స్తుంటాయి. అజీర్తి కార‌ణంగా పొట్ట‌లో గ్యాస్ ఏర్ప‌డుతుంది. ఇది త్రేన్పుల‌కు కార‌ణం అవుతుంది. ఇక త్రేన్పులు వ‌చ్చేందుకు ప‌లు ఇత‌ర కార‌ణాలు కూడా ఉంటాయి. అజీర్తి సమస్య లేక‌పోయినా కొంద‌రికి విప‌రీత‌మైన గ్యాస్ త‌యార‌వుతుంది. అలాంటి వారికి కూడా త్రేన్పులు వ‌స్తాయి. అలాగే కొన్ని ర‌కాల ఆహారాల‌ను తీసుకోవ‌డం వల్ల కూడా కొంద‌రికి పొట్ట‌లో గ్యాస్ త‌యారై త్రేన్పులు వ‌స్తుంటాయి. అయితే ఇది సాధార‌ణ స‌మ‌స్యే. ఇందుకు ఇంగ్లిష్ మెడిసిన్ల‌ను వాడాల్సిన ప‌నిలేదు. మ‌న ఇంట్లో ఉండే ప‌దార్థాల‌తోనే ప‌లు స‌హ‌జ‌సిద్ధ‌మైన చిట్కాల‌ను పాటించ‌డం వల్ల త్రేన్పుల సమస్య ఇట్టే త‌గ్గిపోతుంది. పైగా జీర్ణ వ్యవస్థ సైతం ఆరోగ్యంగా ఉంటుంది.
త్రేన్పుల సమస్య అధికంగా ఉన్న‌వారు ప‌చ్చి అరటి కాయ‌ల‌ను తింటుంటే ఎంత‌గానో ఉప‌యోగం ఉంటుంది. ప‌చ్చి అర‌టికాయ‌ను తీసుకుని అందులో పావు వంతు ముక్క‌ను క‌ట్ చేయాలి. దాన్ని పొట్టు తీసి తినాలి. ఇలా పూట‌కు ఒక‌సారి తినాల్సి ఉంటుంది. దీని వల్ల జీర్ణ వ్యవస్థ ఆరోగ్యంగా ఉంటుంది. త్రేన్పులు త‌గ్గిపోతాయి. గ్యాస్ సమస్య నుంచి సైతం ఉప‌శ‌మ‌నం ల‌భిస్తుంది. అలాగే త్రేన్పుల స‌మ‌స్య‌ను త‌గ్గించేందుకు ల‌వంగాలు కూడా బాగానే ప‌నిచేస్తాయి. భోజ‌నం చేసిన త‌రువాత ఒక ల‌వంగాన్ని నోట్లో వేసుకుని బాగా న‌మిలి మింగాలి. దీని వల్ల సమస్య తొల‌గిపోతుంది. అదేవిధంగా రోజుకు 2 సార్లు ఒక గ్లాస్ చొప్పున కొబ్బ‌రినీళ్ల‌ను తాగుతున్నా కూడా ఈ సమస్య త‌గ్గుతుంది. ఇక త్రేన్పుల సమస్య ఉన్న‌వారు ఒక టీస్పూన్ వాము, అంతే మోతాదులో మిరియాల‌ను తీసుకుని క‌లిపి దంచాలి. ఆ మిశ్ర‌మంలో కొద్దిగా తేనె క‌లిపి రోజుకు 2 సార్లు తీసుకోవాలి. ఇలా చేస్తున్నా కూడా త్రేన్పులు త‌గ్గుతాయి.
త్రేన్పులు ఉన్న‌వారు ప‌లు ఆహారాల‌ను తీసుకుంటున్నా కూడా ఉప‌యోగం ఉంటుంది. ఈ స‌మ‌స్య‌కు అల్లం అద్భుతంగా ప‌నిచేస్తుంది. భోజ‌నానికి ముందు 1 టీస్పూన్ అల్లం ర‌సం సేవించాలి. ఇలా రోజుకు 3 పూట‌లా తీసుకోవాలి. అలాగే భోజ‌నం చేసిన అనంతరం గుప్పెడు సోంపు గింజ‌ల‌ను నోట్లో వేసుకుని బాగా న‌మిలి మింగాలి. అదేవిధంగా పుదీనా ఆకుల‌ను తింటున్నా కూడా ఉప‌యోగం ఉంటుంది. పుదీనా ఆకుల ర‌సాన్ని ఒక టీస్పూన్ మోతాదులో తీసుకుని దాన్ని ఒక గ్లాస్ మ‌జ్జిగ‌లో క‌లిపి సేవిస్తుండాలి. అదేవిధంగా క‌మోమిల్ టీ కూడా ఈ స‌మ‌స్య‌కు బాగానే ప‌నిచేస్తుంది. క‌మోమిల్ టీని రోజుకు 2 సార్లు తాగుతుంటే త్రేన్పుల సమస్య నుంచి ఉప‌శ‌మ‌నం ల‌భిస్తుంది. ఈ టీలో ఉండే యాంటీ ఇన్ ఫ్లామేట‌రీ గుణాలు త్రేన్పులను త‌గ్గిస్తాయి.
త్రేన్పుల సమస్య ఉన్న‌వారు తేలిగ్గా జీర్ణం అయ్యే ఆహారాల‌ను తినాలి. కారం, మ‌సాలాలు అధికంగా ఉండే ఆహారాలు, నూనె ప‌దార్థాలు, జంక్ ఫుడ్స్‌ను తిన‌కూడ‌దు. పెరుగు, మ‌జ్జిగ‌ను ఎక్కువ‌గా తీసుకోవాల్సి ఉంటుంది. ఇవి ప్రో బ‌యోటిక్ ఆహారాలు క‌నుక వీటిని తీసుకుంటే జీర్ణ వ్య‌వ‌స్థ‌లో మంచి బ్యాక్టీరియా వృద్ధి చెందుతుంది. ఇది జీర్ణ స‌మస్య‌ల‌ను త‌గ్గించి జీర్ణ వ్య‌వ‌స్థ‌ను ఆరోగ్యంగా ఉంచుతుంది. అలాగే త్రేన్పుల సమస్య ఉన్న‌వారు ఆహారాన్ని నెమ్మ‌దిగా తినాలి. బాగా న‌మిలి మింగాలి. త్వ‌ర‌గా తింటే సమస్య త‌గ్గ‌దు. ఆహారం తినేట‌ప్పుడు ఫోన్ లేదా టీవీ చూడ‌డం, పేప‌ర్ చ‌ద‌వ‌డం, మాట్లాడ‌డం వంటి ప‌నులు చేయ‌కూడ‌దు. బ‌య‌ట ఏవైనా పానీయాల‌ను తాగితే స్ట్రాను ఉప‌యోగించ‌కూడ‌దు. మ‌ద్యం సేవించ‌డం, పొగ తాగ‌డం మానేయాలి. ఇలా త్రేన్పులు ఉన్న‌వారు ఆయా చిట్కాల‌ను పాటిస్తూ ఆయా ఆహారాల‌ను తీసుకుంటుంటే ఈ స‌మ‌స్య‌ను సుల‌భంగా త‌గ్గించుకోవ‌చ్చు. అలాగే జీర్ణ వ్యవస్థ సైతం ఆరోగ్యంగా ఉంటుంది.
