Visit:
Cold | సాధార‌ణంగా చాలా మందికి సీజ‌న్లు మారిన‌ప్పుడు లేదా వాతావ‌ర‌ణం మ‌రీ చ‌ల్ల‌గా ఉన్న‌ప్పుడు ముక్కు ప‌ట్టేసి ద‌గ్గు, జలుబు వంటి స‌మ‌స్య‌లు వ‌స్తుంటాయి. అయితే ద‌గ్గు అంత సుల‌భంగా రాకున్నా జలుబు మాత్రం చేస్తుంది. దీంతో తీవ్ర‌మైన ఇబ్బంది క‌లుగుతుంది. జలుబు వ‌చ్చిన వారికి ఏ ప‌నిచేయాల‌నిపించ‌దు. చాలా అవ‌స్థ‌గా ఉంటుంది. అయితే జలుబు చేసిన వారు మెడిక‌ల్ షాపుకు వెళ్లి మందుల‌ను తెచ్చి వేసుకుంటారు. దీంతో జలుబు నుంచి ఉప‌శ‌మ‌నం ల‌భిస్తుంది. కానీ దీర్ఘ‌కాలంలో ఇలా మందుల‌ను త‌ర‌చూ వాడ‌డం మంచిది కాదు. క‌నుక జ‌లుబును స‌హ‌జ‌సిద్ధంగానే త‌గ్గించుకోవాల్సి ఉంటుంది. జలుబు త‌గ్గేందుకు స‌హ‌జ‌సిద్ధ‌మైన చిట్కాల‌ను వాడితే జలుబు మ‌ళ్లీ చేసే అవ‌కాశాలు చాలా త‌క్కువ‌గా ఉంటాయి. క‌నుక జలుబు త‌గ్గేందుకు స‌హ‌జ‌సిద్ధ‌మైన చిట్కాలు అద్భుతంగా ప‌నిచేస్తాయి. ఈ క్ర‌మంలోనే ఎప్పుడు జలుబు చేసినా ఈ చిట్కాల‌ను అనుస‌రించాల్సి ఉంటుంద‌ని ఆయుర్వేద వైద్యులు చెబుతున్నారు.
50 గ్రాముల బెల్లానికి ఒక‌టిన్న‌ర టీస్పూన్ వామును క‌లిపి మెత్త‌గా నూరి రెండు గ్లాసుల నీటిలో వేసి బాగా మరిగించాలి. ఆ మిశ్ర‌మాన్ని ఒక గ్లాస్ అయ్యాక స్ట‌వ్ మీద నుంచి దించి చ‌ల్లారిన త‌రువాత వ‌డ‌క‌ట్టి రెండు పూట‌లా తాగితే జలుబు మాయ‌మ‌వుతుంది. అలాగే న‌ల్ల జీల‌క‌ర్ర‌ను కొద్దిగా తీసుకుని శుభ్ర‌మైన వ‌స్త్రంలో మూట‌క‌ట్టి అప్పుడ‌ప్పుడు కొద్దిగా న‌లుపుతూ వాస‌న పీలుస్తుంటే ముక్కు దిబ్బడ త్వ‌ర‌గా త‌గ్గుతుంది. అలాగే జలుబు నుంచి సైతం ఉప‌శ‌మ‌నం ల‌భిస్తుంది. దాల్చిన చెక్క, ప‌సుపు, జాప‌త్రి, ల‌వంగాల‌ను స‌మానంగా తీసుకుని బాగా నూరి అందులో తేనె క‌లిపి పూట‌కు ఒక టీస్పూన్ చొప్పున తీసుకుంటే జలుబు త్వ‌ర‌గా త‌గ్గుతుంది. అలాగే శొంఠి క‌షాయాన్ని రాత్రి ప‌డుకునే ముందు పావు క‌ప్పు చొప్పున తాగితే జలుబు నుంచి వెంట‌నే ఉప‌శ‌మ‌నం ల‌భిస్తుంది.
సాంబ్రాణి పువ్వును వ‌స్త్రంలో చుట్టి మూట క‌ట్టి అప్పుడ‌ప్పుడు వాస‌న పీల్చినా జలుబు త‌గ్గుతుంది. అలాగే మిరియాలు, అల్లం, తుల‌సి ఆకుల‌ను స‌మాన భాగాల్లో తీసుకుని బాగా నూరి వీటితో క‌షాయం కాచి పూట‌కు పావు క‌ప్పు చొప్పున నిత్యం 3 పూట‌లా తీసుకోవాలి. దీంతో జ‌లుబును త‌గ్గించుకోవ‌చ్చు. అదేవిధంగా చిన్న క‌ర‌క్కాయ‌లు, తెల్ల క‌విరి స‌మానంగా తీసుకుని బాగా క‌లిపి నూరి ఉడికించాలి. ముక్కు పైన ప‌ట్టులా వేయాలి. దీంతో జలుబు త‌గ్గుతుంది. మంచి గంధాన్ని వాస‌న చూస్తే తుమ్ములు త‌గ్గుతాయి. కొత్తిమీర వాస‌న చూసినా తుమ్ములు త‌గ్గుతాయి. అలాగే కొత్తిమీర ఆకుల ర‌సంలో కాస్త తేనె క‌లిపి తాగుతున్నా కూడా జలుబు నుంచి ఉప‌శ‌మ‌నం పొంద‌వ‌చ్చు.
జలుబు నుంచి ఉప‌శ‌మ‌నం పొందేందుకు ప‌లు ఆహారాలు కూడా మేలు చేస్తాయి. జలుబు బాగా ఉన్న‌వారు శాకాహారులు అయితే వెజిట‌బుల్ సూప్‌ను తాగాలి. అదే నాన్ వెజ్ తినేవారు అయితే చికెన్ సూప్‌ను తాగాలి. దీని వ‌ల్ల గొంతు, ఊపిరితిత్తుల్లో ఉండే కఫం క‌రిగిపోతుంది. దీంతో జలుబు నుంచి త్వ‌ర‌గా ఉప‌శ‌మ‌నం ల‌భిస్తుంది. అలాగే మిరియాల పొడిని పాల‌లో క‌లిపి రోజుకు మూడు సార్లు ఒక క‌ప్పు చొప్పున తాగుతుండాలి. ఇది కూడా జలుబు త‌గ్గేలా చేస్తుంది. జలుబు అధికంగా ఉన్న‌వారు యాపిల్‌, పైనాపిల్‌, బొప్పాయి, దానిమ్మ వంటి పండ్ల‌ను తింటుంటే ఉప‌యోగం ఉంటుంది. మిరియాల‌తో చారు చేసి కూడా తిన‌వ‌చ్చు. ఇలా జలుబు త‌గ్గేందుకు ఆయా చిట్కాలు ఎంతో మేలు చేస్తాయి.
