coronavirus instructions : కరోనా నుంచి కోలుకున్నారా? ఈ జాగ్రత్తలు పాటించండి

coronavirus instructions | కరోనా సోకకుండా జాగ్రత్తలు తీసుకోవడం ఎంత అవసరమో.. కరోనా నుంచి కోలుకున్న తర్వాత కూడా జాగ్రత్తలు తీసుకోవడం అంతే ముఖ్యం.

May 4, 2021 / 10:14 PM IST

coronavirus instructions : కరోనా నుంచి కోలుకున్నారా? ఈ జాగ్రత్తలు పాటించండి

coronavirus instructions : ఇప్పుడు క‌రోనా అంద‌ర్నీ వ‌ణికిస్తుంది ! కరోనా బారిన పడకుండా ఉండేందుకు ఇప్పటికే దాదాపు అందరూ జాగ్రత్తలు తీసుకుంటున్నారు. అయితే కరోనా సోకకుండా జాగ్రత్తలు తీసుకోవడం ఎంత అవసరమో.. కరోనా బారిన పడినప్పుడు, వైరస్‌ నుంచి కోలుకున్న తర్వాత కూడా అంతే జాగ్రత్తలు తీసుకోవడం అంతే ముఖ్యం. కొవిడ్‌-19 సోకిన‌ప్పుడు శారీరకంగానే కాకుండా మానసికంగానూ దాని ప్రభావం ఉంటుంది. కరోనా వైరస్‌ నుంచి తొందరగానే కోలుకున్నా.. ఆ భయం తాలుకూ ఎఫెక్ట్‌ నుంచి మానసికంగా కోలుకోవాలంటే చాలా రోజులే పడుతుంది. కాబట్టి కరోనా నుంచి కోలుకున్న తర్వాత శారీరకంగానే కాకుండా మానసికంగానూ దృఢంగా ఉండటం చాలా అవసరం. ఇందుకోసం ఎలాంటి జాగ్రత్తలు తీసుకోవాలో ఇప్పుడు చూద్దాం..

సాధార‌ణంగా ఉండే భ‌యాలు

క‌రోనా బారిన పడినప్పుడు చాలా భయాలు మనల్ని చుట్టేస్తాయి. ముఖ్యంగా ఆర్థికంగా, ఉద్యోగపరంగా చాలామంది ఇబ్బందులను ఎదుర్కోవాల్సి వస్తుందని భయపడిపోతుంటారు.
కరోనా సోకినప్పుడు ఎవర్నీ కలవలేం. ఎవరితో సరిగ్గా మాట్లాడలేం. దీనివల్ల ఒంటరితనంగా అనిపిస్తుంటుంది.
కరోనా నుంచి కోలుకున్న తర్వాత బయట తిరగాలన్నా కొంతమందిలో తెలియని బిడియం ఉంటుంది. ఏదో తప్పు చేశామన్న భావనతో ఇతరులతో అంత త్వరగా కలవలేకపోతారు.
గందరగోళంగా అనిపిస్తుంటుంది. ఇరిటేషన్‌, కోపం కూడా వస్తుంటాయి.
నిరాశ, డిప్రెషన్‌, నిద్రలేమి తనం కూడా బాధిస్తాయి.

ఈ ఒత్తిడి నుంచి ఎలా బయ‌ట‌ప‌డాలి

ప్రతిసారి కరోనాకు సంబంధించిన వార్తలను చూడటం వల్ల భయంగా అనిపిస్తుంటుంది. కాబట్టి కరోనాకు సంబంధించిన వార్తలను చూడటం తగ్గించాలి.
తరచూ స్నేహితులు, స‌న్నిహితుల‌తో ఫోన్ కాల్స్‌, వీడియో కాల్స్‌తో ట‌చ్‌లో ఉండాలి.
ఇంటి దగ్గరే ఉండి కూడా పాత అలవాట్లను కొనసాగించాలి.
త‌గినంత విశ్రాంతి తీసుకోవాలి.
ఆరోగ్య‌క‌ర‌మైన ఆహారాన్ని తీసుకోవడం చాలా అవసరం.
సౌకర్యాన్ని బట్టి వ్యాయామం చేస్తూ ఉండాలి.
ఆరోగ్య‌ప‌రంగా ఎలాంటి సమస్యలు ఉన్న దాచుకోకుండా చెప్పుకోవాలి.
క‌రోనా నుంచి కోలుకున్న‌వారికి సంబంధించిన పాజిటివ్ స్టోరీలు షేర్ చేసుకుంటూ ఉండాలి.

ఆహార‌పు అల‌వాట్లు

ఈ స‌మ‌యంలో రోగ నిరోధ‌క శ‌క్తిని పెంచుకోవ‌డం చాలా అవ‌స‌రం. వైర‌స్ నుంచి కోలుకోవ‌డానికి, కోలుకున్న త‌ర్వాత కూడా ఇమ్యూనిటీని కాపాడుకోవ‌డం ముఖ్యం. దీనికోసం ఆహార‌పు అల‌వాట్ల‌ను క‌చ్చితంగా పాటించాలి.

శ‌క్తినిచ్చే ఆహారం తినాలి

కార్బొహైడ్రేట్లు ఎక్కువ‌గా ఉండే ఆహారం తీసుకోవాలి. దీనివ‌ల్ల శ‌రీరానికి కావాల్సిన శ‌క్తి అందుతుంది. ఇందుకోసం అన్నం, గోధుమ‌లు, మొక్క‌జొన్న వంటి తృణ‌ధాన్యాల‌తో పాటు నూనెలు, చ‌క్కెర‌లను ఆహారంగా తీసుకోవాలి.

ప్రోటీన్ ఆహారం

ప‌ప్పులు, గుడ్లు, చికెన్‌, చేప‌లు, మాంసం, పాలు, పాల ఉత్ప‌త్తుల‌ను ఆహారంగా తీసుకోవ‌డం వ‌ల్ల శ‌రీరానికి కావాల్సిన ప్రోటీన్లు అందుతాయి. దీనివ‌ల్ల ఇన్ఫెక్ష‌న్ల‌ను ఎదుర్కొనే రోగ నిరోధ‌క శ‌క్తి క‌ణాలు పెరుగుతాయి.

ఇమ్యూనిటీ పెంచే ఆహారం..

రోగ‌నిరోధ‌క శ‌క్తిని పెంచ‌డంలో విట‌మిన్లు, ఖ‌నిజాలు కీల‌క పాత్ర పోషిస్తాయి. విట‌మిన్ ఏ, విట‌మిన్ ఈ, విట‌మిన్ సీతో పాటు జింక్‌, కాప‌ర్‌, ఐర‌న్ సెలినియం వంటి ఖ‌నిజాలు ఇమ్యూనిటీని పెంచుతాయి. వీటికోసం సీజ‌న‌ల్ ఫ్రూట్స్‌తో పాటు సిట్రస్ ల‌భించే పండ్లు, కూర‌గాయ‌ల‌ను ఎక్కువ‌గా ఆహారంగా తీసుకోవాలి.

ఇమ్యూనిటీ బూస్ట‌ర్లు

హెర్బ‌ల్ టీ తుల‌సి, దాల్చిన చెక్క‌, మిరియాలు, సొంటి, ఎండు ద్రాక్ష‌లు, బెల్లంతో చేసిన హెర్బ‌ల్ టీని రోజులో ఒక‌టి లేదా రెండుసార్లు తీసుకోవాలి.
గ్లాసు వేడి పాల‌ల్లో చిటికెడు ప‌సుపు వేసుకుని రోజులో ఒక‌టి లేదా రెండు సార్లు తాగాలి.
డీ హైడ్రేట్ అవ్వ‌కుండా ఉండేందుకు త‌గిన‌న్ని నీళ్లు తాగాలి.

ఆరోగ్య చిట్కాలు

ఎప్పుడూ భోజ‌నం మానేయ‌ద్దు. శ‌రీరానికి స‌రిపడ కేల‌రీలు అందేలా రోజుకు క‌నీసం 5 నుంచి 6 సార్లు భోజ‌నం చేయాలి.
తృణ‌ధాన్యాలు, ప‌ప్పులు, గోధుమ‌లు ఆహారంలో ఉండేలా చూసుకోవాలి.
ఆకుకూర‌లు, పండ్లును ప్ర‌తిరోజు ఆహారంగా తీసుకోవాలి.
యాంటీ ఆక్సిడెంట్లు అధికంగా ఉండే బాదం, వాల్‌న‌ట్స్‌, అవిసె గింజ‌లు ప్ర‌తిరోజు ఆహారంలో ఉండేలా చూసుకోవాలి.
ఎప్పుడూ ఒకే నూనె వాడ‌కూడ‌దు. ఆలివ్‌, క‌నోలా, రైస్‌బ్రాన్‌, సోయా, మ‌స్ట‌ర్డ్ ఆయిల్స్‌ను త‌ర‌చూ మారుస్తూ ఉండాలి.

ప్ర‌తిరోజు క‌నీసం రెండు లీట‌ర్ల నీళ్లు తాగాలి.
ఉప్పు, ప్రాసెస్‌డ్ ఫుడ్‌ను మితంగా తీసుకోవాలి.
వీలైనంత వ‌ర‌కు బ‌య‌ట ఆహారాన్ని త‌గ్గించాలి.
ఆల్క‌హాల్‌, స్మోకింగ్‌, టొబాకోకు మానేయాలి.
హైప‌ర్‌టెన్ష‌న్‌, డ‌యాబెటిస్‌, కిడ్నీ, గుండె సంబంధిత వ్యాధులు లేని వాళ్లు రోజులో క‌నీసం రెండు వేల కేల‌రీలు అందేలా చూసుకోవాలి.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి