Visit:
Brain Health | ఒక్కరోజు రాత్రి సరిగ్గా నిద్ర పట్టకపోయినా మర్నాడు అసౌకర్యంగా ఉంటుంది. చికాకుగా అనిపిస్తుంది. ఏకాగ్రత కుదరదు. నిద్ర సరిగ్గా లేకపోవడం వల్ల మెదడులో జరిగే మార్పులపై ‘జర్నల్‌ ఆఫ్‌ న్యూరోసైన్స్‌’లో ఓ అధ్యయనం ప్రచురితమైంది. దాని ప్రకారం, కేవలం ఒక్కరోజు నిద్రలేమి మన మెదడును ఒకటి రెండేండ్లు వయసు పైబడిన దానిలా చేస్తుందట. అయితే, బాగా నిద్రపోయిన తర్వాత ఈ మార్పు తిరగ బెడుతుందని కూడా అధ్యయనం వెల్లడించింది. అదే విధంగా.. అరకొరగా (పాక్షికంగా) నిద్రపోతే మాత్రం మెదడులో చెప్పుకోదగ్గ మార్పు కనిపించలేదట. జర్మనీకి చెందిన ఆర్‌డబ్ల్యూటీహెచ్‌ యూనివర్సిటీ పరిశోధకులు అంతర్జాతీయ నిపుణులతో కలిసి ఈ అధ్యయనం జరిపారు.
“తీవ్రమైన నిద్రలేమి మెదడు స్వరూపాన్ని మార్చేస్తుంది. మెదడు వయసు పెరిగినట్లుగా అనిపిస్తుంది. అలానే, మంచి నిద్రతో ఈ మార్పులు మునుపటి స్థితికి చేరుకుంటాయి” అంటారు ఆర్‌డబ్ల్యూటీహెచ్‌ యూనివర్సిటీకి చెందిన ఇవా మేరియా ఎల్మన్‌. అంతేకాదు, నిద్రలో ఆటంకాలు కూడా మెదడు వయసు పెరుగుదలతో సంబంధం కలిగి ఉంటాయట. ఈ అధ్యయనం కోసం 19 నుంచి 39 ఏండ్ల వయసు కలిగిన 134 మంది ఎంఆర్‌ఐ స్కాన్‌ డేటా పరిశీలించారు. ఈ క్రమంలో 24 గంటలకుపైగా నిద్రకు దూరమైతే మెదడు వయసు ఒకటి రెండేండ్లు పైబడినట్టు కనుగొన్నారు. ఆ తర్వాత రాత్రి మంచినిద్ర వల్ల మెదడు పూర్వపు స్థితికి చేరుకుందట. అరకొర నిద్రతో మాత్రం మెదడు వయోభారంలో మార్పులేమీ కనిపించలేదట.
