Visit:
Fatty Liver Symptoms | ప్రస్తుత కాలంలో వయసుతో సంబంధం లేకుండా అన్ని వయసుల వారిని వేధిస్తున్న అనారోగ్య సమస్యల్లో ఫ్యాటీ లివర్ కూడా ఒకటి. ఒక్కప్పుడు మద్యం ఎక్కువగా తీసుకునే వారిలో మాత్రమే ఈ సమస్య ఉండేది. కానీ ఇప్పుడు మద్యం తాగని వారిలో కూడా మనం ఈ సమస్యను చూడవచ్చు. మారిన జీవనశైలి, చక్కెరలు, అధిక కొవ్వులు ఉన్న ఆహారాలను తీసుకోవడం వల్ల మద్యం తీసుకోని వారిలో అన్ని వయసుల వారిలో ఈ వ్యాధి వస్తోంది. ఇది శరీర ఆరోగ్యాన్ని దెబ్బతీయడంతో పాటు కాలేయ ఆరోగ్యాన్ని కూడా దెబ్బతీస్తుంది. కొన్నిసార్లు ఇది నాన్- ఆల్కహాలిక్ స్టీటోహైపటైటిస్, లివర్ ఫ్రైబ్రోసిస్, సిర్రోసిస్ తో పాటు కొన్ని సందర్భాల్లో లివర్ క్యాన్సర్ కు కూడా దారి తీస్తుంది. కనుక ఫ్యాటీ లివర్ సమస్య నుండి త్వరగా బయటపడడం చాలా అవసరం. ఫ్యాటీ లివర్ సమస్యను నియంత్రించడంతో పాటు దీని లక్షణాలను ముందుగా గుర్తించడం కూడా చాలా అవసరం. కనుక ఫ్యాటీ లివర్ సమస్యతో బాధపడే వారిలో కనిపించే సంకేతాలు, లక్షణాల గురించి తెలుసుకోవాల్సి ఉంటుంది.
ఈ సమస్యతో బాధపడే వారు ఊహించని విధంగా బరువు పెరుగుతారు. ముఖ్యంగా పొట్ట చుట్టూ కొలత పెరగడం ఫ్యాటీ లివర్ సమస్యకు ఒక కారణం కావచ్చు. పొట్ట చుట్టూ అధికంగా కొవ్వు పేరుకుపోవడం అంతర్లీనంగా ఉన్న కాలేయ సమస్యలను కూడా సూచిస్తుంది. రక్తంలో పెరిగిన చక్కెరలు ఫ్యాటీ లివర్ సమస్యను కూడా సూచిస్తాయని చెప్పవచ్చు. ఫ్యాటీ లివర్ జీవక్రియలను దెబ్బతీయడంతో పాటు కాలేయ పనితీరు మందగించేలా చేస్తుంది. దీంతో ఇన్సులిన్ నిరోధకత పెరిగి రక్తంలో చక్కెర స్థాయిలు పెరుగుతాయి. కనుక రక్తంలో చక్కెర స్థాయిలు పెరిగితే కాలేయ పనితీరుకు సంబంధించిన పరీక్షలు చేయించుకోవడం కూడా మంచిది. మనకు అలసట రావడం సహజమే. కానీ విశ్రాంతి తీసుకున్నప్పటికీ అలసట రావడం, ఎప్పుడూ నీరసంగా ఉండడం కూడా ఫ్యాటీ లివర్ కి ఒక సంకేతమే. శరీరానికి తగినంత శక్తిని అందించడంలో కాలేయం ముఖ్యపాత్ర పోషిస్తుంది. ఫ్యాటీ లివర్ కారణంగా కాలేయ పనితీరు తగ్గుతుంది. దీంతో ఎప్పుడు అలసటగా ఉండడం వంటి సమస్యలు తలెత్తుతాయి.
ఫ్యాటీ లివర్ సమస్యతో బాధపడే వారిలో చర్మం, కళ్లు పసుపు రంగులోకి మారిపోతాయి. కామెర్లు రావడాన్ని తీవ్రమైన ఫ్యాటీ లివర్ సమస్యగా భావించాలి. ఎటువంటి నిర్లక్ష్యం చేయకుండా తక్షణమే వైద్య సహాయం తీసుకోవాలి. ఫ్యాటీ లివర్ సమస్యతో బాధపడే వారిలో పొత్తికడుపు పైభాగంలో కుడివైపు నొప్పిగా ఉంటుంది. వాపు కారణంగా కాలేయ పరిమాణం పెరుగుతుంది. దీంతో కడుపు నొప్పి వంటి సమస్యలు వస్తాయి. ఫ్యాటీ లివర్ సాధారణంగా శరీరంలో కొవ్వు స్థాయిలు ఎక్కువగా ఉండడాన్ని సూచిస్తుంది. అధిక కొలెస్ట్రాల్ కారణంగా కాలేయ పనితీరు తగ్గడంతో పాటు గుండె సంబంధిత జబ్బులు వచ్చే అవకాశం కూడా ఉంది.
మలం, మారిన మూత్రం రంగు కాలేయ అనారోగ్యాన్ని సూచిస్తాయి. బైలిరుబిన్ వల్ల మూత్రం ముదురు రంగులో వస్తుంది. లేత రంగు మలం పిత్త లోపాన్ని సూచిస్తుంది. కాలేయ పనితీరు మందగించడం వల్ల ఇలా జరుగుతుంది. కనుక ఇటువంటి లక్షణాలు కనిపించిన వెంటనే వైద్య సహాయం తీసుకోవడం చాలా అవసరం. అంతేకాకుండా రోజూ వ్యాయామం చేయడం, సమతుల ఆహారాన్ని తీసుకోవడం, బరువు అదుపులో ఉంచుకోవడం వంటివి చేయాలి. ఆరోగ్యకరమైన కొవ్వులు, పండ్లు, ఆకుకూరలు, కూరగాయలు, తృణధాన్యాలను, లీన్ ప్రోటీన్లను ఎక్కువగా తీసుకోవాలి. ప్రాసెస్ చేసిన ఆహారాలను, చక్కెరలను తక్కువగా తీసుకోవాలి. నీటిని ఎక్కువగా తాగాలి. నీటిని తాగడం వల్ల కాలేయం పనితీరు మెరుగుపడి వ్యర్థాలు బయటకు పోతాయి. మద్యం సేవించడం మానేయాలి. రక్తంలో చక్కెర స్థాయిలను అదుపులో ఉంచుకోవాలి. ఇలా తగిన జాగ్రత్తలు తీసుకుంటూ మంచి జీవనశైలిని అలవరుచుకోవడం వల్ల ఫ్యాటీ లివర్ సమస్య నుండి చాలా సులభంగా బయటపడవచ్చు.
