Eggs | కోడిగుడ్ల‌లో ఉండే కొలెస్ట్రాల్ మ‌న శ‌రీరానికి హాని చేస్తుందా.. నిపుణులు ఏం చెబుతున్నారు..?

గుడ్లు ఆరోగ్యానికి మంచివా? లేక కొలెస్ట్రాల్‌ను పెంచే ఆహారమా? అనే చర్చ చాలా కాలంగా కొనసాగుతోంది. ముఖ్యంగా గుడ్డు పచ్చసొన తినాలా వద్దా అనే విషయంలో చాలామందికి ఇంకా సందేహాలు ఉన్నాయి. ఒకప్పుడు గుడ్డు పచ్చసొన వల్ల గుండెజబ్బుల ప్రమాదం పెరుగుతుందని భావించేవారు.

Eggs | గుడ్లు ఆరోగ్యానికి మంచివా? లేక కొలెస్ట్రాల్‌ను పెంచే ఆహారమా? అనే చర్చ చాలా కాలంగా కొనసాగుతోంది. ముఖ్యంగా గుడ్డు పచ్చసొన తినాలా వద్దా అనే విషయంలో చాలామందికి ఇంకా సందేహాలు ఉన్నాయి. ఒకప్పుడు గుడ్డు పచ్చసొన వల్ల గుండెజబ్బుల ప్రమాదం పెరుగుతుందని భావించేవారు. అయితే తాజా పోషకాహార పరిశోధనలు ఈ అభిప్రాయాన్ని పూర్తిగా మార్చేశాయి. ఇప్పుడు గుడ్లలో ఉండే కొలెస్ట్రాల్ కంటే మన మొత్తం ఆహారపు అలవాట్లే ఆరోగ్యంపై ఎక్కువ ప్రభావం చూపుతాయని నిపుణులు చెబుతున్నారు. ఒక గుడ్డు పచ్చసొనలో సుమారు 200 మిల్లీగ్రాముల కొలెస్ట్రాల్ ఉంటుంది. అమెరికన్ హార్ట్ అసోసియేషన్ ప్రకారం ఆరోగ్యంగా ఉన్న పెద్దలు రోజుకు 300 మిల్లీగ్రాముల వరకు కొలెస్ట్రాల్ తీసుకోవచ్చు. ఈ కారణంగా చాలామంది గుడ్డు పచ్చసొన తింటే రక్తంలో కొలెస్ట్రాల్ వెంటనే పెరుగుతుందని భావిస్తుంటారు. కానీ పోషకాహార నిపుణుల ప్రకారం ఆహారంలో ఉండే కొలెస్ట్రాల్ నేరుగా రక్తంలోని కొలెస్ట్రాల్ స్థాయిలను పెంచదు.

ఎన్నో విట‌మిన్లు, పోష‌కాల‌కు మూలం..

పోష‌కాహార నిపుణులు తెలిపిన వివరాల ప్రకారం, శరీరంలో చెడు కొలెస్ట్రాల్ పెరగడానికి ప్రధాన కారణం శాచురేటెడ్ ఫ్యాట్స్. అంటే అధికంగా వేయించిన పదార్థాలు, ప్రాసెస్డ్ ఫుడ్స్, అధిక కొవ్వు ఉన్న ఆహారాలు ఎక్కువ హానికరమని చెబుతున్నారు. సహజసిద్ధమైన గుడ్లు వంటి ఆహారాలను పూర్తిగా మానేయడం సరైన పరిష్కారం కాదని వారు అభిప్రాయ‌పడుతున్నారు. గుడ్లను చాలామంది కేవలం కొలెస్ట్రాల్ మూలంగా మాత్రమే చూస్తారు. కానీ అవి అనేక ముఖ్యమైన పోషకాల నిల్వగా కూడా గుర్తింపు పొందాయి. గుడ్లలో విటమిన్ ఎ, బి విటమిన్లు, ఫోలేట్, సెలీనియం వంటి పోషకాలు సమృద్ధిగా ఉంటాయి. ఇవి రోగనిరోధక శక్తిని పెంచడంలో, మెదడు పనితీరును మెరుగుపరచడంలో, శరీర ఆరోగ్యాన్ని కాపాడడంలో కీలక పాత్ర పోషిస్తాయి. గుడ్డు పచ్చసొన పూర్తిగా తొలగిస్తే ఈ ముఖ్యమైన పోషకాలు శరీరానికి అందకుండా పోయే అవకాశం ఉందని నిపుణులు హెచ్చరిస్తున్నారు.

ఎన్ని తిన‌వ‌చ్చు..?

ఇక రోజుకు ఎంతమేర గుడ్లు తినాలి అనే విషయానికి వస్తే, సమతుల్యత చాలా ముఖ్యమని నిపుణులు సూచిస్తున్నారు. ఆరోగ్యంగా ఉన్నవారు రోజుకు నాలుగు గుడ్డు తెల్లసొనలు, రెండు పచ్చసొనలు వరకు తీసుకోవచ్చని చెబుతున్నారు. కొలెస్ట్రాల్ సమస్య ఉన్నవారు కూడా రోజుకు నాలుగు తెల్లసొనలు, ఒక పచ్చసొన వరకు తీసుకోవచ్చని సూచిస్తున్నారు. ఈ విధంగా తీసుకుంటే గుడ్లలోని పోషకాలు లభిస్తాయి, అదే సమయంలో అధిక కొలెస్ట్రాల్ భయం కూడా ఉండదని పేర్కొంటున్నారు.

మానేయాల్సిన ప‌నిలేదు..

గుడ్డు పచ్చసొనను పూర్తిగా మానేయాల్సిన అవసరం చాలా మందికి లేదని నిపుణులు స్పష్టం చేస్తున్నారు. ఆరోగ్యకరమైన జీవనశైలి, నియంత్రిత ఆహారం, క్రమం తప్పకుండా వ్యాయామం చేయడం వంటి అంశాలే కొలెస్ట్రాల్ నియంత్రణలో కీలకమని చెబుతున్నారు. గుడ్ల‌ను సరైన పరిమాణంలో తీసుకుంటే అవి సమతుల ఆహారంలో భాగంగా ఆరోగ్యానికి మేలు చేస్తాయని వివరిస్తున్నారు. పోషకాహార నిపుణుల అభిప్రాయం ప్రకారం, గుడ్డు పచ్చసొనకు భయపడాల్సిన అవసరం లేదు. అసలు జాగ్రత్త అవసరమయ్యేది అనారోగ్యకరమైన ఆహారపు అలవాట్ల విషయంలోనే. సరైన మోతాదులో గుడ్లు తీసుకుంటే అవి శరీరానికి శక్తినిచ్చే, పోషకాలు అందించే మంచి ఆహారంగా ఉపయోగపడతాయని నిపుణులు తెలియ‌జేస్తున్నారు.