Covid Antibodies: వైర‌స్ సోకిన ఏడు నెల‌ల త‌ర్వాతా పుష్క‌లంగా యాంటీబాడీలు!

క‌రోనా వైర‌స్ ఓసారి సోకి త‌గ్గిన త‌ర్వాత శ‌రీరంలో IgG యాంటీబాడీలు ( Covid Antibodies ) ఎన్ని రోజులు ఉంటాయి? దీనికి ఇప్ప‌టి వ‌ర‌కూ స్ప‌ష్ట‌మైన స‌మాధానం లేక‌పోయినా.. తాజా అధ్య‌య‌నంలో మాత్రం ఏడు నెల‌ల వ‌ర‌కూ ఇవి స్థిరంగా లేదంటే మ‌రింత పెరిగిన‌ట్లు తేలింది.

బార్సిలోనా: క‌రోనా వైర‌స్ ఓసారి సోకి త‌గ్గిన త‌ర్వాత శ‌రీరంలో IgG యాంటీబాడీలు ( Covid Antibodies ) ఎన్ని రోజులు ఉంటాయి? దీనికి ఇప్ప‌టి వ‌ర‌కూ స్ప‌ష్ట‌మైన స‌మాధానం లేక‌పోయినా.. తాజా అధ్య‌య‌నంలో మాత్రం ఏడు నెల‌ల వ‌ర‌కూ ఇవి స్థిరంగా లేదంటే మ‌రింత పెరిగిన‌ట్లు తేలింది. ఈ అధ్య‌య‌నం తాలూకు ఫ‌లితాల‌ను నేచ‌ర్ క‌మ్యూనికేష‌న్స్‌లో ప్ర‌చురించారు. అంతేకాదు సాధార‌ణంగా వచ్చే జ‌లుబు కోసం శ‌రీరంలో ఉండే యాంటీబాడీలు కూడా కొవిడ్‌-19పై స‌మ‌ర్థ‌వంతంగా ప‌ని చేస్తున్న‌ట్లు ఈ అధ్య‌య‌నం తెలిపింది. బార్సిలోనా ఇన్‌స్టిట్యూట్ ఫ‌ర్ గ్లోబ‌ల్ హెల్త్ ఆధ్వ‌ర్యంలో ఈ అధ్య‌య‌నం జ‌రిగింది.

క‌రోనా వైర‌స్ ప‌రిణామ క్ర‌మం తెలుసుకోవ‌డంతోపాటు దానిని అడ్డుకోవ‌డంలో ఈ విష‌యాలు కీల‌కంగా మార‌నున్నాయి. ఐఎస్ గ్లోబ‌ల్ రీసెర్చ‌ర్ కార్లోటా డొబానో నేతృత్వంలో జ‌రిగిన ఈ అధ్య‌య‌నంలో భాగంగా హాస్పిట‌ల్ క్లినిక్‌లోని ఆరోగ్య కార్య‌కర్త‌ల‌ను పరిశీలించారు. మొత్తం 578 మంది పార్టిసిపెంట్ల నుంచి ర‌క్త న‌మూనాల‌ను సేక‌రించారు. గ‌తేడాది మార్చి నుంచి అక్టోబ‌ర్ మ‌ధ్య నాలుగుసార్లు ఈ న‌మూనాల‌ను తీసుకున్నారు. లుమినెక్స్ టెక్నాల‌జీని ఉప‌యోగించి ఈ న‌మూనాల్లోని IgA, IgM లేదా IgG యాంటీబాడీల సంఖ్య‌ను లెక్కించారు.

ఈ ఆరోగ్య కార్య‌క‌ర్త‌ల్లో చాలా వ‌ర‌కూ క‌రోనా తొలి వేవ్‌లోనే ఆ వైర‌స్ బారిన ప‌డ్డారు. వీళ్ల‌లోని IgG యాంటీబాడీలు చాలా కాలం పాటు స్థిరంగా ఉన్న‌ట్లు ఇందులో గుర్తించారు. అంతేకాకుండా వీళ్ల‌లో 75 శాతం మందిలో IgG యాంటీబాడీల సంఖ్య ఐదు నెల‌ల త‌ర్వాత పెర‌గ‌డం ప్రారంభించిన‌ట్లు ఈ అధ్య‌య‌నంలో పాల్గొన్న సీనియ‌ర్ ఆథ‌ర్ గెమ్మా మాంకునిల్ వెల్ల‌డించారు. ఇక మ‌నుషుల్లో హ్యూమ‌న్ కోల్డ్ క‌రోనా వైర‌స్‌ల‌(HCoV)కు సంబంధించిన యాంటీబాడీలు కూడా కొవిడ్‌-19 వైర‌స్‌పై ప‌ని చేస్తున్న‌ట్లు కూడా ఇందులో గుర్తించారు. కొవిడ్ బారిన ప‌డిన వాళ్ల‌లో ఈ HCoV యాంటీబాడీలు త‌క్కువ‌గా ఉన్న‌ట్లు తేలింది.