వజ్రభారతికి వందనం

ఉ. భారతధారుణీమహితభాగ్యమహోదయవజ్రపర్వన వ్యారుణకాంతిజాలపరిభాసితదివ్యముహూర్తవేళలో పౌరవరేణ్య!ఎత్తుము త్రివర్ణపతాకము;వ్యోమసీమబృం దారకమందిరాగ్రనిరతస్థితకేతనమై రహించగా

ఉ. భారతధారుణీమహితభాగ్యమహోదయవజ్రపర్వన
వ్యారుణకాంతిజాలపరిభాసితదివ్యముహూర్తవేళలో
పౌరవరేణ్య!ఎత్తుము త్రివర్ణపతాకము;వ్యోమసీమబృం
దారకమందిరాగ్రనిరతస్థితకేతనమై రహించగా

చం.కులమతజాతిభేదభవకుడ్యములన్‌ పడద్రోచి; స్వార్థసం
కులకలహోన్ముఖాంతకుల కోరలుపీకి;ప్రతీపదుష్టశ
క్తులదునుమాడి;గాంధీమహితోన్నతబోధసదాశయమ్ముగా
కలిసిపదండిముందుకు వికాసపథమ్ముల దేశసేవకై

ఉ.వందలఏండ్లు ముష్కరదివాంధనిరంకుశపాలనమ్ములో
కుందినజాతిముక్తికయి ఘోరరణమ్మును చేసినారహో
ఎందరో దేశభక్తులు;తదీయమహాశయదివ్యరూపమీ
సుందరభారతాఖిలవసుంధర;పాడుము జాతిగీతముల్‌

– డా.అయాచితం శ్రీధర్‌