పాత లేఅవుట్‌లలో పార్కు స్థలాల గుర్తింపు

• వచ్చే హరితహారంలో మొక్కలు నాటి పరిరక్షణ చర్యలు
• శివారు ప్రాంతాల్లోనూ ప్రణాళికాబద్దమైన పట్టణీకరణ
• మెరుగైన వసతుల కల్పనే హెచ్‌ఎండీఏ లక్ష్యం
• ప్రత్యేక కార్యాచరణను సిద్ధం చేస్తున్న హెచ్‌ఎండీఏ

సిటీబ్యూరో, మే 4 (నమస్తే తెలంగాణ) : ప్రణాళికబద్దమైన పట్టణీకరణే లక్ష్యంగా హైదరాబాద్‌ మహా నగరాభివృద్ధి సంస్థ చర్యలు చేపడుతోంది. గ్రేటర్‌ చుట్టూ ఉన్న ఔటర్‌ రింగురోడ్డును దాటి శివారు ప్రాంతాల్లో పట్టణీకరణ జరుగుతున్న నేపథ్యంలో మెరుగైన మౌలిక వసతుల కల్పనపై ప్రధానంగా దృష్టి సారించింది. కొత్తగా రోడ్ల నిర్మాణంతో పాటు అవసరమైన ఫ్లైఓవర్ల నిర్మాణం, పచ్చదనం పెంపొందించేందుకు అటవీ ప్రాంతాలను అర్బన్‌ ఫారెస్ట్‌ బ్లాకులుగా అభివృద్ధి చేసి ప్రజలకు అందుబాటులోకి తీసుకువస్తున్నారు. తా జాగా కొత్త కార్యక్రమానికి హెచ్‌ఎండీఏ కార్యాచరణను సిద్ధం చేసే పనిలో ఉంది.

హెచ్‌ఎండీఏ అనుమతితో రియల్‌ ఎస్టేట్‌ సంస్థలు గతం లో చేపట్టిన లేఅవుట్‌లలో 10 శాతం పార్కుల కో సం కేటాయించిన స్థలాలను గుర్తించాలని నిర్ణయించారు. ఇందుకోసం ప్రత్యేక కా ర్యాచరణతో ముందుకు వెళ్లి సమర్థవంతంగా అ మలు చేయాలని ప్రణాళికలు సిద్ధం చేస్తున్నారు. హెచ్‌ఎండీఏ కమిషనర్‌గా, రాష్ట్ర పురపాలక, పట్టణాభివృద్ధి శా ఖ ప్రత్యేక ముఖ్య కార్యదర్శిగా ఒకే అధికారి ఉండడంతో ఈ కార్యక్రమాన్ని హెచ్‌ఎండీఏ ప్లానింగ్‌ అండ్‌ ఇంజినీరింగ్‌, అర్బన్‌ ఫారెస్ట్రీ విభాగం అధికారులు ప్రతిష్టాత్మకంగా తీసుకోనున్నారు.

హెచ్‌ఎండీఏ స్వరూపం….

గ్రేటర్‌ హైదరాబాద్‌ చుట్టూ ఉన్న హెచ్‌ఎండీఏ పరిధి 7,257 చదరపు కిలోమీటర్లు. ఇందులో 7 జిల్లాలు, 70 మండలాలు ఉన్నాయి. వీటి పరిధిలో 40 మున్సిపాలిటీలు, నగర పంచాయతీలు, 719 గ్రామాలు ఉన్నాయి. గ్రేటర్‌ చు ట్టూ 30 నుంచి 50 కిలోమీటర్ల వరకు హెచ్‌ఎండీ పరిధి విస్తరించి ఉంది. నగర శివారు ప్రాంతాలు శరవేగంగా విస్తరిస్తున్న నేపథ్యంలో హెచ్‌ఎండీఏ పరిధిలో వేల సంఖ్యలో కొత్తగా లేఅవుట్‌లు వెలుస్తున్నాయి.

ఇప్పటికే 7 జిల్లాల పరిధిలోనే తుది అనుమతులు పొందిన లేఅవుట్‌లు 12,000 లకు పైగా ఉన్నాయి. కొత్తగా మరిన్ని ఏర్పాటవుతూనే ఉన్నాయి. వీటికి తోడు ఔటర్‌ రింగు రోడ్డు బయట వందల ఎకరాల్లో కొత్తగా పదుల సంఖ్యలో పారిశ్రామిక వాడలు ఏర్పాటవుతున్నాయి. దీంతో చుట్టూ 50 కిలోమీటర్లు వరకు ఉన్న హెచ్‌ఎండీఏ పరిధిలో ప్రణాళికాబద్ధమైన పట్టణీకరణ జరిగేందుకు అవసరమైన అంశాలను ప్రాధాన్యత క్రమంలో చేపట్టనున్నారు.

శివారు మున్సిపాలిటీలతో కలిసి పార్కు స్థలాల పరిరక్షణ..

జీహెచ్‌ఎంసీ పరిధిని మినహాయిస్తే హెచ్‌ఎండీఏ పరిధిలో 40 వరకు మున్సిపాలిటీలు, నగర పంచాయతీలు ఉన్నాయి. తెలంగాణ ప్రభుత్వం ఏర్పాటైన తర్వాత గ్రేటర్‌ చుట్టూ ఏర్పాటు చేసిన మున్సిపాలిటీల్లో పరిపాలనపై పురపాలక, పట్టణాభివృద్ధి శాఖ ప్రత్యేకంగా దృష్టి సారించింది. అభివృద్ధి కార్యక్రమాలతో ఇంటి పన్నుల వసూలు, శానిటేషన్‌, గ్రీనరీని పెంపొందించడం, చెత్త వ్యర్థాల నిర్వహణను సమర్థవంతంగా నిర్వహిస్తున్నారు. ఈ మున్సిపాలిటీల పరిధిలోనే పెద్ద మొత్తంలో లేఅవుట్‌లు ఉన్నాయి.

ఈ ప్రాంతాల్లోనే కొత్తగా నివాసాలు వెలుస్తున్న నేపథ్యంలో పాత లేఅవుట్‌లను గుర్తించి, అందులో 10 శాతం మేర పార్కుల కోసం కేటాయించిన స్థలాలకు చుట్టూ రక్షణగా ఫెన్సింగ్‌ వేసి జూన్‌లో చేపట్టే హరితహారంలో మొక్కలు నాటాలని హెచ్‌ఎండీఏ అధికారులు కార్యచరణ సిద్ధం చేస్తున్నారు. ఈ ఏడాది సుమారు 500 పార్క్‌ స్థలాలను గుర్తించడమే లక్ష్యంగా పెట్టుకుని, వాటి పరిరక్షణ కోసం శాశ్వతంగా ప్రహారీలను నిర్మించనున్నారు. కేవలం హెచ్‌ఎండీఏ అధికారులే కాకుండా హెచ్‌ఎండీఏ పరిధిలో ఉన్న అన్ని మున్సిపాలిటీ అధికారులతో కలిసి పార్కు స్థలాల పరిరక్షణకు చర్యలు చేపట్టనున్నారు.