శ్రీశైలంలో మకర సంక్రాంతి బ్రహ్మోత్సవాలు.. యాగశాల ప్రవేశంతో ప్రారంభం

Srisailam | శ్రీశైలంలో నేటి నుంచి మకర సంక్రాంతి బ్రహ్మోత్సవాలు జరుగనున్నాయి. ఈ నెల 18 వరకు జరుగనున్న ఈ ఉత్సవాలు.. గురువారం ఉదయం 9 గంటలకు యాగశాల ప్రవేశంతో ప్రారంభమవుతాయి

శ్రీశైలం: శ్రీశైలంలో నేటి నుంచి మకర సంక్రాంతి బ్రహ్మోత్సవాలు జరుగనున్నాయి. ఈ నెల 18 వరకు జరుగనున్న ఈ ఉత్సవాలు.. గురువారం ఉదయం 9 గంటలకు యాగశాల ప్రవేశంతో ప్రారంభమవుతాయి. సాయంకాలం 5.30 గంటల నుంచి అంకురారోహణ, అగ్ని ప్రతిష్ఠాపన, 7 గంటలకు ధ్వజారోహణ, ధ్వజ పటావిష్కరణ కార్యక్రమాలు నిర్వహించనున్నారు. పంచాహ్నిక దీక్షతో ఏడు రోజులుపాటు వైభవంగా జరిగే బ్రహ్మోత్సవాల్లో భ్రమరాంబ మల్లికార్జున స్వామి అమ్మవార్లు ప్రతిరోజు విశేష పూజలు అందుకోనున్నారు. యాగశాల ప్రవేశం, వేదస్వస్థి, శివసంకల్పం, గణపతిపూజ, పుణ్యాహవచనం, చండీశ్వరపూజ, వాస్తుహోమం, మండపారాధనలు, రుద్రకళశ స్థాపన, వేదపారాయణాలతో పాటు ప్రత్యేక పూజాధికాలు చేయనున్నారు. బ్రహ్మోత్సవాల సందర్భంగా కొన్ని ఆర్జిత, పరోక్ష సేవలను ఆలయ అధికారులు నిలిపివేశారు.

బ్రహ్మోత్సవాలు ఇలా..

• బ్రహ్మోత్సవాల రెండో రోజు అంటే శుక్రవారం నుంచి స్వామిఅమ్మవార్లకు వాహన సేవలు నిర్వహిస్తారు.
• 15వ తేదీన మకర సంక్రాంతి రోజున బ్రహ్మోత్సవ కల్యాణం
• 17న ఉదయం యాగ పూర్ణాహుతి, కలశోద్వాసన, ల్రిశూల స్నానం, సాయంత్రం సదస్యం, నాగవల్లి, ధ్వజావరోహణ
• బ్రహ్మోత్సవాలలో చివరి రోజు అయిన 18వ తేదీన రాత్రి జరిగే పుష్పోత్సవం, శయనోత్సవం, ఏకాంత సేవలతో ఉత్సవాలు ముగియనున్నాయి.
• ఈనెల 14న భోగిరోజు ఉదయం 10 గంటలకు ఆలయ ప్రాంగణంలోని అక్కమహాదేవి అలంకార మండపంలో ఉచిత సామూహిక బోగిపండ్ల కార్యక్రమం నిర్వహించనున్నారు.
• 15వ తేదీ ఉదయం ఆలయ దక్షిణ మాడవీధిలో మహిళలకు ముగ్గుల పోటీలు నిర్వహిస్తారు.
• 17న సదస్యం రోజున వేద శ్రవణం ఉంటుంది.