లక్నో: ఒక పోలీస్ కానిస్టేబుల్ తన భార్యను గొంతు నులిమి హత్య చేశాడు. ఆమెను ఫ్యాన్కు వేలాడదీసి ఆత్మహత్య చేసుకున్నట్లుగా చిత్రీకరించాడు. అయితే నాలుగేళ్ల కుమారుడి వాంగ్మూలంతో అసలు నిజం బయటపడింది. దీంతో పోలీసులు అతడ్ని అరెస్ట్ చేశారు. ఉత్తర ప్రదేశ్ రాజధాని లక్నోలో ఈ సంఘటన జరిగింది. పోలీస్ కానిస్టేబుల్ రింకూ గౌతమ్ శనివారం పోలీసులకు ఫోన్ చేశాడు. తన భార్య బ్రిజేష్ కుమారి సీలింగ్ ఫ్యాన్కు ఉరి వేసుకుని ఆత్మహత్య చేసుకుందని చెప్పాడు. సంఘటనా స్థలానికి వచ్చిన దుబగ్గ స్టేషన్ పోలీసులు బ్రిజేష్ కుమారి మృతదేహాన్ని కిందకు దించి పోస్ట్మార్టం కోసం ఆసుపత్రికి తరలించారు.
కాగా, కట్నం కోసం తన కుమార్తెను అల్లుడు హత్య చేశాడని మృతురాలి తండ్రి లటోరి రామ్ పోలీసులకు ఫిర్యాదు చేశాడు. రింకూ గౌతమ్తో ఏడేళ్ల కిందట పెళ్లి జరిగిందని, కట్నకానుల విషయంలో భార్యను హింసించేవాడని ఆరోపించాడు. మరోవైపు పోలీసులు నాలుగేళ్ల కుమారుడ్ని ఆరా తీశారు. తన తల్లిని తండ్రి గొంతు పిసికాడని, అనంతరం ఫ్యాన్కు వేలాడదీయగా ఊపిరి అందక ఆమె ఇబ్బంది పడి చనిపోయినట్లు ఆ బాలుడు వాంగ్మూలం ఇచ్చాడు. గొంతు నొక్కడం వల్ల ఊపిరాడక బ్రిజేష్ కుమారి మరణించినట్లు పోస్ట్మార్టం నివేదికలో కూడా తేలింది. దీంతో పరారీలో ఉన్న నిందితుడు రింకూ గౌతమ్ను పోలీసులు అరెస్ట్ చేశారు. హత్య కేసుగా నమోదు చేసి దర్యాప్తు చేస్తున్నారు.