Un Stoppable | బాలయ్య ‘అన్‌స్టాపబుల్ 5’లో మెగాస్టార్ చిరంజీవి.. నిజమైతే అభిమానులకు పండగే!

Un Stoppable | తెలుగు ప్రేక్షకులను ఎంతగానో ఆకట్టుకున్న టాక్ షోల్లో నందమూరి బాలకృష్ణ వ్యాఖ్యాతగా వ్యవహరిస్తున్న ‘అన్‌స్టాపబుల్’ ప్రత్యేక స్థానం సంపాదించుకుంది. ప్రముఖ ఓటీటీ వేదిక ఆహాలో ప్రసారమైన ఈ కార్యక్రమం ఇప్పటికే నాలుగు సీజన్లతో ప్రేక్షకులను అలరించింది. బాలయ్య తనదైన శైలి, స‌ర‌దా ప్రశ్నలు, అతిథులతో ఆప్యాయంగా మెలిగే విధానంతో ఈ షోకు ప్రత్యేక గుర్తింపు తీసుకొచ్చారు.

Un Stoppable | తెలుగు ప్రేక్షకులను ఎంతగానో ఆకట్టుకున్న టాక్ షోల్లో నందమూరి బాలకృష్ణ వ్యాఖ్యాతగా వ్యవహరిస్తున్న ‘అన్‌స్టాపబుల్’ ప్రత్యేక స్థానం సంపాదించుకుంది. ప్రముఖ ఓటీటీ వేదిక ఆహాలో ప్రసారమైన ఈ కార్యక్రమం ఇప్పటికే నాలుగు సీజన్లతో ప్రేక్షకులను అలరించింది. బాలయ్య తనదైన శైలి, స‌ర‌దా ప్రశ్నలు, అతిథులతో ఆప్యాయంగా మెలిగే విధానంతో ఈ షోకు ప్రత్యేక గుర్తింపు తీసుకొచ్చారు. ఇప్పుడు ఐదో సీజన్‌పై ఆసక్తి పెరుగుతున్న వేళ.. తొలి ఎపిసోడ్‌కు మెగాస్టార్ చిరంజీవి అతిథిగా రాబోతున్నారనే ప్రచారం టాలీవుడ్‌లో చర్చనీయాంశంగా మారింది.

‘అన్‌స్టాపబుల్’ ఐదో సీజన్‌లో చిరంజీవిని ప్రత్యేక అతిథిగా తీసుకురావడానికి ప్రయత్నాలు జరుగుతున్నట్లు సినీ వర్గాల్లో ప్రచారం సాగుతోంది. ఇదే నిజమైతే అటు మెగాస్టార్ అభిమానులకు, ఇటు నందమూరి అభిమానులకు పెద్ద పండగే అని చెప్పాలి. తెలుగు చిత్ర పరిశ్రమలో అగ్ర కథానాయకులుగా కొనసాగుతున్న చిరంజీవి, బాలకృష్ణ ఒకే వేదికపై కనిపిస్తే ఆ సందడి ఎలా ఉంటుందోనని ప్రేక్షకులు ఆసక్తిగా ఎదురుచూస్తున్నారు. అయితే, చిరంజీవి ఈ కార్యక్రమానికి వస్తున్నారనే వార్తపై ఇప్పటివరకు ఆహా సంస్థ నుంచి కానీ, షో నిర్వాహకుల నుంచి కానీ అధికారిక ప్రకటన వెలువడలేదు.

చిరంజీవి, బాలకృష్ణ దాదాపు నాలుగు దశాబ్దాలుగా తెలుగు సినీ పరిశ్రమలో అగ్ర హీరోలుగా కొనసాగుతున్నారు. సినిమాల పరంగా ఎన్నోసార్లు పోటీ పడినప్పటికీ, ఒకరిపట్ల మరొకరికి గౌరవం ఉందని పలుమార్లు వెల్లడైంది. అలాంటి ఇద్దరు దిగ్గజాలు ఒకే వేదికపై కలిస్తే అభిమానులకు ఎన్నో ఆసక్తికరమైన విషయాలు తెలిసే అవకాశం ఉంటుంది. తమ సినీ ప్రయాణంలో ఎదురైన అనుభవాలు, కెరీర్‌లో ఎదుర్కొన్న సవాళ్లు, పాత సినిమాల జ్ఞాపకాలు, కుటుంబానికి సంబంధించిన సరదా విషయాలు వంటి అంశాలపై వీరిద్దరి మధ్య సంభాషణ సాగితే ప్రేక్షకులకు మంచి వినోదం లభించవచ్చు. ముఖ్యంగా బాలయ్య తనదైన శైలిలో చిరంజీవిని ప్రశ్నిస్తే, మెగాస్టార్ తన చమత్కారంతో సమాధానాలు ఇస్తే ఆ ఎపిసోడ్ ప్రత్యేక ఆకర్షణగా నిలిచే అవకాశం ఉంది. కాగా, ‘అన్‌స్టాపబుల్’ గత సీజన్లలో మహేశ్‌బాబు, పవన్ కల్యాణ్, ప్రభాస్, అల్లు అర్జున్, రవితేజ వంటి ప్రముఖ సినీ తారలు పాల్గొని సందడి చేసిన విష‌యం తెలిసిందే.