Visit:
Toxic | రాకింగ్ స్టార్ యశ్ హీరోగా భారీ అంచనాల మధ్య ప్రేక్షకుల ముందుకు వచ్చిన పాన్ ఇండియా చిత్రం ‘టాక్సిక్: ఎ ఫెయిరీ టేల్ ఫర్ గ్రోన్-అప్స్’ ప్రస్తుతం థియేటర్లలో సందడి చేస్తోంది. సినిమా విడుదలను పురస్కరించుకుని చిత్రబృందం ప్రేక్షకులు, అభిమానులకు ఒక ప్రత్యేక విజ్ఞప్తి చేసింది. సినిమా సన్నివేశాలను థియేటర్లలో రికార్డ్ చేయవద్దని, వాటిని సోషల్ మీడియాలో షేర్ చేయవద్దని మేకర్స్ కోరారు. సినిమా కోసం టెక్నీషియన్లు, నటీనటులు, చిత్రబృందం మొత్తం ఎన్నో సంవత్సరాలు కష్టపడ్డారని పేర్కొన్న మేకర్స్.. ఆ కష్టానికి ప్రేక్షకుల నుంచి సరైన గౌరవం లభించాలని కోరుతున్నారు. ‘టాక్సిక్’ను థియేటర్లలో పెద్ద తెరపై చూసి, సినిమా కోసం రూపొందించిన అనుభూతిని పూర్తిస్థాయిలో ఆస్వాదించాలని అభిమానులకు విజ్ఞప్తి చేశారు.
ప్రస్తుతం కొత్త సినిమాలు విడుదలైన వెంటనే థియేటర్లలోని కీలక సన్నివేశాలను మొబైల్ ఫోన్లలో రికార్డ్ చేసి సోషల్ మీడియాలో పోస్ట్ చేయడం పెరుగుతోంది. ముఖ్యంగా హీరో ఎంట్రీ, యాక్షన్ సీన్స్, క్లైమాక్స్, కీలక ట్విస్టులు వంటి వీడియోలు విడుదలైన కొద్ది గంటల్లోనే వైరల్ అవుతున్నాయి. ఈ నేపథ్యంలో ‘టాక్సిక్’ చిత్రబృందం ముందుగానే ప్రేక్షకులకు ప్రత్యేక సందేశం ఇచ్చింది. సినిమా చూస్తున్న సమయంలో స్క్రీన్ను వీడియో తీసి ఆన్లైన్లో షేర్ చేయకుండా, థియేట్రికల్ ఎక్స్పీరియన్స్ను మాత్రమే ఆస్వాదించాలని కోరింది.సినిమాలోని కథ, కీలక మలుపులు, సర్ప్రైజింగ్ సన్నివేశాలను సోషల్ మీడియాలో వెల్లడించవద్దని కూడా మేకర్స్ విజ్ఞప్తి చేశారు. ఇప్పటికే సినిమా చూసిన వారు తమ అభిప్రాయాలను, రివ్యూలను పంచుకోవచ్చు కానీ.. కథలోని ముఖ్యమైన ట్విస్టులను మాత్రం బయటపెట్టొద్దని సూచించారు.
సినిమా చూడని ప్రేక్షకులు కూడా ఎలాంటి స్పాయిలర్స్ లేకుండా ‘టాక్సిక్’ను థియేటర్లో చూసి స్వయంగా ప్రతి సర్ప్రైజ్ను ఆస్వాదించే అవకాశం ఉండాలని చిత్రబృందం భావిస్తోంది. “సినిమాను ఆస్వాదించండి.. మీ స్పందనను పంచుకోండి.. కానీ తర్వాత చూసే ప్రేక్షకుడి అనుభూతిని దెబ్బతీయొద్దు” అన్న సందేశాన్ని మేకర్స్ అభిమానులకు అందించారు.దర్శకురాలు గీతూ మోహన్దాస్ దర్శకత్వంలో భారీ బడ్జెట్తో తెరకెక్కిన ‘టాక్సిక్’ మల్టీ లాంగ్వేజ్ స్థాయిలో విడుదలైంది. యశ్ ప్రధాన పాత్రలో నటించిన ఈ సినిమాలో కియారా అద్వానీ, నయనతార, రుక్మిణి వసంత్, హుమా ఖురేషి, తారా సుతారియా తదితరులు కీలక పాత్రల్లో కనిపిస్తున్నారు.ఈ భారీ చిత్రాన్ని KVN ప్రొడక్షన్స్, మాన్స్టర్ మైండ్ క్రియేషన్స్ సంస్థలు నిర్మించాయి. సంగీత విభాగంలో రవి బస్రూర్తో పాటు పలువురు ప్రముఖ టెక్నీషియన్లు పనిచేశారు. భారీ తారాగణం, హై బడ్జెట్ మేకింగ్తో రూపొందిన ఈ చిత్రంపై విడుదలకు ముందే దేశవ్యాప్తంగా భారీ అంచనాలు నెలకొన్నాయి.
