Poorna Chandar Rao | టాలీవుడ్‌లో తొలిసారి పోర్న్ అడిక్షన్‌పై సినిమా.. ‘పూర్ణ చంద్రరావు’ ఫ‌స్ట్ లుక్ రిలీజ్‌

Poorna Chandar Rao Movie | తెలుగు సినీ పరిశ్రమ ఎప్పుడూ వైవిధ్యమైన కథలకు పెట్టింది పేరు. అయితే, కొన్ని అంశాలను తెరపై చూపించాలంటే సాహసం తప్పనిసరి.

Poorna Chandar Rao Movie | తెలుగు సినీ పరిశ్రమ ఎప్పుడూ వైవిధ్యమైన కథలకు పెట్టింది పేరు. అయితే, కొన్ని అంశాలను తెరపై చూపించాలంటే సాహసం తప్పనిసరి. అలాంటి ఓ ధైర్యమైన ప్రయోగంతో వస్తోంది ‘పూర్ణ చంద్రరావు’ చిత్రం. భారతీయ సినిమా చరిత్రలో తొలిసారిగా ‘పోర్న్ అడిక్షన్’ అనే సున్నితమైన అంశాన్ని ఎత్తిచూపుతూ ఈ సినిమా రూపొందుతోంది. తారక రామ దర్శకత్వంలో తెరకెక్కుతున్న ఈ చిత్రంలో విజయ్ రాజ్ కుమార్ హీరోగా నటిస్తున్నారు. గతంలో ‘ఏం చేస్తునావ్’ సినిమాతో గుర్తింపు తెచ్చుకున్న విజయ్, ఈ సినిమాకు కథను కూడా స్వయంగా రాశారు. తాజాగా ఈ సినిమా నుంచి ఫ‌స్ట్ లుక్‌ని విడుద‌ల చేశారు మేక‌ర్స్.

ఈ ఫ‌స్ట్ లుక్‌లో హీరో అర్ధనగ్నంగా సోఫాపై కూర్చొని ల్యాప్‌టాప్ చూస్తూ కనిపిస్తున్నాడు, వెనుక స్టీవ్ జాబ్స్ మరియు ఎలాన్ మస్క్ ఫోటోలు ఉన్నాయి. ఈ దృశ్యం టెక్నాలజీ, పోర్న్ అడిక్షన్, మరియు మానసిక స్థితుల మధ్య సంబంధాన్ని సూచిస్తూ లోతైన సందేశాన్ని అందిస్తోంది. సాధారణంగా మద్యం, డ్రగ్స్, సోషల్ మీడియా వ్యసనాలపై సినిమాలు వస్తుంటాయి, కానీ పోర్న్ అడిక్షన్‌ను ఫీచర్ ఫిల్మ్‌గా తీసుకురావడం ఇదే తొలిసారి. ఈ సినిమా ఎంటర్‌టైన్‌మెంట్‌తో పాటు ఆలోచనను రేకెత్తించే శైలిలో రూపొందుతోంది.

దర్శకుడు తారక రామ గతంలో ‘అనగనగా ఆస్ట్రేలియాలో’ సినిమాతో కొత్త ప్రయోగం చేసిన సంగతి తెలిసిందే. ఇప్పుడు ‘పూర్ణ చంద్రరావు’తో మరో బోల్డ్ కథనాన్ని ఎంచుకున్నారు. ఆసక్తికర విషయం ఏమిటంటే, హీరో విజయ్ రాజ్ కుమార్ తన వ్యక్తిగత అనుభవాల ఆధారంగా ఈ కథను రాసినట్లు సమాచారం. సహాన ఆర్ట్ క్రియేషన్స్ బ్యానర్‌పై మాధవి మంగపతి, యారీక్ స్టూడియోస్ సంయుక్తంగా ఈ చిత్రాన్ని నిర్మిస్తున్నాయి. ప్ర‌స్తుతం ఈ సినిమా సోష‌ల్ మీడియాలో హాట్ టాపిక్‌గా మారింది.