మనసులో చిరకాలం ఉంటారు

ఇటీవల కన్నుమూసిన రెబల్‌ స్టార్‌ కృష్ణంరాజు సంతాప సభను తెలుగు చిత్ర పరిశ్రమ మంగళవారం సాయంత్రం హైదరాబాద్‌లోని ఫిలింనగర్‌ కల్చరల్‌ సెంటర్‌లో నిర్వహించింది.

ఇటీవల కన్నుమూసిన రెబల్‌ స్టార్‌ కృష్ణంరాజు సంతాప సభను తెలుగు చిత్ర పరిశ్రమ మంగళవారం సాయంత్రం హైదరాబాద్‌లోని ఫిలింనగర్‌ కల్చరల్‌ సెంటర్‌లో నిర్వహించింది. ఈ కార్యక్రమంలో మోహన్‌ బాబు, మంచు విష్ణు, జీవిత రాజశేఖర్‌, శివాజీ రాజా, నిర్మాతలు సి కళ్యాణ్‌, ఆది శేషగిరిరావు, రమేష్‌ ప్రసాద్‌, రచయిత విజయేంద్ర ప్రసాద్‌, ఫెడరేషన్‌ అధ్యక్షుడు వల్లభనేని అనిల్‌ కుమార్‌ తదితరులు పాల్గొన్నారు.

ఈ సందర్భంగా కృష్ణంరాజు చిత్రపటానికి పూలమాలలు వేసి శ్రద్ధాంజలి ఘటించారు. ‘చిత్ర పరిశ్రమ ఒక గొప్ప నటుడిని, నిర్మాతను కోల్పోయింది. వారి ఆత్మకు శాంతి చేకూరాలి’ అని మోహన్‌ బాబు అన్నారు. ‘కృష్ణంరాజు నట ప్రయాణం మొత్తం సాహసోపేతంగా సాగింది. ఏ కష్టం వచ్చినా వెరవని వ్యక్తిత్వం ఆయనది. అజాతశత్రువుగా అందరి ప్రేమను పొందారు’ అని నిర్మాత ఆదిశేషగిరి రావు అన్నారు. భౌతికంగా కృష్ణంరాజు మనకు దూరమైనా మనసులో చిరకాలం ఉంటారని కార్యక్రమంలో పాల్గొన్న అతిథులు పేర్కొన్నారు.