Visit:
Spirit | ప్రభాస్‌ ‘స్పిరిట్‌’ సినిమా షూటింగ్‌ ఇప్పటివరకూ మొదలుకాలేదు. కానీ సినిమాపై వస్తున్న వార్తలు మాత్రం అభిమానులకే కాక, సగటు ప్రేక్షకులకు కూడా హీట్‌ పుట్టిస్తున్నాయి. ఇప్పటికే ‘స్పిరిట్‌’లో సైఫ్‌అలీఖాన్‌, కరీనాకపూర్‌ నటిస్తున్నారనీ, ఈ భార్యభర్తలిద్దరూ ఇందులో నెగిటీవ్‌ షేడ్స్‌ ఉన్న పాత్రలు పోషిస్తున్నారని వార్తలు వచ్చాయి. వాటిని నిజం చేస్తూ దర్శకుడు సందీప్‌రెడ్డి వంగా ఇటీవలే ఈ జంటను కలిశారు. వారికి కథ, పాత్రలు కూడా వివరించినట్టు బీటౌన్‌ సమాచారం.
ఇదిలావుంటే.. ఇప్పుడు ఏకంగా మలయాళ సూపర్‌స్టార్‌ మమ్ముట్టి ఈ సినిమాలో భాగం కానున్నారన్న వార్త అభిమానులకు పూనకాలు తెప్పిస్తున్నది. అయితే.. ఇప్పటివరకూ వీటిపై అధికారిక ప్రకటనలు మాత్రం రాలేదు. వచ్చే ఏడాది ఈ సినిమా షూటింగ్‌ మొదలు కానుంది. సందీప్‌రెడ్డి వంగా మార్క్‌ యాక్షన్‌ సీన్స్‌, వైల్డ్‌ ఎలిమెంట్స్‌తో హాలీవుడ్‌ స్థాయిలో ‘స్పిరిట్‌’ తెరకెక్కనున్నదనీ, దాదాపు 400కోట్ల నిర్మాణ వ్యయంతో సందీప్‌ ఈ సినిమాను నిర్మించనున్నారని సమాచారం. టి.సిరీస్‌, భద్రకాళి పిక్చర్స్‌ కలిసి నిర్మిస్తున్న ఈచిత్రానికి హర్షవర్ధన్‌ రామేశ్వర్‌ సంగీత దర్శకుడు.
