మెరిసేలే..మెరిసేలే..

హీరోయిన్‌ హన్సిక ప్రధాన పాత్రలో నటిస్తున్న సినిమా ‘మై నేమ్‌ ఈజ్‌ శృతి’. మురళీ శర్మ, ఆడుకాలం నారాయణ్‌, జయప్రకాష్‌ ఇతర కీలక పాత్రలు పోషించారు. ఆర్గాన్‌ మాఫియా నేపథ్యంతో ఈ చిత్రాన్ని దర్శకుడు శ్రీనివాస్‌ ఓంకార్‌ రూపొందిస్తున్నారు. వైష్ణవి ఆర్ట్స్‌ పతాకంపై బురుగు రమ్య ప్రభాకర్‌ తెలుగు, తమిళ, హిందీ భాషల్లో ఏకకాలంలో నిర్మిస్తున్నారు.

అన్ని కార్యక్రమాలు పూర్తి చేసుకున్న ఈ సినిమా విడుదలకు సిద్ధమవుతున్నది. తాజాగా ఈ చిత్రం నుంచి ‘మెరిసేలే మెరిసేలే’ అనే లిరికల్‌ పాటను విడుదల చేశారు. ఈ పాటను మార్క్‌ కె రాబిన్‌ స్వరకల్పనలో కృష్ణకాంత్‌ సాహిత్యాన్ని అందించగా..సత్యయామిని ఆలపించారు. నాయిక పాడుకునే ఆహ్లాదకర సోలో పాటగా ఈ గీతం ఆకట్టుకుంటున్నది.

ఈ సందర్భంగా నిర్మాత బురుగు రమ్య ప్రభాకర్‌ మాట్లాడుతూ…‘ఇప్పటివరకు మా సినిమా నుంచి విడుదల చేసిన ప్రతి కంటెంట్‌కు మంచి స్పందన వస్తున్నది. తాజాగా రిలీజ్‌ చేసిన ‘మెరిసేలె మెరిసేలే’ పాట సినిమాకు ప్రత్యేక ఆకర్షణ అవుతుంది. ఆర్గాన్‌ మాఫియా నేపథ్యంతో వస్తున్న ఈ సినిమాలో ప్రతి సన్నివేశం ఉత్కంఠను కలిగిస్తూ సాగుతుంది. ఇప్పటివరకు తెరపై రాని కొత్త కాన్సెప్ట్‌తో సినిమా నిర్మించాం. త్వరలోనే విడుదల తేదీ ప్రకటిస్తాం’ అన్నారు