ప‌వ‌న్ క‌ళ్యాణ్ విష‌యంలో పోసాని కృష్ణమురళిని తప్పు బట్టిన తమ్మారెడ్డి

September 30, 2021 / 08:14 PM IST

ఇండస్ట్రీలో, అలాగే రాజకీయవర్గాల్లో ఇప్పుడు పోసాని కృష్ణమురళి గురించి చాలా పెద్ద చర్చ జరుగుతుంది. ప‌వ‌ర్ స్టార్ పవన్ కళ్యాణ్ గురించి ఆయన మాట్లాడిన భాష అందరికీ అభ్యంతరకరంగా మారింది. ముఖ్యంగా ఒక పార్టీ అధినేత‌ను ప‌ట్టుకుని అంత దారుణంగా విమ‌ర్శించ‌డం ఎవ‌రూ పెద్ద‌గా హ‌ర్షించ‌డం లేదు. ఒకవేళ నిజంగా ఆయన అభిమానులు నిన్ను బాధ పెట్టినా కూడా మీడియా ముందు అంత దారుణంగా మాట్లాడాల్సిన అవసరం లేదు కదా.. అంటూ టాలీవుడ్ ప్రముఖులు కొందరు పోసాని కృష్ణమురళి తీరును తీవ్రంగా తప్పుబడుతున్నారు. తాజాగా సీనియర్ దర్శక నిర్మాత తమ్మారెడ్డి భరద్వాజ కూడా పోసానిని తప్పుపట్టాడు. ఆయన ఉపయోగించిన భాషను ఖండించాడు.

పవన్ కళ్యాణ్‌ను విమర్శించే అన్ని హక్కులు పోసాని దగ్గర ఉన్నాయి.. కానీ అతడి వ్యక్తిగత జీవితం గురించి మాట్లాడే హక్కు మాత్రం పోసాని కృష్ణ మురళికి లేదు. ఆరోజు జరిగిన ప్రసంగంలో పవన్ కళ్యాణ్ ఎవరినీ వ్యక్తిగతంగా ఉద్దేశించి మాట్లాడలేదు. అలాంటప్పుడు ఆయన వ్యక్తిగత జీవితంపై ఎందుకు నోరు జారాడు.. ఆ అవసరం ఏమొచ్చింది అంటూ ప్రశ్నించాడు తమ్మారెడ్డి భరద్వాజ. రాజకీయ సిద్ధాంతాలపై మాట్లాడి ఉంటే బాగుండేది. కానీ పవన్ కళ్యాణ్ వ్యక్తిగత జీవితంపై అలా నోరు జారడం కరెక్ట్ కాదు. దాన్ని ఎవరు హర్షించరు అంటున్నాడు తమ్మారెడ్డి.

గతంలో కూడా కత్తి మహేశ్‌.. పవన్ కళ్యాణ్‌పై నోరు జారిన విషయం ఆయన గుర్తు చేశారు. పోసాని అంత దారుణంగా బూతులు తిట్టిన తర్వాత ఇప్పుడు పవన్ అభిమానులు తనను తిడుతున్నారు అని మీడియా ముందుకు రావడం ఎంతవరకు కరెక్ట్ అంటున్నాడు. కొన్నిసార్లు అభిమానులు కూడా హీరోల మాట వినరు.. ఎంత చెప్పినా ఎమోషన్ కంట్రోల్ చేసుకోలేరు. వాళ్లను నియంత్రించటం కష్టమ‌ని తమ్మారెడ్డి భరద్వాజ తెలిపాడు. ఇక పవన్ కళ్యాణ్ అభిమానులు కూడా కాస్త హద్దుల్లో ఉండాలని కోరాడు ఈయన. ట్రోల్స్ చేస్తే ఈ విషయాన్ని అనవసరంగా పెద్దది చేసినట్లు ఉంటుంది అంటున్నాడు. కేవలం తమ్మారెడ్డి మాత్రమే కాదు.. ఇండస్ట్రీలో ఇంకా చాలామంది పోసాని వాడిన భాషను ఖండిస్తున్నారు.